Y Cymro

Un gêm i fynd i weld pwy fydd yn chwarae yn yr Europa

2017-05-09T00:00:00+1:00

HEN glwb neu glwb ifanc fydd y pedwerydd i gynrhychioli Cymru yn Ewrop yr haf hwn.

Mi fydd y cyfan yn cael ei benderfynu ym Mangor fin nos y Sadwrn hwn pan fydd y crysau glas yn wynebu myfyrwyr Met Caerdydd.

Drwy groen eu dannedd y llwyddodd Bangor i guro’r Drenewydd i fod â’r hawl i chwarae eto.

Wedi mynd ddwy gôl ar y blaen yn gynnar yn y gêm, cyn pen dim roedd bechgyn Chris Hughes wedi gweld gwendid yn amddiffyn y Dinasyddion a sgorio dwy eu hunain.

Mi fu’n rhaid cael penderfyniad caredig gan y dyfarnwr i Fangor gael cic gosb o ymyl y cwrt ymhell yn yr ail hanner. Wrth lwc, roedd troed Gary Roberts wedi mwytho’r bêl y ffordd iawn ac i mewn yr aeth hi fel bwled iddyn nhw gael y drydedd.

Fu ond y dim i’r Drenewydd ddod yn gyfartal wedyn ond roedd y duwiau’n gwenu’n garedig ar Nantporth ac enw Bangor oedd y cyntaf yn ffeinal y gêmau ailgyfle.

Roedd yn rhaid aros tan y Sul i weld pwy fyddai eu gwrthwynebwyr – Caerfyrddin neu Met Caerdydd. Yr Hen Aur aeth ar y blaen yn nechrau’r ail hanner, yr unig ymgais a gawson nhw am gôl bron. Liam Griffiths a lwyddodd i droi’n ddeheuig a chicio’r bêl yn isel i’r gôl.

Roedd hi’n argoeli’n dda iddyn nhw unwaith iddyn nhw gael un ar y bwrdd. Oni bai am gamgymeriad Dwaine Bailey yn y cefn fyddai Met Caerdydd ddim wedi sgorio.

Manteisiodd Adam Roscrow ar y peniad gwan a chodi’r bêl dros ben Idzi i sgorio.

Braidd yn flêr oedd y cyfan wedyn ac wrth i bawb ddisgwyl am amser ychwanegol mi gafodd Met chwip o gôl o gic gosb yn yr eiliadau olaf drwy ben Charlie Corsby i’w gwneud yn 1-2.

Doedd dim amser na nerth yng nghoesau Caerfyrddin i ddod yn gyfartal. A dyna Met ar ben eu digon yn cael taith i’r ffeinal ym Mangor.

Beth fydd eu hanes? Yn sicr, gan Fangor y mae’r fantais ac mi fydd y Dinasyddion yn ddigon balch na fyddan nhw’n gorfod chwarae Caerfyrddin unwaith eto ar ôl colli gartref iddyn nhw y mis diwethaf.

Maen nhw wedi llwyddo i guro Met y ddau dro diwethaf ond mi gawson nhw dipyn o gweir yng Nghaerdydd ym mis Tachwedd – colli 4-0.

Mi fyddan nhw’n ymwybodol o hynny ac yn gwybod fod gan y bechgyn ifanc ddigon o allu i’w herio.

Maen nhw’n abl iawn i redeg yn erbyn y coesau hŷn.

Gan fod Bangor yn dibynnu ar chwaraewr sydd ymhell yn ei dridegau i’w harwain, yn anorfod dyw Gary Taylor-Fletcher ddim cystal wrth i’r gêm fynd yn ei blaen.

A phwy a ŵyr na fydd y myfyrwyr yn gweld cefnwyr Bangor mor anodd a rhai Caerfyrddin i gael y gorau arnyn nhw.

Mi fyddan yn sicr wedi edrych ar y mannau gwan oedd gan y Gleision yn erbyn y Drenewydd.

Petai Bangor yn methu dygymod â nhw mi fyddai’n ergyd galed i’r perchnogion presennol sy’n gweld Ewrop fel ffon fara at y tymor nesaf.

Ar y llaw arall stori dylwyth teg fyddai hi yn hanes Met Caerdydd, yn llwyddo fel Llandudno i gyrraedd yr Europa ar y cynnig cyntaf yn Uwch Gynghrair Cymru.

Y coesau hŷn yn erbyn y rhai iau amdani. Mi fyddan nhw i’w gweld ar Sgorio.

Y Bala’n drydydd a thri o glybiau eraill am fod yn bedwerydd

2017-04-27T00:00:00+1:00

Yr unig newid ar ddiwedd y tymor yw fod y Bala wedi colli eu lle yn yr ail safle. Wedi dal ato’n hir, yn y gêm olaf y Sadwrn diwethaf mi gollson nhw yn erbyn y Seintiau a Gap Cei Connah yn cael un pwynt yng Nghaerdydd. Roedd hynny’n ddigon iddyn nhw ddisgyn i’r trydydd lle yn y tabl.

Serch hynny, mae’r Bala yn Ewrop yn barod ac yn ddiolchgar am hynny. Mae amser eto i benderfynu pwy fydd y clwb arall fydd yn cystadlu yn yr Europa yr haf hwn.

Mae pythefnos cyn y gwelwn ni ddechrau gêmau’r ailgyfle. Ac mi fydd hi’n gyfnod diddorol oherwydd gallu’r Drenewydd i danio goliau wrth y llath yn ddiweddar. Y nhw fydd yn wynebu Bangor a orffennodd yn bedwerydd yn y tabl. Yno y byddai’r Dinasyddion beth bynnag petaen nhw wedi curo Caerfyrddin, ond unwaith eto mi gafodd yr Hen Aur y gorau arnyn nhw yn Nantporth.

Er iddyn nhw ennill yn erbyn y Seintiau Newydd ar ddydd Gwener y Groglith doedd gan y Dinasyddion mo’r gallu i ymdrin â thîm Mark Aizlewood. Mae hynny’n codi’r cwestiwn sut y maen nhw am ddygymod â’r Drenewydd sydd wedi blaguro yn y misoedd diwethaf.

Mi gafodd tîm Chris Hughes chwech yn erbyn Aberystwyth a saith yn erbyn Airbus y tro cynt. A chan y Drenewydd y mae prif sgoriwr y cynghrair y tymor hwn, Jason Oswell. Un calondid i Fangor yw fod Oswell i ffwrdd yn Uganda adeg y gêm ailgyfle, rhan o’i gwrs physiotherapydd. Ond hebddo mi fydd yn ddiwrnod digon anodd i dîm Gary Taylor-Fletcher.

Gan eu bod wedi curo ym Mangor mae Caerfyrddin yn cael y fraint o chwarae gartref yn eu gêm nhw yn erbyn MET Caerdydd. Mae’r gêmau rhwng y ddau glwb wedi bod yn rhai agos ar brydiau yn ail hanner y tymor er mai Caerfyrddin a enillodd oddi cartref 0-4 yn eu gêm ddiwethaf.

Mae’n argoeli mai’r Hen Aur fydd yn mynd â hi ymhen pythefnos ond pwy fydd yn eu wynebu yn y gêm olaf – Bangor neu’r Drenewydd? Os bydd y Dinasyddion yn llwyddo mae’n rhaid gofyn ai Caerfyrddin fydd yn mynd i Ewrop. Dyw Bangor wedi cael fawr o lwc yn eu herbyn hyd yma.

Cyn hynny mae’n rhaid iddyn nhw fod yn feistr ar y Drenwydd. Mae honno’n mynd i fod yn her i ddechrau.

Ar ddiwedd y tymor mae cwmni Dafabet, neu Daf a Bet yn ôl un wag, yn rhoi’r gorau i noddi Uwch Gynghrair Cymru. Maen nhw wedi bod yn ei chefnogi ers dwy flynedd. Mae’r gwaith wedi dechrau i chwilio am noddwr newydd.

Cwpan Cymru fydd yn cael y prif sylw y Sul hwn, y gêm rhwng y Bala a’r Seintiau Newydd ar gae Bangor. Mi fydd i’w gweld ar Sgorio a’r gic gyntaf am 2.00 o’r gloch.

Mi gafwyd rhagflas o’r ffeinal y Sadwrn diwethaf ym Maes Tegid. Ar un adeg roedd hi’n edrych fel petai tîm Craig Harrison am golli gêm arall, nes iddyn nhw ddechrau tynnu’r ewinedd o’r blew a dangos eu medrau.

Er i dîm Colin Caton fynd ar y blaen ddwywaith cael eu sodro yn eu lle a wnaeth bechgyn y Bala a cholli 6-4. Roedd hi’n bwrw goliau yn y Bala fel yr oedd hi yn y Drenewydd yr un pryd.

Gorfod ailafael ynddi newydd golli i’r pencampwyr

2017-04-07T00:00:00+1:00

Anodd credu anlwc y clwb o Gei Connah. Am yr ail waith mewn wythnos maen nhw’n gorfod chwarae yn erbyn y Seintiau Newydd, wedi colli iddyn nhw y Sadwrn diwethaf 3-0 yn rownd gyn-derfynol Cwpan Cymru.

Maen nhw yn Park Hall y nos Wener yma yn chwilio am o leiaf bwynt i’w cadw yn ddigon ar y blaen i Fangor sydd yn y pedwerdydd safle yn y tabl. Os na fydd y duwiau o’u plaid, fel yr oeddan nhw gartref bythefnos yn ôl pan enillson nhw 2-1 yn erbyn y Seintiau, yna dod o Groesoswallt yn waglaw y byddan nhw.

O’i gymharu â’r Cei fydd tasg y Bala ddim mor anodd. Caerfyrddin sy’n ymweld â’r dref y Sadwrn hwn. Mae clwb Maes Tegid yn gwybod yn barod eu bod yn Ewrop wedi cael y gorau ar Gaernarfon yn rownd gyn-derfynol arall Cwpan Cymru. Y tro cyntaf erioed iddyn nhw fynd i’r ffeinal.

O leiaf mae’r Bala yn gwybod beth yw cefnogaeth iawn i glwb. Mi gafodd torf Caernarfon a’u brwdfrydedd eu canmol gan Colin Caton, rheolwr y Bala. Mi fyddai wrth ei fodd yn cael cystal criw i gefnogi tîm Maes Tegid. Siawns na all pobol y Bala heidio i Fangor i roi eu cefnogaeth iddyn nhw ddiwedd y mis.

Mi fydd angen mwy na’r nifer fydd yn eu gêm y Sadwrn hwn i greu tipyn o hwyl a miri. Dyw Caerfyrddin ddim yn nodedig am eu cefnogaeth ‘chwaith a rhyw lond dwrn fydd wedi teithio i Faes Tegid i weld a oes ganddyn nhw obaith o gael pwynt. Wedi colli eu dwy gêm gartref ddiwethaf yn erbyn y Bala y maen nhw, felly dyw hi ddim yn edrych yn rhy dda ar y trydydd cynnig.

Cadw’n obeithiol y bydd y Drenewydd o aros yn y seithfed safle yn y tabl. Maen nhw gartref y Sadwrn hwn i Derwyddon Cefn sydd chwe phwynt ar eu holau. Mae tîm Chris Hughes wedi cael bywyd newydd yn yr wythnosau diwethaf ac yn ôl pob argoel mi allan nhw ennill hon i gael mwy o flaen ar Landudno fydd yn wynebu Aberystwyth dydd Sul.

Hon a MET Caerdydd yn erbyn Bangor fydd y ddwy gêm ar y Sul. Pedwar pwynt sydd rhwng Llandudno a’r Drenewydd tra mae Aberystwyth mewn man peryglus yn y trydydd safle o’r gwaelod. Cael gwared â’u rheolwr oedd y peth callaf i’w wneud yn eu tyb nhw er mwyn cael aros i fyny.

Mi weithiodd o ryw fath yn eu gêm gyntaf heb Matthew Bishop. Gêm gyfartal ddi-sgôr oedd hi yn erbyn Derwyddon Cefn sydd bedwar pwynt uwch eu pennau. Fydd Wayne Jones yn medru dyfalu sut i guro Llandudno? Mi gawn weld yr ateb ar Sgorio.

Clwb arall a ffarweliodd â’u rheolwr yw Bangor, dim ond eu bod nhw yn hanner uchaf y tabl. Symudiad digon rhyfedd oedd hwn mor hwyr yn y tymor. Ydyn nhw wedi diffygio cyn cael y cyfle i ennill eu lle i fod yn yr Europa?

Mi welan nhw fel y Bala bythefnos yn ôl y bydd MET yn rhai digon gwydn i’w curo. Os na fydd gan y rheolwr dros dro, Gary Taylor-Fletcher, rywbeth i fyny ei lawes i’w gwneud nhw lwyddo.

Un gêm arall sydd, y Sadwrn hwn, rhwng y Rhyl ac Airbus o waelod y tabl.

Caernarfon heb reolwr wrth wynebu’r Bala yn y cwpan

2017-03-29T00:00:00+1:00

TRI o glybiau’r Uwch Gynghrair sydd ar ôl yng Nghwpan Cymru. Y pedwerydd yw Caernarfon sydd wedi codi eu gêm yn rowndiau’r cwpan eleni a dyna sut maen nhw wedi cyrraedd y rownd gyn-derfynol yn y Rhyl y Sadwrn hwn.

Eu gêm nhw yn erbyn y Bala sydd ar Sgorio, sy’n deall y bydd mwy o ysbryd o lawer yn y gêm hon nag yn y gêm o’i blaen ym Mangor – Gap Cei Connah yn erbyn deiliaid y cwpan a phencampwyr yr Uwch Gynghrair am y chweched tro yn olynol.

Fydd rheolwr Clwb Pêl-droed Caernarfon ddim ar ochr y cae.
Mae Iwan Williams wedi ei wahardd am dair gêm er 23 Mawrth. Cyn hynny mi fu’n sôn am ei deimladau am y gêm yn erbyn y Bala ar wefan y clwb.

Hon yw eu gêm fwyaf ers tro, meddai, a hon yw’r prawf mwya’ arno fel rheolwr er pan mae o wedi ymuno â’r clwb.

“Mae Colin Caton wedi casglu tîm rhagorol at ei gilydd ac mae’r llwyddiant maen nhw wedi ei gael yn y blynyddoedd diwethaf yn dangos hynny. Wedi tyfu o glwb tebyg i Gaernarfon y maen nhw ac erbyn hyn maen nhw’n siomedig os na allan nhw fynd i chwarae yn yr Europa,” meddai.

“Serch hynny mi fyddwn ni’n mynd ati i drio ennill y gêm.”

Maen nhw wedi ymarfer ddwywaith yr wythnos yma i baratoi sut i atal y Bala.

Ond ar y diwrnod fydd Iwan Williams ddim yn cael mynd i’r ystafelloedd newid nac ar y cae, na hyd yn oed yn medru siarad efo Sgorio ar ddiwedd y gêm.

Mae hynny oherwydd y gwaharddiad a gafodd fis yn ô mewn gêm yn erbyn Holyhead Hotspur, a’r wythnos diwethaf y daeth i rym.

Mae’n teimlo fod hynny’n gwbl annheg. Mi ddylai’r gwaharddiad fod wedi digwydd yn syth yw ei farn.

Beth bynnag, maen nhw’n troi am y Rhyl yn credu y medran nhw gael gafael yn y gêm.

A chyda’r gefnogaeth fydd wedi mynd ar eu hôl mi fydd hynny’n codi eu calonnau i wneud y gorau drostyn nhw.

Does dim dwywaith mai’r Bala yw y ffefrynnau ond rownd yn y Cwpan yw hon ac mi all unrhywbeth ddigwydd o flaen y camerâu yn hwyr brynhawn y Sadwrn. Mi ddylai fod yn werth ei gweld.

Ym Mangor y mae’r gêm arall rhwng y cyntaf a’r trydydd yn Uwch Gynghrair Cymru.

Mae Andy Morrison wedi cael ei ddymuniad fod y Cei yn cael chwarae ar wair.

Yn bendant mi fydd cae Nantporth yn eu plesio, er digon prin y bydd ganddyn nhw hanner cymaint o gefnogwyr a Chaernarfon yn teithio draw i’w gweld.

Drwy ryw wyrth maen nhw wedi curo’r Seintiau Newydd yng Nghei Connah yr wythnos diwethaf, yr ail glwb yn unig i guro’r pencampwyr y tymor hwn. Gan eu bod wedi cael yr allwedd i wneud hynny unwaith, y cwestiwn yw a fedran nhw ddod o hyd iddi eto yr ail waith a rhoi tro iawn arni?

Efallai fod y Seintiau wedi simsanu ychydig yn y gêmau diwethaf. Dim ond dwy a gawson nhw gartref yn erbyn Caerfyrddin y Sadwrn diwethaf sy’n awgrymu fod gobaith i dîm sydd ag awch i’w trechu.

Ond nhw yw’r fferfrynnau am y cwpan eleni eto.

Ffawd Cymru yn eu dwylo eu hunain

2017-03-22T00:00:00+1:00

BYDD angen i Gymru wyrdroi hanes yn Stadiwm Aviva, Dulyn heno os am gadw’r gobaith o gyrraedd rowndiau olaf Cwpan y Byd pêl-droed yn Rwsia blwyddyn nesaf.

Dydy’r Cochion ddim wedi curo’r Gwyddelod yn eu Prifddinas er 1992, gan golli deirgwaith er ceisio gwneud hynny mewn tri stadiwm gwahanol, sef Tolka Park (1993), Croke Park (2007) a Stadiwm Aviva (2011).

Bydd Chris Coleman, felly, yn arwain ei garfan heno, nid yn unig i’r maes lle collwyd yr ornest olaf `na ond hefyd nôl i ddinas geni ei dad, Paddy, a fu farw tair blynedd yn ôl a hynny yn sicr o fod yng nghefn meddwl y rheolwr.

O gofio taw’r golled `na yn Stadiwm Aviva oedd y gêm gyntaf dan reolaeth y diweddar Gary Speed, bydd yr emosiynau yn ingol i lawer o Gymry heno cyn i bawb orfod cydnabod taw yn eu dwylo eu hunain y mae eu ffawd o ran cyrraedd Rwsia.

Ar ôl curo Moldofa yn gyfforddus o 4-0 yn Stadiwm Dinas Caerdydd yn eu gêm ragbrofol gyntaf yng Ngrŵp D ar ddechrau mis Medi y llynedd, digon llipa fu’r ymdrech ers hynny wrth rannu’r ysbail gydag Awstria, Georgia a Serbia dros yr wythnosau canlynol.

Arweiniodd y canlyniadau diweddaraf hyn at weld Cymru yn drydydd yn y Grŵp wedi cronni hanner dwsin o bwyntiau tra bod y Gwyddelod ar y brig wedi ennill deirgwaith a chronni 10 pwynt a Serbia yn ail ar 8 pwynt.Petai’r Iwerddon yn ennill heno i greu

goruchafiaeth o saith pwynt dros Gymru, bydd ‘na dalcen hynod galed yn wynebu Coleman, Osian Roberts a’u chwaraewyr os am ailadrodd y gamp o gyrraedd Ewro 2016 yn Ffrainc.

Er i ddau o wir sêr Cymru, Gareth Bale ac Aaron Ramsey, fod allan o dimoedd eu clybiau yn ddiweddar a chwaraewr Real Madrid wedi derbyn gwaharddiad rai wythnosau yn ôl, y gobaith yw y bydd y ddau yn holliach ac yn awchu am wella ar eu hymdrechion yn yr Hydref.

Mae llawer yn cydnabod fod capten Cymru, Ashley Williams, yn well chwaraewr fyth yn dilyn ei drosglwyddiad i Everton y llynedd ac er i Neil Taylor golli gafael ar safle’r cefnwr chwith gydag Abertawe a symud i Aston Villa, mae e bellach i’w weld yn anelu at fod nôl ar ei orau unwaith eto.

Tra bydd y pwysau arferol ar Bale i sgorio heno, rhaid dwyn i gof campau Hal Robson-Kanu a Sam Vokes wrth sgorio yn erbyn Gwlad Belg yn rownd wyth olaf Ewro 2016, er y bydd cefnogwyr yr Elyrch yn ei chael hi’n anodd rhoi gormod o glod i flaenwr Burnley wedi iddo ennill cic anghywir o’r smotyn yn y Liberty yn ddiweddar.

Os bydd chwaraewyr Coleman yn agos at eu gorau heno, gellir disgwyl buddugoliaeth Gymreig, yn arbennig o weld nifer o chwaraewyr blaenllaw Gwyddelig fel Shane Duffy, Ciaran Clark, Wes Hoolahan, Harry Arter a Daryl Murphy yn absennol gydag anafiadau, tra bod Robbie Brady wedi ei wahardd.

Er hynny, o gofio bod yr Iwerddon yn meddu ar ddau hyfforddwr craff yn Martin O’Neill a Roy Keane, bydd y nerfau’n anniddig ar hyd y 90 munud os na fydd Cymru’n gallu sgorio’n gynnar a chadw’r rhagoriaeth.

Carfan Cymru i ddewiswyd i wynebu’r Iwerddon: Wayne Hennessey, Danny Ward, Owain Fôn Williams, Ben Davies, James Chester, James Collins, Joe Walsh, Chris Gunter, Jazz Richards, Neil Taylor, Ashley Williams, Joe Allen, David Edwards, Andy King, Tom Lawrence, Joe Ledley, Shaun MacDonald, Aaron Ramsey, Gareth Bale, Hal Robson-Kanu, Tom Bradshaw, Sam Vokes, Ben Woodburn

Noson anodd i Fangor yn ceisio dofi bechgyn Maes Tegid

2017-03-16T00:00:00+1:00

DAU glwb sydd wedi bod yr ochr arall i’r ffin a cholli sy’n wynebu’i gilydd y nos Wener yma.

Mi aeth Bangor i Park Hall bythefnos yn ôl a cholli 4-0 a’r Bala yn dod oddi yno y Sul diwethaf wedi colli 3-2 yn unig.

Awgrym cryf, felly fod gan Fangor dipyn o gêm o’u blaenau yn Nantporth wrth groesawu bechgyn Maes Tegid.

Pan ymwelodd y Bala â Bangor ddiwethaf doedd tîm Colin Caton ddim yn cael llawer o hwyl arni yn y cyfnod hwnnw yn agos i ddechrau’r tymor.

Mi ddaeth rhai o’r chwaraewyr yn ôl wedi gwella o’u briwiau ac ers hynny dydyn nhw ddim wedi edrych yn ôl.

Dyna pam y maen nhw’n ail yn y tabl, dri phwynt o flaen Gap Cei Connah a phump o flaen Bangor.

Mi wnaeth tîm Ian Dawes dipyn o stroc ohoni yn y Waun Dew yn curo Caerfyrddin 2-3 yn y munud olaf.

Does dim dwywaith na fydd y Bala yn anos eu dofi ac mi fydd yn rhaid i droed Daniel Nardiello fod ar ei gorau eto os ydyn nhw am lwyddo.

Mi gafodd ei hatric gyntaf yn erbyn Caerfyrddin.

Gêm arall y nos Wener yma yw honno yn Rhosymedre rhwng Derwyddon Cefn a’r Rhyl.

Dyma ddau glwb sydd wedi cael gêmau cyfartal yn eu dwy gêm ddiwethaf a’r Rhyl un o waelod y tabl a’r Derwyddon yn y pedwerydd.

Dim ond dau bwynt sy’n eu gwahanu, felly mae’r gêm hon yn hynod o bwysig i’r ddau glwb.

Mi aeth y Rhyl i Landudno wythnos yn ôl a’r gêm yn gorffen yn 1-1.

Yn sicr mi fydd yn rhaid iddyn nhw wneud yn well na hynny yn erbyn y Derwyddon os ydyn nhw am gael gobaith o gadw yn yr Uwch Gynghrair.

Efallai i’r ffaith i dîm Huw Griffiths fynd i Frychdyn a methu sgorio yn erbyn y clwb sydd ar waelod y tabl godi calon tua’r Belle Vue.

Tair gêm sydd y Sadwrn hwn a’r Seintiau Newydd yn teithio y tro hwn, i brifddinas Cymru i weld sut y bydd MET Caerdydd yn dygymod â nhw.

Y Sadwrn diwethaf mi gollodd y myfyrwyr 2-0 yng Nghei Connah a cholli eu cefnwr Emlyn Lewis wrth iddo gael cerdyn coch.

Mi gawson nhw gêm gyfartal yn erbyn Caerfyrddin bythefnos yn ôl ac os y gallan nhw gael yr un canlyniad wrth wynebu’r Seintiau mi fyddai hynny’n ganlyniad da iawn iddyn nhw. Gobeithio gormod fydd hynny o bosibl.

Wedi cael coten gartref yn erbyn y Drenewydd nos Wener diwethaf mae Aberystwyth yn teithio i Sir y Fflint i wynebu Airbus, eu partneriaid ar waelod y tabl.

Mi fyddan yn gwybod eu bod wedi curo Airbus dair gwaith y tymor yma, gartref ac oddi cartref unwaith.

Gan fod Luke Sherbon wedi derbyn cerdyn coch fydd y capten ddim ar gael i ymweld â Brychdyn.

Mae’r rheolwr Matthew Bishop yn gobeithio y gallan nhw chwarae’n well hebddo nag a wnaethon nhw wrth golli 0-4 i’r Drenewydd.

Gêm arall y Sadwrn yw Caerfyrddin yn erbyn Gap Cei Connah, fydd yn bnawn anodd arall i dîm Mark Aizlewood.

Yr wythnos hon eto mae gêm dydd Sul, yn y Drenewydd y tro yma pan fydd Llandudno yn ymweld.

Maen nhw ddau bwynt ar ôl tim Chris Hughes.

Gemau Rhagbrofol Cwpan y Byd Cymru yn fyw ar S4C

2017-03-08T00:00:00+1:00

Gyda thîm pêl-droed Cymru yn brwydro i gyrraedd Cwpan y Byd 2018 yn Rwsia, bydd S4C yn dangos gweddill gemau Cymru yn yr ymgyrch ragbrofol yn fyw, o 24 Mawrth ymlaen.

Bydd gweddill gemau Cymru ar gael i'w gweld ar deledu daearol, yn rhad ac am ddim drwy gyfrwng y Gymraeg, a hynny wedi i'r sianel ddod i gytundeb gyda deiliaid y drwydded swyddogol a'r prif ddarlledwyr yn y Deyrnas Unedig ac Iwerddon, Sky Sports.

Dylan Ebenezer fydd yn arwain y tîm cyflwyno, gyda Nic Parry a Malcolm Allen yn y pwynt sylwebu, a'r cyn chwaraewyr Cymru Owain Tudur Jones a Dai Davies yn dadansoddi'r gemau. Rondo Media fydd yn cynhyrchu'r rhaglenni.

Y gêm gyntaf fydd yn cael ei dangos ar S4C yw'r un hollbwysig oddi cartref yng Ngweriniaeth Iwerddon nos Wener, 24 Mawrth.

Yng Ngrŵp rhagbrofol D, bydd Cymru hefyd yn teithio i herio Serbia ddydd Sul, 11 Mehefin, cyn gêm gartref yn erbyn Awstria ddydd Sadwrn, 2 Medi, a gêm oddi cartref ym Moldofa ddydd Mawrth, 5 Medi. Bydd tîm Chris Coleman yn wynebu taith i Georgia ddydd Gwener, 6 Hydref, cyn dod â'r ymgyrch i ben gyda gêm gartref yn erbyn Gweriniaeth Iwerddon ddydd Llun, 9 Hydref.

Mae S4C ar gael ar bob llwyfan yng Nghymru ac ar Sky, Freesat a Virgin Media ar draws y Deyrnas Unedig. Bydd gwylwyr Sky a Freesat yn gallu gwylio'r gemau mewn HD.

Dywedodd Comisiynydd Chwaraeon S4C, Sue Butler: "Rydym yn falch iawn mai ni yw'r unig ddarlledwr sy'n dangos gemau Cymru yn rhad ac am ddim yn rowndiau rhagbrofol Cwpan y Byd 2018. Mae'n bleser gallu dilyn y tîm gyda gemau byw ar S4C unwaith eto, o gofio holl gyffro gorchestion tîm Chris Coleman yn Euro 2016."

Fe fydd S4C yn lansio ymgyrch aml-lwyfan drawiadol i hyrwyddo’r rhaglenni byw o gemau Cymru yng ngemau rhagbrofol Cwpan y Byd. Mae'r ymgyrch, o'r enw 'Ymunwch â’r Wal Goch', yn dathlu sut mae llwyddiant tîm pêl-droed Cymru wedi dal dychymyg pobl ledled Cymru.

Bala yw’r cyntaf i wynebu’r pencampwyr cynnar

2017-03-07T00:00:00+1:00

Unwaith yr oedd y Bala wedi methu ennill y noson cynt roedd yn eithaf pendant mai’r Seintiau Newydd fyddai’n codi cwpan y pencampwyr am y chweched tro yn olynol.

Maen nhw wedi ei gwneud hi ar ddechrau Mawrth wrth sgubo Bangor o’r neilltu o flaen torf o 232.

Dau gant tri deg a dau i glwb llwyddiannus sy’n torri recordiau; mae hon yn record ynddi’i hun fod cyn lleied â diddordeb yn eu campau.

Fodd bynnag, fel’na mae hi a chriw Park Hall o’r perchennog i lawr sydd biau’r clod a’r bri heb lawer o barch i’w cefnogwyr prin.

Mae’r clwb o’r ochr draw i’r ffin yn cynrychioli Cymru yn Ewrop unwaith eto ac am gael sleisen golew o euros i’w helpu i gynnal eu hunain am dymor arall.

Chwech o gêmau sydd ar ôl yn yr Uwch Gynghrair i’r gweddill o’r clybiau ddangos eu hôl.

Mae’r Bala yn dal yn ail, ugain pwynt tu ôl i’r Seintiau a chwech ar y blaen i Gap Cei Connah ac wyth o flaen Bangor.

Mi fethodd bechgyn Maes Tegid ac ychwanegu mwy nag un pwynt at eu cyfanswm nos Wener diwethaf wrth i’r tîm o Gei Connah unioni’r sgôr wrth i’r gêm ddod i ben.

Mae gan y Bala tan bnawn Sul cyn chwarae y tro hwn a nhw fydd yn erbyn y pencampwyr bryd hynny.

Hwn fydd y prawf i weld os bydd yr awydd i ennill yn dal yng nghoesau’r tîm gwyn a gwyrdd a hwythau yn Ewrop yn barod. Doedd eu rheolwr ddim am golli dim un gêm, meddai, wrth siarad efo Nicky John ar Sgorio ar ôl y llwyddiant yn erbyn Bangor.

Does neb wedi eu curo yn Park Hall y tymor hwn. Siawns na all yr ail dîm wneud rhywbeth ohoni a dangos eu bod yn medru cystadlu gyda’r goreuon. Mi fydd yn andros o anodd i’r Bala a phe baen nhw’n cael gêm gyfartal arall mi fyddai hynny’n bluen yn eu cap.

Mi fyddan yn gwybod beth fydd sgôr Gap Cei Connah yn erbyn MET Caerdydd cyn dechrau chwarae.

Pe bai Gap yn ennill mi fyddai hynny’n sbardun ychwanegol i’r Bala i gadw ar y blaen iddyn nhw.

Os bydd hynny’n digwydd – a’r Bala’n colli – dim ond tri phwynt fydd rhwng y ddau glwb wedyn.

Ac mi all fod yn ddiddorol iawn yn ystod y pum gêm sy’n weddill y tymor hwn.

Y tro diwethaf i MET fod yng Nghei Connah gêm ddi-sgôr oedd hi er i dîm Andy Harrison ennill yng Nghaerdydd cyn hynny.

Mi lwyddodd y myfyrwyr i gael gêm gyfartal 2-2 efo Caerfyrddin y Sadwrn diwethaf ac mae digon o allu ynddyn nhw i wneud yr un peth eto yn y gogledd.

Gartref i Fangor y mae Caerfyrddin y Sadwrn hwn.

Gyda nifer o chwaraewyr Bangor yn absennol mae’n bosib iawn y gall yr Hen Aur gael tri phwynt o hon, fel y gwnaethon nhw y tro diwethaf iddyn nhw ymweld â Bangor.

Mae hi’n edrych yn fwy tebygol y bydd yn rhaid i’r Dinasyddion setlo am y pedwerydd safle yn y tabl gan fod gêmau yn erbyn y Bala a’r Seintiau eto i ddod.

Gweddill y gêmau yw:
Nos Wener: Aberystwyth v Y Drenewydd; Airbus v Derwyddon Cefn; Llandudno v Y Rhyl.

Yr ail a’r trydydd yn mynd amdani ym Maes Tegid

2017-03-03T00:00:00+1:00

Rhannu y mae’r gêmau y tro hwn rhwng nos Wener a dydd Sadwrn. Mae’r ddau glwb sy’n ail a thrydydd yn y tabl ymhlith y gornestau cyntaf, ac yn y Bala y bydd honno. Ac o Gei Connah y daw’r ymwelwyr, y clwb gafodd drafferth mawr yn dofi Prestatyn yng Nghwpan Cymru.

Mae tîm Andy Harrison chwe phwynt ar ôl clwb Maes Tegid a heb gael yr hwyl orau arni yn ddiweddar, tra mae’r Bala wedi ffynnu. Dydy Gap Cei Connah ddim wedi ennill eu tair gêm ddiwethaf yn y cynghrair, colli dwy a chyn hynny cael gêm ddi-sgôr yn y Bala. Cael a chael oedd curo Prestatyn a hithau wedi mynd i giciau o’r smotyn.

Ar y llaw arall mae bechgyn Colin Caton yn ennill eu gêmau ac wedi mynd i Gaerfyrddin a churo lle collodd y Seintiau gêm gyntaf y tymor yr wythnos cynt. Mi lwyddodd y Bala i sodro Cegidfa y Sadwrn diwethaf yn y cwpan hefyd a dod oddi yno wedi sgorio tair.

Mi all fod yn anos iddyn nhw y nos Wener yma ym Maes Tegid. Mae digon o allu yn y tîm o’r Cei i’w cadw’n dawel ond mae’n bosib y bydd rhediad diweddar y Bala yn eu cynnal nhw i fynd am fuddugoliaeth y tro yma. Ar y gorwel mae ganddyn nhw gêm yn erbyn Caernarfon yn rownd gyn-derfynol Cwpan Cymru a’r Cofis wedi rhoi cot a hanner i Llanfair Utd yn Llanfair Caereinion y Sadwrn diwethaf – 0-7 oedd hi yn erbyn tîm o’r un gynghrair.

Gan y Cei y mae’r gwaith pleserus o wynebu’r pencampwyr yn rownd derfynol y cwpan. Awgrym efallai y bydd y Seintiau yn y ffeinal eto eleni.

Dwy gêm arall nos Wener yw y Rhyl yn erbyn Aberystwyth a Llandudno yn wynebu Derwyddon Cefn, gemau pwysig i’r pedwar clwb.

Mae’r tair gêm arall y Sadwrn hwn ac un o’r rheiny ar Sgorio. Am yr ail Sadwrn yn olynol mae Bangor yn ôl yn Park Hall, wedi colli yno yng Nghwpan Cymru wythnos yn ôl. Mi wnaethon nhw gryn gamp yn cadw’r Seintiau Newydd i gêm ddi-sgôr erbyn diwedd y gêm. Mi aethon nhw ar y blaen yn yr amser ychwanegol – efo deg dyn – ond colli 2-1 yn y diwedd.

Sawl un o’u chwaraewyr fydd ar gael iddyn nhw yr wythnos hon wedi cerdyn coch ac anafiadau yw’r cwestiwn. Fydd hyn ddim yn pryderu dim ar y Seintiau sy’n gobeithio ail-ddechrau ennill yn y gynghrair unwaith eto. Mi ddalian i gadw’r gaer rhag ei bylchu mae’n siŵr.

Mae MET Caerdydd yn cael chwarae gartref am unwaith a’r Hen Aur yn ymweld. Y rhain yw gelynion y myfyrwyr ers y rhaniad ac mae Caerfyrddin driphwynt ar y blaen yn y tabl. Pan oeddan nhw yno y tro diwethaf ar ddiwrnod ola’r flwyddyn mi enillodd tîm Mark Aizlewood 1-3 a mynd ymlaen wedi hynny i aros yn yr hanner uchaf.

Mi fydd hi yr un mor gystadleuol y tro hwn ac mae’n ddigon posibl y bydd Caerfyrddin yn rhy gryf iddyn nhw.

Y clwb sydd ar y gwaelod fydd yn y Drenewydd. Mae’n debyg iawn y bydd tîm Chris Hughes yn ormod i Airbus er iddyn nhw golli iddyn nhw y tro diwethaf y daethon nhw yno. Mae’r Drenewydd wedi cael ailwynt ers hynny.

Bangor i ymdrechu i roi’r drydedd gweir i’r Seintiau

2017-02-23T00:00:00+1:00

O leia’ fydd y Seintiau Newydd ddim yn ennill pedwar teitl eleni. Mi aethon nhw allan o gwpan Irn-Bru heb ennill fawr o glod, na pharch na bri. Doedd St Mirren ddim am adael iddyn nhw gamu i’r ffeinal ac roedd ail hanner y gêm yn wers i’r tîm o Park Hall: mae meistr ar Mistar Mostyn.

Mewn hanner cyntaf braidd yn ddi-batrwm mi wnaethon nhw lwyddo i gadw sosban St Mirren rhag codi i’r berw a chafwyd perl o gôl gan Ryan Brobbel. Ond yn unol â’r hen ddisgrifiad, gêm o ddau hanner oedd hon. Roedd yr Albanwyr wedi cael ffon ar eu cefnau yn yr egwyl a phregeth sut i fynd ati i ennill y gêm. Doedd y Seintiau ddim ynddi ac os oedden nhw’n mynd ymlaen roedd chwaraewyr St Mirren yn ôl amdanyn nhw. Wedi i Stephen McGinn sgorio’r gôl gyntaf, oedd yn rhagori ar un Brobbel, doedd dim troi’n ôl.

Pan gafodd yr Albanwr Steven Saunders gerdyn coch mi aeth o ddrwg i waeth i’r Seintiau. Ac mi gafodd eu gwrthwynebwyr y bedwaredd gôl cyn y diwedd i gloi pnawn o ddiflastod iddyn nhw.

Y rhai hapusaf wrth weld tîm Croesoswallt yn tuchan a thagu oedd y rhai fydd yn eu wynebu y Sadwrn hwn. Rownd wyth olaf Cwpan Cymru yw hi y tro hwn a Bangor sy’n ymweld â Park Hall. Mi fyddan nhw’n cofio fod y Seintiau wedi colli eu dwy gêm ddiwethaf, Caerfyrddin a fraenarodd y tir i St Mirren.

Ai Bangor fydd y trydydd clwb i’w curo mewn tair wythnos? Dyw’r Dinasyddion ddim wedi curo yn Park Hall ers Tachwedd 2011. Ers hynny mae’r clwb wedi taro’r gwaelodion bron cyn cael gafael ynddi unwaith eto y tymor hwn a hanner bygwth bod ymhlith y tri cyntaf yn yr Uwch Gynghrair.

Mi fyddai’r chwaraewyr yn y crysau gleision y cyntaf i gyfaddef na fyddan nhw’n medru curo’r Seintiau os byddan nhw’n gwanhau cymaint yn yr ail hanner ag y gwnaethon nhw y Sadwrn diwethaf. Yn yr hanner cyntaf yn erbyn MET Caerdydd roeddan nhw ar dân, yn sgorio tair yn weddol rhwydd.

Stori wahanol oedd hi yn yr ail hanner a’r myfyrwyr yn codi stêm a sgubo Bangor o’r neilltu. Mi gawson nhw ddwy gôl ymhen dim ac roedd pob arwydd y bydden nhw’n cael rhagor. Oni bai am golwr Bangor mi fydden nhw wedi dod yn gyfartal.

Anodd iawn yw gweld y tim o Nantporth yn ennill yn erbyn y Seintiau, a’r newydd drwg yw y byddan nhw’n ôl yno yr wythnos wedyn yn eu gêm gynghrair nesaf.

Dewis mynd i Brestatyn i weld y gêm gwpan yn erbyn eu hen elynion, Gap Cei Connah, y mae Sgorio. Dyw’r clwb a ddisgynnodd o’r Uwch Gynghrair ddau dymor yn ôl ddim wedi colli gêm yn y Gynghrair Undebol y tymor hwn. Maen nhw wedi bod yn ergydio goliau wrth y llath hefyd.

Mae hon yn ddewis da i’w dangos gan fod Prestatyn yn gwneud cymaint o argraff yn yr Huws Gray a Cei Connah wedi cloffi ychydig yn eu gêmau diwethaf a gadael y Bala neidio i’r ail safle yn nhabl yr Uwch Gynghrair. Mi allwn ddisgwyl dipyn o hwyl yn hon.

Y Bala yw’r unig glwb arall o’r Uwch Gynghrair sy’n dal ar ôl yn y Cwpan. Maen nhw yng Nghegidfa, eto o’r Gynghrair Undebol a’r clwb o’r pentref ger y Trallwng wedi trechu MET Caerdydd i gyrraedd yr wyth olaf. Mi fydd y Bala yn fwy o her iddyn nhw, yn enwedig am y bydd eu cynffonnau i fyny ers y Sadwrn diwethaf wedi curo Caerfyrddin.

Mae gan Gaernarfon daith i Lanfair Caereinion gan obeithio y bydd y lwc a gawson nhw yn erbyn y Rhyl yn y rownd ddiwethaf yn para.

Prawf arall i glwb o’r Uwch Gynghrair ar yr Oval

2017-01-27T00:00:00+1:00

CYN mynd am ail hanner y tymor mae clybiau’r Uwch Gynghrair yn cystadlu ym mhedwaredd rownd Cwpan Cymru yr wythnos hon. Roedd un gêm i fod y Sadwrn diwethaf rhwng Llanfair Utd a Derwyddon Cefn ond cafodd ei gohirio. O’r saith sy’n weddill mae Sgorio S4C wedi dewis y gêm rhwng Caernarfon a’r Rhyl.

Yn barod mae clwb yr Oval wedi curo un o dimau’r gynghrair uwch eu pennau, Caerfyrddin. Gartref oedd honno hefyd gyda thîm tref y Cofis yn mynd amdani ac yn rhoi bechgyn Mark Aizlewood yn eu lle. Mi aethon nhw’n ôl am y de a’u cynffonnau rhwng eu coesau wedi colli 3-1.

Mi fydd yn rhaid i’r Rhyl fod yn barod am gêm galed hefyd y Sadwrn hwn. Amrywiol yw’r tymor wedi bod iddyn nhw, iselfannau ac uchelfannau er mis Awst. Pan oedden nhw’n chwarae ddiwethaf roedd ganddyn nhw ddigon o allu i rwystro Llandudno er iddyn nhw ildio gôl yn y diwedd i wneud y sgôr yn 2-2.

Yn y rownd ddiwethaf mi drechodd y Rhyl Benrhyncoch o’r un gynghrair â Chaernarfon. Yr unig wahaniaeth yw fod y Penrhyn yn agos i waelod tabl yr Huws Gray a Chaernarfon yn ail. Ond gyda chwaraewyr fel Toby Jones a Carl Lamb mae gan y Cofis ddigon ar eu plât. Mi ddylai fod yn gêm ddifyr a phrawf pellach i’r Uwch Gynghrair fod yn bosib i rai clybiau ddenu digon o dorf.

Prestatyn sydd ar y blaen i Gaernarfon yn nhabl y Gynghrair Undebol. Yn Aberystwyth y byddan nhw ac yn gwybod yn dda am Goedlan y Parc wedi chwarae digon yno yn yr Uwch Gynghrair. Does wybod beth fydd Aber yn ei feddwl wrth weld fod tîm Neil Gibson wedi sgorio 24 o goliau y mis yma, 18 ohonyn nhw oddi cartref.

Roedd hi’n 1-11 yng Nghonwy ac 1-7 yn Rhuthun y Sadwrn diwethaf. Mae hynny’n awgrymu fod gan Aberystwyth ddiwrnod a hanner o’u blaenau a bod Prestatyn a’u golygon ar godi’n ôl i’r Uwch Gynghrair. Tymor braidd yn bethma mae Aber wedi’i gael a cholli gartref 0-2 a wnaethon nhw ddiwethaf yn erbyn Met Caerdydd. Mae’r gêm yn dechrau am 1.30.

Felly mae hi ym Mangor hefyd wrth i Landudno ymweld. Goetre FC oedd i fod yno ond mi gawson nhw eu torri o’r gystadleuaeth am chwarae aelod oedd heb gofrestru yn erbyn Llandudno yn y rownd ddiwethaf. Colli a wnaethon nhw yn Nantporth dros y Nadolig er iddyn nhw droi’r byrddau yr wythnos wedyn. Wrth fod ambell newid wedi digwydd ym Mangor ers hynny mae’n anodd gwybod a fyddan nhw’n ddigon cryf i oroesi yn erbyn Llandudno y tro yma.

Hen enw o’r Uwch Gynghrair sydd yn Park Hall. Pa obaith fydd gan Llanelli Town pan fethodd y Barri y Sadwrn diwethaf? Mi roddodd bechgyn Parc Jenner dipyn o gêm i’r Seintiau am 78 munud yn ffeinal Cwpan y Gynghrair ond wedi sgorio un mi ddaeth tair arall yn weddol rwydd wedyn. Beth a ddaw o’r tîm a gurodd Ynysgerwn 5-1 yn y drydedd rownd?

Un arf sydd ganddyn nhw yw Lee Trundle, un o ffefrynnau’r Uwch Gynghrair cyn iddi ymuno â Wrecsam ac Abertawe.

Mi fydd yn ddifyr gweld sut bydd yr hen goesau deugain oed yn dal yn erbyn cryfder y Seintiau. Ar ddechrau’r tymor i Lanelli mi sgoriodd hatric. Mi fyddai un yn wyrth y tro hwn.

Y gêmau eraill yw y Bala v Penybont (2.30); Hwlffordd v Gap Cei Connah (2.30) a Cegidfa (Guilsfield) v Met Caerdydd (2.30).

Gôl Jamie Price yn y rhwyd a’r llyfrau hanes

2017-01-16T00:00:00+1:00

CYN mynd am eu cwpan cyntaf eleni mi gafodd y Seintiau Newydd siglad i’w gofio. Yn y gêm olaf cyn y rhaniad, a thîm Craig Harrison wedi hwylio mor ddeheuig drwy bob gornest hyd yma, mi ddaeth un o glybiau’r gwaelod i’w hatal.

Wnaeth y Drenewydd mo’i curo ym Mharc Latham ond mi ddaethon nhw’n gyfartal yn eiliad olaf y gêm. Jamie Price a’i gwnaeth hi’n 3-3 ac mi fydd ei enw yn mynd i lawr yn y llyfrau hanes am rwystro’r Seintiau Newydd rhag ennill 28 o gêmau heb golli, er bod eu henw yn llyfr Recordiau Guinness wedi cyflawni’r gamp o guro 27 o weithiau.

Canolwr 29 oed yw Jamie Price yn chwarae yn gefnwr chwith. Roedd hi’n 94 munud ar y cloc pan gawson nhw gic rydd bum llath ar hugain o’r gôl. I mewn â hi cyn i’r chwiban fynd a Jamie a phawb arall ond carfan y Seintiau wedi gwirioni. Mae o wedi digwydd ddigon o weithiau i ni y tymor yma, meddai’r sgoriwr, ac mae’n braf ei weld yn digwydd i TNS.

Wedi dechrau ei yrfa yn Cheltenham mae’r Cymro wedi chwarae i Birmingham City a chwarae i dimau Cymru dan wahanol oed. Yn 2015 daeth yn ôl i’r Drenewydd wedi ymuno â nhw gyntaf yn 2011. Ei droed chwith, fel y profwyd, yw ei arf gorau.

Er iddyn nhw gael gystal gêm, a hwythau 1-3 i lawr wyth munud o’r diwedd, dyw’r 3-3 ddim yn golygu eu bod wedi codi’n uwch yn y tabl. Mae’r Drenewydd yn dal yn ail o’r gwaelod am fod Derwyddon Cefn wedi cadw Caerfyrddin i gêm gyfartal ddi-sgôr, ac yn cael pwynt fel tîm Chris Hughes.

Mi fydd hanner nesaf y tymor yn help i’r ddau glwb gael gwell gafael ar bethau. Mae’r ddau yn medru chwarae’n dda ac fel Airbus, sydd ar waelod y tabl, mi ddylen gystadlu yn erbyn unrhyw un o’r chwech isaf.

Caerfyrddin a’i gwnaeth hi i’r hanner uchaf gan i Landudno fethu cael y gorau ar y Rhyl a gadwodd y sgôr yn 2-2. Tîm Alan Morgan sydd ar ben ail hanner y tabl ac Aberystwyth dri phwynt ar eu holau wedi colli gartref i Met Caerdydd 0-2. Roedd Aber wedi colli un chwaraewr y Sadwrn cynt pan ddaeth yr heddlu i nôl Lee Healy a mynd â’r gŵr oedd newydd ymuno â nhw o Dreffynnon i’r carchar. Roedd wedi torri amodau’r llys yn erbyn cyn-bartner.

Doedd dim amheuaeth y byddai Bangor yn cadw’u lle yn yr hanner uchaf ond mi aethon nhw i Frychdyn a chael cweir 4-2 gan y tîm sydd ar waelod y tabl. Mae angen i’r Dinasyddion wella os ydyn nhw am fynd am Ewrop. Gap Cei Connah sy’n dal yn ail a’r Bala’n drydydd wedi gêm ddi-sgôr.

Y Sadwrn hwn yr unig gêm yw honno yn ffeinal Cwpan y Cynghrair, neu Cwpan Nathaniel fel mae’n cael ei galw eleni. Y Seintiau Newydd sydd wrthi yn erbyn y Barri, un o glybiau llwyddiannus Uwch Gynghrair Cymru am rai blynyddoedd.

Hwn fydd y tro cyntaf er 2003 iddyn nhw fod mewn ffeinal cwpan genedlaethol.

Fyddan nhw ddim yn gorfod teithio’n bell oherwydd ei bod yn cael ei chynnal ar faes Met Caerdydd yng Nghyncoed. Mae hi’w gweld ar Sgorio.

Mi fyddai’n braf eu gweld yn cael eu henwau ar y cwpan. Am newid.

'Safon Uwch Gynghrair Cymru wedi gwella ers i glybiau osod caeau 3G' – Malcolm Allen

2017-01-09T00:00:00+1:00

Mae safon y chwarae yn yr Uwch Gynghrair Cymru Dafabet wedi codi ers i glybiau ddechrau gosod caeau 3G, meddai’r cyn chwaraewr Cymru a sylwebydd Sgorio Malcolm Allen.

Mae’r cyn ymosodwr, a chwaraeodd dros Watford, Norwich a Newcastle United yn ei yrfa, wedi bod yn rhan o dîm Sgorio ers i’r gyfres boblogaidd ddechrau dangos gemau o’r gynghrair genedlaethol yn 2008.

Bydd Sgorio yn dychwelyd i'r sgrin ddydd Sadwrn 14 Ionawr, wrth ddangos gêm Derwyddon Cefn v Caerfyrddin yn fyw o’r Graig, gêm allweddol yn y ras am le yn y chwech uchaf ar gyfer ail hanner y tymor.

Gallwch hefyd ddilyn holl ganlyniadau’r diwrnod a chael rhagolwg i’r gêm, wrth wylio gwasanaeth ar-lein Sgorio am 4.30 ar s4c.cymru/sgorio.

Dywedodd Malcolm Allen, sy'n hanu o Ddeiniolen: "Mae caeau 3G wedi gwneud gwahaniaeth mawr i’r gynghrair.

"Mae’r gemau yn cael eu chwarae ar dempo uwch ac yn fwy cyffrous, ac mae’r academi yn cael defnydd allan ohonyn nhw hefyd.

"O’r blaen, roedd gemau yn cael eu gohirio, ond erbyn rŵan dyw hynny ddim yn digwydd cymaint.

“Y ddau gam dw i’n edrych ymlaen at eu gweld nesaf, ydi tîm yn cyrraedd rownd y grwpiau yn Ewrop - dw i’n meddwl fod hyn yn fater o amser wrth i’r gynghrair gryfhau – a gweld clybiau yn cyflogi rheolwyr yn llawn amser, i helpu dod â’r clwb yn agosach at y gymuned a’r academi.”

Mae Allen yn credu dylai fod fwy yn cael ei wneud i atal clybiau mawr Lloegr rhag denu chwaraewyr ifanc o Gymru.

“Efo’r strwythur academi sydd gyda’r clybiau, dw i’n gobeithio bydden ni’n cynhyrchu mwy o chwaraewyr ifanc yn y blynyddoedd nesa’.

"Swn i’n cael fy ffordd fyddai chwaraewyr academi ddim yn cael gadael Cymru nes bod nhw’n troi’n 18, oherwydd ar y funud mae clybiau o Loegr yn arwyddo nhw’n ifanc.

"Mae rhai ohonyn nhw’n cael eu rhyddhau gan y clybiau yn 18 neu 19 oed, ac mae rhai yn rhoi’r gorau i bêl-droed achos fod nhw ddim yn meddwl bod nhw’n ddigon da.

“Ond rŵan, mae gennym ni gynghrair efo meddylfryd proffesiynol, o ran hyfforddiant, ac mae gan y chwaraewyr ifanc gyfle i chwarae dros glybiau’r Uwch Gynghrair.

"Mae’n waith rhan amser ond yn ennill arian da. Fyddai hynny wedyn yn helpu codi safon y gynghrair unwaith eto.”

Nid yn unig y mae’r safon yn codi ar y meysydd, ond oddi arnynt hefyd, yn ôl Malcolm.

“Mae Sgorio wedi bod yn dangos gemau’n fyw ers 2008, ac un bob wythnos am y pum mlynedd diwethaf, ac mae hynny wedi bod yn hwb fawr.

"Mae’n codi proffil y gynghrair ac yn gwneud iddo edrych yn broffesiynol, felly mae mwy o bobl yn trin y gynghrair yn fwy o ddifri.

"Mae gennyt ti bobl fel Owain Tudur Jones, Osian Roberts a Dai Davies, sydd wedi chwarae a hyfforddi ar y lefel ryngwladol, i ddadansoddi’r gemau. ‘Da ni byth yn sefyll yn llonydd yn Sgorio, da ni wastad yn ceisio dysgu mwy a gwella.”

Sgorio
Bob Dydd Sadwrn, 5.00, a bob Dydd Llun, 6.30
Rhaglen canlyniadau ar-lein ar www.s4c.cymru/sgorio, bob dydd Sadwrn, 4.30
Ar gael ar alw ar s4c.cymru, BBC iPlayer a llwyfannau eraill
Isdeitlau a Sylwebaeth Saesneg
Cynhyrchiad Rondo Media ar gyfer S4C

Abertawe yn diswyddo Bradley

2016-12-28T00:00:00+1:00

Abertawe …… 1 West Ham ……. 4

YN fuan wedi’r egwyl yn Stadiwm Liberty prynhawn dydd Llun, trodd yr awyrgylch yn wenwynig wrth i’r Elyrch ildio ail gôl a nifer sylweddol o gefnogwyr yn galw am y cyfle i ailfeddiannu “ein clwb”.

Neges hollol ddi-flewyn-ar-dafod i’r perchnogion newydd o’r UDA oedd y floedd yn taranu o gwmpas yr eisteddleoedd a rhai yn galw am weld y cadeirydd, Huw Jenkins, yn gadael a throsglwyddo’r swydd i rywun arall na fyddai am elwa’n bersonol.

Doedd hi ddim yn rhyfeddod, felly, pan gyhoeddwyd nos Fawrth bod Abertawe wedi diswyddo Bob Bradley wedi ond 85 diwrnod fel rheolwr a chronni 8 pwynt yn unig o’r 33 posib yn ystod ei deyrnasiad.

Y cwestiwn amlwg i’w ofyn nawr yw: Pam ar y ddaear y perswadiwyd Jenkins i gydsynio gyda pherchnogion newydd y mwyafrif o gyfranddaliadau’r clwb, Jason Levien a Steve Kaplan, i apwyntio’u cyd-Americanwr yn rheolwr?

Mae’n rhaid cydnabod y gwaith ardderchog a gyflawnodd Jenkins a’i gyd-gyfarwyddwyr dros y dwsin o flynyddoedd diweddar, yn codi’r clwb o waelodion y cynghreiriau i entrychion Uwch Gynghrair Lloegr a gosod esiampl i eraill wrth gadarnhau lle ymhlith mawrion y gamp.

Erbyn hyn, fodd bynnag, mae’n amlwg bod yr adeiladwaith cadarn yn fregus ac mewn perygl o ddymchwel hyd yn oed ar ôl cydnabod y camsyniad o apwyntio Bradley i swydd a oedd y tu hwnt i’w allu a’i brofiad

Yn sgîl dyfodiad y ddau “fuddsoddwr” newydd, dydy clwb pêl droed Abertawe ddim wedi datblygu yn y modd y byddai’r cefnogwyr wedi gobeithio a’r teimlad yn eu plith yw bod Jenkins a’i gyd-gyfarwyddwyr wedi bradychu’r ethos fu’n rhan o’u strwythur dros y blynyddoedd diweddar.

Yn ddiamau, mae’r safonau chwarae wedi gostwng wrth werthu chwaraewyr dawnus cyn y methiant i ddenu chwaraewyr da yn eu lle i Dde Orllewin Cymru, ac mae “dull Abertawe” o chwarae wedi diflannu yn dilyn y cyfnod mwyaf llewyrchus yn eu hanes.

Ar ôl ildio 25 gôl yn eu 10 gornest ers i Bradley gymryd at yr awenau, roedd hi’n amlwg fod `na rhywbeth mawr o’i le, naill ai yng ngallu’r rheolwr i drwytho’r chwaraewyr mewn dull effeithiol o amddiffyn neu mae’r chwaraewyr eu hunain yn anobeithiol o wael.

Yn ôl yr hyn a welwyd yn erbyn West Ham, mae `na ddiffygion amlwg i’w gweld ymhlith y mwyafrif o chwaraewyr Abertawe ac roedd methiant y rheolwr i weld y diffygion ac i’w dileu yn arwain yn anochel at gredu bod cyfnod y clwb yn yr Uwch Gynghrair yn dirwyn i ben.

Oes, mae rhaid cydnabod i’r unig chwaraewr o wir safon uchel gyda’r clwb, Gylfi Sigurðsson, ddod yn agos at sgorio ddwywaith ac, oni bai am arbediad amserol gan golwr y Morthwylion, Darren Randolph, byddai cic rydd y chwaraewr o Ynys yr Iâ wedi dod â’r sgôr yn gyfartal cyn yr egwyl.

Yn anffodus, sgoriodd cyn-chwaraewr yr Elyrch, André Ayew, o fewn y chwarter awr cyntaf yn dilyn sawl methiant ar ran yr amddiffynwyr a’r cyfan y gallai Lukasz Fabianski ei wneud oedd llawio’r bêl at draed chwaraewr rhyngwladol Ghana.

Methiant llwyr fu cyfarwyddyd Bradley yn ystod yr egwyl, wrth i West Ham ddyblu eu mantais o fewn pum munud i’r ailgychwyn a llawer yn y dorf wedi eu synnu o weld Fernando Llorente a Jefferson Montero yn ymddangos ar ddechrau’r ail hanner ar ôl treulio’r 45 munud cyntaf ar fainc yr eilyddion.

Rhoddwyd y ffugenw “tinkerman” ar Claudio Ranieri pan yn rheolwr ar Chelsea rai blynyddoedd yn ôl am iddo newid y tîm mor aml; roedd hi’n ymddangos bod Bradley yn cuddio’i lygaid gyda mwgwd a sticio pin yn rhywle yn rhestr y chwaraewyr a gobeithio am y gorau wrth ddewis ei dîm.

Erbyn i Llorente sgorio gôl gysur ar 88 munud, roedd Winston Reid wedi hen ddyblu sgôr West Ham a Michail Antonio wedi ychwanegu trydedd ac, yn ôl ei arfer, sgoriodd Andy Carroll funud wedi unig gyfraniad yr Elyrch.

Roedd hi’n anochel yn dilyn y fath ganlyniad y byddai Bradley yn gadael a’r gobaith nawr yw y gall Alan Curtis a Paul Williams arwain y tîm at lwyddiant yn erbyn Bournemouth ddydd Sadwrn.

Os na ddaw triphwynt i godi calonnau’r cefnogwyr, bydd yr awyrgylch ar lan yr Afon Tawe yn fwy gwenwynig fyth, nid yn erbyn y ddau hyfforddwr, ond yn erbyn Jenkins a’i gamgymeriad yn denu’r Americanwyr i’r clwb.

Llun: Bob Bradley

Gŵyl San Steffan – gemau i geisio chwyddo’r torfeydd gwan

2016-12-22T00:00:00+1:00

UN peth y mae’r clybiau yn gobeithio y daw’r Nadolig iddyn nhw yw gwell giât.
Wrth edrych ar nifer y dorf ymhob gêm y tymor hwn mae’r ffigurau’n siomedig tu hwnt.

Fydd Gwyn Derfel, ysgrifennydd yr Uwch Gynghrair ddim yn hapus â hynny nag unrhyw un arall sy’n ymwneud â hi, na’r 12 clwb sydd ynddi.

Roedd y Rhyl yn arfer codi’r ffigurau i wneud iawn am lefydd llwm fel Park Hall a Brychdyn. Erbyn hyn mae’r gefnogaeth i’r Claerwynion wedi dirywio i rhyw dri chant ar y mwyaf. Ychydig flynyddoedd yn ôl roedden nhw’n cael torf well na neb oedd yn anelu am y 1,000.

Mae’r clwb arall oedd yn denu – Bangor – wedi colli cefnogwyr yn arw y tymor yma.

Roedd 600 yn arfer bod yn dorf arferol. Y Sadwrn diwethaf roedd dan 400 ac ychydig dros hynny yw hi wedi bod yn ddiweddar. Er bod y tîm yn gwneud yn well eleni i lawr yr aeth y gefnogaeth. Nosweithiau Gwener yn unig sy’n achub y ffigurau yma ac acw erbyn hyn, ac agor y caeau carped.

Cafodd torfeydd gweddol dda eu denu i’r Bala ac Aberystwyth y noson gyntaf i’r timau chwarae ar y 3G.

A fydd Gŵyl San Steffan yn rhyw fath o achubiaeth iddyn nhw ar ddiwedd blwyddyn fel yma? Darbis lleol yw’r gêmau dydd Llun, a dydd Calan, os yw’n bosib galw Caerfyrddin yn erbyn Met Caerdydd yn ‘lleol’. Hon yw’r gêm lle mae’r timau bellaf oddi wrth ei gilydd. Mae’n un sy’n addo’n dda hefyd.

Yn un peth dydyn nhw ddim wedi cyfarfod o’r blaen yn yr Uwch Gynghrair. A’r peth arall yw eu bod yn bumed a chweched yn y tabl, Met bedwar pwynt ar y blaen i’r Hen Aur.

Mi enillodd y ddau glwb y Sadwrn diwethaf, Caerfyrddin yn rhoi cweir 5-0 i’r Rhyl a Met Caerdydd yn teithio i’r Drenewydd i’w curo 0-1.

Allai neb ddymuno gwell wrth feddwl am y gêm dydd Llun, dau dîm sydd ar i fyny ac sy’n awchu i fod yn hanner uchaf y tabl pan ddaw’r gwahanu y mis nesaf. Mi ddylai Met ennill hon.

Y nhw yw Llandudno y tymor yma, y newydd-ddyfodiaid sy’n gwneud argraff.

Dyw’r ail dymor ddim wedi bod cystal i dîm Brenhines y Glannau. Colli 3-0 a wnaethon nhw ym Maes Tegid y Sadwrn diwethaf, wedi colli yn eu herbyn gartref y mis diwethaf.

Mi gawson nhw’r gorau ar Gaerfyrddin sydd un pwynt ar y blaen iddyn nhw erbyn hyn, ond yn y seithfed safle y maen nhw.

Ym Mangor y byddan nhw ddydd Llun. Yr adeg yma y llynedd mi enillson nhw yn Nantporth wedi colli yn eu cartref eu hunain.

Er mai cael a chael i guro Airbus a wnaeth Bangor gartref y Sadwrn diwethaf mi fydd Llandudno yn fwy o gowlad iddyn nhw.

Mi all tîm Alan Morgan ei gwneud hi eto ym Mangor, beth bynnag a ddigwydd yn Llandudno ar ddydd Calan.

Gan Derwyddon Cefn y mae’r gwaith mwyaf anniolchgar – mynd i Park Hall a’r rheiny wedi curo’u 19 gêm hyd yma y tymor hwn.

Cadw’r sgôr mor isel ag y gallan nhw fydd tasg tîm Huw Griffiths a gobeithio y bydd y pwdin Dolig wedi effeithio mwy ar chwaraewyr Craig Harrison nag ar fechgyn y Derwyddon.

Gêmau eraill Gŵyl San Steffan: Aberystwyth v Y Drenewydd; Airbus v Gap Cei Connah; Y Bala v Y Rhyl, i gyd am 2.30.

Noson i ddringo’r graig yn wynebu Aberystwyth

2016-12-12T00:00:00+1:00

I ffwrdd â ni am chwech o gêmau yr wythnos hon a’r gyntaf yn dechrau yn Rhosymedre y nos Wener yma.

Aberystwyth sy’n ymweld â Derwyddon Cefn a hwythau heb chwarae ers pythefnos.

Roedd Bangor i fod yn Aber wythnos yn ôl ond mi gawson nhw alwad i Don Pentre a chael mwd yn lle rhew ar yr ail gynnig llwyddiannus yn nhrydedd rownd Cwpan Cymru.

Fydd dim cae mwdlyd yn wynebu Aberystwyth yn y Rock. Mae’r Derwyddon, fel hwythau, wedi cael cae newydd ac wedi curo Llanilltud Fawr yno yn y Cwpan y Sadwrn diwethaf.

Fydd hi ddim yr un math o gêm yn erbyn Aber a chan fod y ddau glwb yng ngwaelodion y tabl mae ganddyn nhw rhywbeth i’w brofi.

Dyw Aber ddim wedi ennill yr un o’u tair gêm ddiwethaf.

Yn eu gêm gartref bythefnos yn ôl mi enillodd y Derwyddon yn erbyn y Drenewydd.

Maen nhw’n medru chwarae pêl-droed da a chyflym ac mi ddylien fod yn ormod o gowdal i dîm y glannau os na fyddan nhw wedi gwella cryn dipyn.

Mae’r ddau yn awyddus iawn i ennill rhagor o bwyntiau ac mi fyddai tri yn help mawr i unrhyw un o’r ddau dîm.

Y Sadwrn hwn y mae gweddill y gêmau. Mae Sgorio wedi dewis yr ornest ar y brig, sydd ddim yn ornest o gwbl. Yn wir, mae’r ail glwb yn croesawu’r cyntaf yn y tabl ond mae cymaint o fwlch rhyngddyn nhw o ran pwyntiau fyddai ddim gwahaniaeth petai Gap Cei Connah yn ennill.

Does neb am daflu’r Seintiau Newydd oddi ar eu clwyd ddiogel y tymor hwn.

Er i Met Caerdydd eu cadw’n weddol dawel yn Park Hall y Sadwrn diwethaf doedd gan y myfyrwyr mo’r allwedd i roi cweir iddyn nhw.

Mi gadwon nhw hi’n gyfartal am sbel ond roedd cryfder a gallu’r Seintiau yn ormod yn y diwedd ac mi gwnaethon hi yn 3-1, Adrian Cieslewicz yn cael y drydedd yn ei gêm gynta yn ôl wedi’r anaf cas yn Llandudno. A thîm Craig Harrison yn ennill yr undeg seithfed gêm o’r bron.

Digon prin y bydd gan y Cei yr ateb y tro hwn ‘chwaith ar eu cae eu hunain.
Roedd hi’n agos iawn yng Nghwpan y Cynghrair yno y mis diwethaf a dim ond 0-1 oedd y sgôr.

Mi fydd yn rhaid i Andy Morrison dynnu rhywbeth arbennig iawn o’r het os yw am weld ei dîm yn curo’r Seintiau. Ond mi fyddwn yn barod am y clodfori ar Sgorio os llwyddan nhw.

Mae’r Rhyl ar daith i Gaerfyrddin a bechgyn Mark Aizlewood yn cael aros gartref am y tro cyntaf mewn tair wythnos. Caerfyrddin a enillodd yn y Belle Vue y mis diwethaf ac mae’n bosib iawn y gwnan nhw eto y Sadwrn hwn.

Er iddyn nhw golli yn Llandudno, a Chaernarfon yn y Cwpan, mi enillon nhw ym Mangor bythefnos ynghynt.

Gartref i Landudno y mae’r Bala sy’n drydydd digon solet yn y tabl.

Am fod criw Colin Caton wedi cael gafael yn eu gêm erbyn hyn mi fydd yn bnawn anodd i Landudno gael pwyntiau.

Os cân nhw un mi fyddan nhw’n ffodus iawn, a’r un mor lwcus i gadw’u lle yn hanner uchaf y tabl.

Gêmau eraill: Bangor v Airbus a’r Drenewydd v Met Caerdydd.

Taith arall i’r Hen Aur i brofi Llandudno gartref

2016-12-09T00:00:00+1:00

Patrwm fymryn yn wahanol sydd ‘na yr wythnos hon – pedair gêm y Sadwrn hwn yn unig. Yn un o’r rheiny mae Caerfyrddin yn teithio i’r gogledd am y trydydd Sadwrn yn olynol. Wynebu Llandudno y maen nhw y tro hwn, o flaen camerau Sgorio.

Dyma ddau o glybiau Uwch Gynghrair Cymru gafodd eu taflu allan o Gwpan Cymru gan ddau glwb o gynghreiriau is. O leia’ roedd gan Mark Aizlewood a’i dîm esgus am y golled yng Nghaernarfon: dyma’r ail wythnos iddyn nhw deithio i Wynedd.

Roedd hi’n stori wahanol iawn rhwng un Sadwrn a’r llall. Mi aethon nhw’n ôl yn fuddugoliaethus am Gaerfyrddin wedi trechu Bangor 2-1 yn yr Uwch Gynghrair. Doedd dim cymaint o hwyl wrth fynd am adref y Sadwrn diwethaf wedi colli 3-1 yn yr Oval. Mae Caernarfon wedi cael hwyl yn erbyn timau’r Uwch Gynghrair o’r blaen. Mi guron nhw Fangor mewn cwpan arall y llynedd ac mi gawson nhw gêm gofiadwy yn erbyn y Seintiau Newydd yng Nghwpan Cymru ddau dymor yn ôl a dim ond colli 2-3.

Does gan Landudno ddim hanes anrhydeddus iawn yn y Cwpan ers iddyn nhw godi i’r Uwch Gynghrair. Allan ar y cynnig cyntaf yr aethon nhw y tro yma eto, yn erbyn Goytre o Sir Fynwy, a cholli 0-2. Hanes gweddol galonogol sydd iddyn nhw yn erbyn Caerfyrddin. Y tymor diwethaf – tymor cyntaf Llandudno yn yr haen uchaf – mi enillodd yr Hen Aur 1-2 ym Mharc Maesdu ond Llandudno yn ennill yn yr ail gêm yn y Waun Dew 2-4. A nhw enillodd eto yno yn gynharach y tymor hwn 0-1.

A chofio sut mae hi wedi bod gartref ar Landudno ers dechrau’r tymor mi all Caerfyrddin godi eu calonnau. Maen nhw wedi colli chwech o’u gêmau ym Mharc Maesdu, felly mae’n lle addawol i Mark Aizlewood. A fyddan nhw’n medru gwneud y Bangor arnyn nhw, neu ai diwrnod Caernarfon fydd hi ar eu trydedd daith i’r gogledd mewn pythefnos?

Draw i gyfeiriad y dwyrain mi fydd Airbus yn croesawu’r Bala. Mi gollodd bechgyn Brychdyn 4-1 yn erbyn Pen-y-bont yng Nghwpan Cymru, tîm Rhys Griffiths, y dyn y mae dilynwyr UGCymru yn gyfarwydd iawn â’i enw. Mi wnaeth y Bala yn llawer gwell yn erbyn Caldicot – ennill 6-1. Dyna’r gwahaniaeth rhwng clwb sy’n drydydd ac un sy’n olaf yn y tabl.

Gan gofio ei bod yn ddydd o brysur bwyso ar reolwr Airbus, Andy Thomas mae’n amhosib credu eu bod am ennill yn erbyn y Bala na hyd yn oed gael gêm gyfartal.

Mae diddordeb arbennig yn y gêm sy’n digwydd ger Croesoswallt. Yno y Sadwrn hwn y mae tîm llawn amser arall – fwy neu lai, am eu bod yn fyfyrwyr. Os oes unrhyw dîm sydd wedi datblygu y tymor hwn, Met Caerdydd yw hwnnw. Mi ddylai hon fod yn gêm werth chweil gyda’r gobaith am unwaith y gall hi fod yn ddiwrnod caled i’r Seintiau Newydd.

A oes gobaith iddyn nhw arafu eu cam a’u rhwystro rhag ennill yr undeg seithfed gêm o’r bron heb golli? Braf fyddai credu fod meistr ar feistr Mostyn!

Y Drenewydd sy’n ymweld â’r Rhyl, y clwb fydd yn chwarae yng Nghaernarfon ym mhedwaredd rownd Cwpan Cymru. Dim Penrhyncoch yw’r Drenewydd ac mi fyddan yn rhoi llawer gwell gêm iddyn nhw yn y Belle Vue y Sadwrn hwn.

Cafodd gêm Aberystwyth yn erbyn Bangor ei gohirio am fod Bangor am fynd i Don Pentre i weld a yw’r cae wedi dadmer.

Y Seintiau’n chwalu record ac yn mynd eto am Gwpan Cymru

2016-12-02T00:00:00+1:00

Y rhyfeddod pennaf oedd fod y gêm nos Fawrth yn y Rhyl wedi ei gohirio, oherwydd y rhew. Pwy fyddai’n credu fod y tywydd oer yn effeithio cymaint ar y glannau ond dyna oedd y penderfyniad ganol pnawn cyn i’r Seintiau Newydd gyrraedd yno.

Chawson ni ddim gweld sut y byddai’r Claerwynion yn dygymod â thrên y Seintiau sydd wedi teithio drwy holl gêmau’r tymor heb golli’r un. Mi lwyddon nhw i dorri record Bangor wythnos yn ôl pan oedden nhw gartref i Airbus. Un deg chwech o gemau a neb wedi eu curo, dyna’r record newydd. Mi allai fod wedi bod yn un deg seithfed yr wythnos hon, ond mi gân nhw eu cyfle eto.

A hwythau ar waelod y tabl wnaeth bechgyn Brychdyn ddim cynddrwg â’r Rhyl yn gynharach yn y tymor. Dim ond colli o 4-0 a wnaethon nhw. Mae pawb yn cofio’r sgôr pan aeth y Rhyl yno – 10-0. Mae bechgyn Niall McGuinness wedi dod dros y gweir honno ac wedi cael buddugoliaethau cofiadwy ar ôl hynny ac yn wythfed yn y tabl.

Roedd llygaid amryw byd ar Fangor y Sadwrn diwethaf. Sut y bydden nhw’n gwneud wedi colli Andy Legg yn erbyn yr Hen Aur? Doedd hi ddim yn wylio cyffyrddus i’r rheolwr newydd, Ian Dawes. Cael cweir a wnaeth ei dîm, ddim am y tro cyntaf yn erbyn Caerfyrddin rhaid dweud, ond roedd y rheolwr yn siomedig eu bod wedi gwneud cyn waethed. Dim siap yn y cefn nac yn y blaen a dylai Caerfyrddin fod wedi sgorio rhagor o goliau.

Trydedd rownd Cwpan Cymru JD sy’n wynebu clybiau’r Uwch Gynghrair y Sadwrn hwn. Yn y rownd yma y maen nhw’n ymuno yn y cwpan a dau ohonyn nhw yn wynebu’i gilydd. Yn y Drenewydd mae’r deiliaid yn chwarae, popeth yn mynd o blaid y Seintiau y tymor yma, hyd yn oed y teithio yng Nghwpan Cymru.

Er bod Gap Cei Connah wedi baglu ym Mharc Latham bythefnos yn ôl mae’n amheus iawn a fydd y Seintiau yn disgyn i’r un fagl. Cael aros gartref y mae’r Cei a Goytre Utd sy’n gorfod teithio’n i bellafoedd Sir y Fflint o Aberafan.

Gartref hefyd y mae Llandudno, Y Bala, Derwyddon Cefn, Y Rhyl, Met Caerdydd ac Aberystwyth. Goytre arall sy’n teithio i Landudno – Goytre FC o Penperlleni, Sir Fynwy. Un o glybiau eraill y sir honno, Caldicot fydd yn y Bala; Llanilltyd Faerdref sydd yn ymweld â Rhostyllen i wynebu Derwyddon Cefn; i Gaerdydd mae Porthmadog yn mynd er mwyn chwarae yn erbyn Met Caerdydd. Cael diwrnod yn y Rhyl y mae Penrhyncoch a Treffynnon yn Aberystwyth. Mi fydd y bysiau’n pasio’i gilydd ar y ffordd!

Mae’r gweddill oddi cartref – Caerfyrddin yn cael taith arall i Wynedd o fewn wythnos, i herio Caernarfon. Taith ymhell i’r de sydd gan Airbus i weld sut y gallan nhw ddygymond â Phenybont (Pen-y-bont ar Ogwr) a dydd Sul yn y Rhondda y bydd Bangor yn ymgodymu â Ton Pentre. Mae hon i’w gweld ‘yn fyw’ ar Sgorio.

Y gobaith oedd y byddai Andy Legg yn wynebu tîm ei gyn-gapten Lee Phillips pan oedd yn rheoli Llanelli adeg yr enillodd Gwpan Cymru. Ond bydd yn rhaid i’r sylwebwyr ddod o hyd i rhyw gysylltiad arall i sôn amdano erbyn y Sul.

Cic allan i’r Cymro Andy Legg a throi am y gororau i gael olynydd

2016-11-23T00:00:00+1:00

Chafodd Andy Legg mo’r sac am golli un gêm yn drwm i fyfyrwyr Caerdydd. Roedd amryw yn meddwl fod rhywbeth ar y cardiau beth bynnag am nad oedd y rheolwr wedi arwyddo cytundeb. Erbyn hyn mae’n bosib iawn fod perchnogion Bangor wedi penodi rhywun yn ei le.

Fydd hwnnw ddim wedi chwarae i Gymru yn ôl pob tebyg ac o ochrau’r gororau y daw.

Dibynnu ar y pen hwnnw i’r byd y mae clwb Bangor bellach a’u golygon ar weld y Dinasyddion yn codi yn y byd a throi’n Seintiau Newydd o glwb.

Mae’n drueni i’r Uwch Gynghrair fod Andy Legg wedi gorfod mynd. O leia’ roedd yn Gymro ac yn gwybod beth oedd Uwch Gynghrair Cymru oherwydd ei brofiad helaeth gyda Llanelli. O ymateb y gwefannau cymdeithasol i’r symudiad mae’r perchnogion wedi pechu yn eu herbyn wrth gael gwared â’r dyn oedd wedi rhoi ysbryd newydd yn y tîm a’r cefnogwyr – tan y Sadwrn diwethaf.

Aeth rhywbeth mawr o’i le. Efallai fod Andy Legg wedi synhwyro fod y newydd am dorri yr wythnos hon a bod hynny wedi treiddio i’r chwaraewyr. Ond roedd yn anarferol iddyn nhw golli cyn drymed o dano. Caerfyrddin sydd ym Mangor y Sadwrn hwn. Mae bechgyn y Waun Dew wedi cael hwyl arni ym Mangor cyn hyn ac efallai y bydd tîm heb reolwr yn fantais iddyn nhw eto.

Y nos Wener yma y mae pedair o’r gêmau. Mae Aberystwyth yn medru chwarae gartref er gwaethaf y difod a achosodd y corwynt. Y Bala sy’n ymweld yn syth ar ôl eu buddugoliaeth yn Llandudno sydd wedi eu gosod yn drydydd yn y tabl. Roedd y ffaith i Bangor golli yn y brifddinas yr un pryd yn help iddyn nhw adfer eu hen safle am y tro cyntaf y tymor hwn.

Oherwydd i gêm Aberystwyth gael ei gohirio wythnos yn ôl maen nhw wedi cael ychydig o orffwys. A fydd hynny’n ddigon iddyn nhw wneud iawn am yr hyn a ddigwyddodd ym Maes Tegid bythefnos yn ôl? Mae’n amheus! Gan fod y Bala wedi dod o hyd i’r gôl erbyn hyn mae hi am fod yn her i Aber ddygymod â nhw. Os na fydd lwc o blaid tîm Matthew Bishop ychydig iawn o obaith sydd gan glwb Coedlan y Parc i ennill hon.

Derwyddon Cefn oedd y clwb arall a gafodd orffwys nos Wener diwethaf. Gartref y maen nhw y nos Wener yma yn erbyn y Drenewydd, a wnaeth eu marc y Sadwrn diwethaf yn curo Gap Cei Connah a chodi o waelod y tabl. Dyw’r Drenewydd ddim yn dîm gwael ac roedden nhw’n haeddu gwell lwc.

Mae hi’n hwyr yn y tymor erbyn hyn i fedru codi’n uchel yn y tabl ond efallai fod y Sadwrn diwethaf wedi rhoi hwb iddyn nhw anelu’n uwch. Mi fydd y frwydr yn dechrau yn Rhosymedre ac mae tîm Chris Hughes yn ddigon da i guro Derwyddon Cefn.
Airbus sydd wedi cyrraedd gwaelod y tabl a’r nos Wener yma maen nhw’n gorfod wynebu’r ceiliogod ar y brig. Mae’r Seintiau Newydd wedi cyrraedd record Bangor o ennill pymtheg gêm mewn tymor heb golli. Pwy fyddai’n amau y byddan nhw’n ei gwneud hi yn un ar bymtheg yr wythnos hon? Druan o dîm Brychdyn. Mae’r holl newid sydd wedi bod yno yn dangos ei ôl a does ganddyn nhw ddim gobaith o gyrraedd Ewrop y tymor hwn.

Y Rhyl a roddodd y farwol iddyn nhw wythnos yn ôl yng ngolwg yr awyrennau. Fydd hi ddim mor hawdd iddyn nhw yn erbyn Gap Cei Connah, er eu bod yn chwarae gartref. Petaen nhw’n cael gêm gyfartal mi fyddai’n bwynt gwerthfawr i’r Claerwynion sydd yn yr wythfed safle gyda’r un nifer o bwyntiau â Chaerfyrddin.

Llandudno sydd yn ymweld â Met Caerdydd y tro hwn a gêm dydd Sul yw hon. A fydd tîm Alan Morgan yn medru dod yn ôl heb golli yn erbyn coesau ifanc y myfyrwyr?

? Ennill o un gôl yn erbyn Gap Cei Connah a wnaeth y Seintiau yng Nghwpan y Gynghrair. Mi fyddan nhw’n chwarae’r Barri yn y ffeinal, enw o orffennol UGC.

Albanwyr yn cael blas o ddawn y tîm o Groesoswallt

2016-11-17T00:00:00+1:00

Does dim posibl atal y Seintiau Newydd y tymor hwn. Maen nhw ar ben tabl yr Uwch Gynghrair ers dechrau’r tymor ac mewn tri chwpan o hyd, un ohonyn nhw yn yr Alban. Mi aethon nhw i Livingston heb fod yn bell o Gaeredin dydd Sul i chwarae yng nghwpan Irn-Bru a rhoi gwers i’r clwb Albanaidd sut i sgorio tair gôl.

A dyma’r clwb o Groesoswallt yn rownd gyn-derfynol y cwpan hwnnw yn erbyn St Mirren. Mi fydd yr Albanwyr yn gwybod am eu gallu i ennill ac am wneud yn siŵr nad oes neb o’r tu allan i’r wlad honno yn bachu eu cwpan.

Pan ddaethon nhw’n ôl i Gymru i chwarae yn erbyn Gap Cei Connah yng nghwpan y Gynghrair nos Fawrth doedden nhw ddim yn gwneud cystal. Ar yr egwyl roedden nhw’n colli 2-1. Ond mi ddaethon nhw’n ôl a phan oedd yn 2-2 bu’n rhaid rhoi’r gorau iddi oherwydd niwl!

Maen nhw allan eto y nos Wener yma ac yn teithio i Gaerfyrddin. Os bu siawns erioed i glwb yr Hen Aur roi stop arnyn nhw dyma’u cyfle. Mi fydd yr Alban dydd Sul a gêm nos Fawrth wedi dweud arnyn nhw ac mi all Caerfyrddin fanteisio ar hynny.

Yn anffodus wnaethon nhw ddim yn erbyn Derwyddon Cefn dydd Sul. Roedd tîm Huw Griffiths heb eu golwr arferol ac wedi tynnu chwaraewr canol cae i’r gôl. Ond mi gawson nhw gêm gyfartal 2-2 yn y Waun Dew sy’n dangos diffygion Caerfyrddin a rhywfaint o ruddin y Derwyddon.

Y neges yw fod yn rhaid i Mark Aizlewood a’i dîm fod ar eu gorau os ydyn nhw am roi stop ar Craig Harrison a’i fechgyn rhag ennill eu pymthegfed gêm yn yr Uwch Gynghrair y tymor hwn.

Oddi cartref yn Aberystwyth y mae’r Derwyddon y nos Wener yma. Fel y byddai rhywun wedi disgwyl mi gafodd Aber noson ddychrynllyd yn y Bala wythnos yn ôl gan ildio gôl gynnar a aeth yn bedair cyn y diwedd, heb ymateb ond cerdyn coch i Ricky Watts.

Maen nhw’n well ar eu carped eu hunain. Mi allan fod yn gadarnach yn erbyn y Derwyddon a mynd â hi, ond fydd tîm Huw Griffiths ddim yn rhoi’r gorau i gael pwynt neu dri ohoni ‘chwaith.

Am unwaith mae gweddill y gêmau ar y Sadwrn y tro yma. Mae Gap Cei Connah a Bangor, sy’n ail a thrydydd yn y tabl, oddi cartref ac felly’r Bala sy’n gwasgu ar eu sodlau. Yn y Drenewydd y mae tîm Andy Morrison yn fuan wedi eu gêm yn Llandudno dydd Sul pan enillon nhw 0-2. Bangor oedd yn y Drenewydd dydd Sul ac wedi mynd ar ei hôl hi’n gynnar mi gawson nhw fuddugoliaeth 1-2.

Fydd hi ddim mor hawdd i fechgyn Andy Legg yng Nghaerdydd yn erbyn myfyrwyr y Met. Mae’r bechgyn ifanc wedi cryfhau wrth i’r tymor fynd yn ei flaen ac maen nhw yn y pumed safle.

Diwrnod y gogledd ddwyrain yw hi ym Mrychdyn wrth i’r Rhyl ymweld. Mi fydd y Claerwynion yn credu fod ganddyn nhw obaith ennill hon. Wedi’r adrefnu yn Airbus maen nhw un safle o waelod y tabl ac yn chwilio am wyrth i’w harwain yn ôl i hanner cyntaf y tabl.