Mwy o Newyddion
Yr Arglwydd Wigley yn mynnu mwy na geiriau teg i Gymru ar fater Brexit
Mae arglwydd Plaid Cymru, Dafydd Wigley, wedi annog Llywodraeth y DG i brofi eu gonestrwydd trwy gefnogi gwelliant Plaid Cymru i Fesur Erthygl 50 yn seiliedig ar Bapur Gwyn Plaid Cymru-Llywodraeth Cymru ar y cyd, ‘Sicrhau Dyfodol Cymru’.
Trwy weithio gyda Llywodraeth Cymru, mae Plaid Cymru wedi cyflwyno safbwynt clir, unedig a chryf yn y papur gwyn trawsbleidiol, gyda budd economaidd Cymru, ei swyddi a’i bywoliaeth yn ganolog iddo.
Mae arglwydd Plaid Cymru wedi cyflwyno gwelliant i’w ystyried yn ystod Cyfnod Pwyllgor y Mesur, sydd yn galw am “fynediad llawn a dilyffethair i’r Farchnad Sengl Ewropeaidd” llinell goch bwysicaf y papur gwyn.
Wrth siarad yn ystod Ail Ddarlleniad Mesur Erthygl 50, dywedodd Dafydd Wigley: “Mae Llywodraeth San Steffan wedi gwneud ymrwymiadau diamod dro ar ôl tro y buasent yn gwrando ar y gweinyddiaethau datganoledig wrth lunio eu cynlluniau Brexit.
"Hyd yma, nid ydym wedi gweld fawr ddim tystiolaeth o weld yr ymrwymiadau hyn yn dwyn ffrwyth.
“Mae ar Gymru angen mynediad llawn a dilyffethair i’r Farchnad Sengl.
"Dyna sail y papur gwyn gwych a gynhyrchwyd gan Blaid Cymru a Llywodraeth Cymru, gyda chefnogaeth y Democratiaid Rhyddfrydol.
“O safbwynt Cymreig, mae dwy ran o dair o’n hallforion gweithgynhyrchu yn mynd i wledydd yr UE.
"Gallai cwmnïau fel Ford, Airbus, Siemens a Toyota ddioddef ergydion trymion oherwydd rhwystrau tariff.
"Mae dau gant o gwmnïau Americanaidd a 50 o gwmnïau o Siapan wedi eu lleoli yng Nghymru er mwyn gwerthu i farchnadoedd yr UE.
"Bydd yr elfen strategol honno o bolisi diwydiannol yng Nghymru yn cael ei thanseilio gan Brexit caled.
“Mae ein sector amaethyddol yn wynebu heriau cyffelyb.
"Mae dros 90% o allforion cig eidion a chig oen a defaid yn mynd i farchnadoedd yr UE.
Byddai unrhyw rwystrau tariff yn ergyd farwol i’r Gymru wledig.
“Dan y teitl ‘Sicrhau Dyfodol Cymru’, mae ein papur gwyn yn galw am ‘gyfranogi yn llawn yn y Farchnad Sengl’.
"Buaswn yn annog y Llywodraeth i dderbyn gwelliannau i’r perwyl hwnnw.
"“Rhaid i Weinidogion Brexit yn awr roi gweithredoedd yn lle eu geiriau.”
Llun: Yr Arglwydd Wigley
