Pêl-droed

Dau begwn

Dwy noson. Gorfoledd nos Lun. Digalondid nos Fawrth. Dwy ddinas. Llwyddiant nos Lun. Methiant nos Fawrth.

Nid felly oedd diweddglo’r tymor pêl-droed i fod. Er, wrth gwrs, yn dilyn methiant naill ai’r Elyrch neu’r Adar Gleision i ennill dyrchafiad awtomatig, roedd `na siom yn aros i un o’r clybiau Cymreig yn y Bencampwriaeth. Er gwaetha diflastod nos Fawrth, erys y posibilrwydd fod `na siom arall ar y gorwel wrth i gefnogwyr Abertawe baratoi ar gyfer eu pererindod i Wembley ar 30 Mai.

Rhaid, fodd bynnag, bod yn gadarnhaol ar ran yr Elyrch a’u cefnogwyr ar hyn o bryd wrth i glwb pêl-droed Abertawe edrych ymlaen yn eiddgar at un cyfle arall i gyrraedd pinacl y pyramid cynghreiriol. Os gall carfan Brendan Rodgers a’r cefnogwyr ailgreu’r naws a welwyd yn Stadiwm Liberty ar ddechre’r wythnos hon a’i gario i Ogledd Llundain ymhen deng niwrnod, mae’r posibilrwydd o weld mawrion Manchester United, Arsenal, Lerpwl, a.y.y.b. yn chwarae yn Ne Orllewin Cymru’n realaeth wedi’r hirymaros.

Gyda’r clybiau Cymreig ill dau wedi llwyddo i gadw sgorfwrdd glân ar eu hymweliadau i Nottingham Forest a Reading yng nghymalau cyntaf rownd gynderfynol y gêmau ailgyfle, mawr oedd y disgwyl dros y Sul am weld diweddglo cwbl Gymreig a fyddai’n setlo, dros dro o leiaf, pa un ohonynt yw prif glwb Cymru.

Erbyn hyn, dim ond yr Elyrch sy’n hawlio’r llawryfon ac, os llwyddo yn Wembley, y nhw fydd yn eu meddu am o leiaf un tymor tra bydd cefnogwyr yr Adar Gleision yn gobeithio’u dilyn i uchelfannau’r Uwch Gynghrair ar ddiwedd y tymor nesaf.

I ddarllen mwy CLICIWCH YMA