Mwy o Newyddion

Cyhoeddi enwau ysgolion newydd a fydd yn helpu i lunio’r cwricwlwm cenedlaethol

Mae 25 o ysgolion ychwanegol yn mynd i fod yn rhan o’r gwaith o ddatblygu cwricwlwm cenedlaethol newydd Cymru yn ôl cyhoeddiad gan Ysgrifennydd y Cabinet dros Addysg, Kirsty Williams, heddiw.

Bydd yr ysgolion hyn o bob cwr o Gymru yn ymuno â’r ysgolion sydd eisoes yn Ysgolion Arloesi i helpu i greu a llunio’r cwricwlwm newydd a gaiff ei ddefnyddio i gefnogi dysgu ac addysgu o fis Medi 2021 ymlaen.

Mae pedwar diben i’r cwricwlwm newydd er mwyn sicrhau bod plant a phobl ifanc yn datblygu i fod yn:

• Ddysgwyr uchelgeisiol a medrus a fydd yn barod i ddysgu drwy gydol eu hoes.
• Cyfranwyr mentrus a chreadigol a fydd yn barod i chwarae rhan lawn yn eu bywyd a’u gwaith.
• Unigolion iach a hyderus a fydd yn barod i fyw bywyd boddhaus fel aelodau gwerthfawr o gymdeithas.
• Dinasyddion deallus a moesegol a fydd yn barod i fod yn ddinasyddion Cymru a’r byd.

Dywedodd Kirsty Williams: “Pwrpas ein system addysg yw rhoi i blant a phobl ifanc y sgiliau a’r wybodaeth sydd eu hangen arnynt i ffynnu yn y byd modern.

"Mae’r cwricwlwm newydd sy’n cael ei ddatblygu gennym yn adlewyrchu hyn.

“Pleser o’r mwyaf i mi yw cyhoeddi 25 o Ysgolion Arloesi ychwanegol o bob cwr o Gymru.

"Bydd y rhain yn greiddiol i’r broses o gynllunio’r cwricwlwm newydd. Mae’r gweithlu addysg yn rhan ganolog o lunio system addysg ar gyfer y dyfodol.”

Y cam diweddaraf yn natblygiad y cwricwlwm yw edrych ar y chwe Maes Dysgu a Phrofiad yn y cwricwlwm newydd; y celfyddydau mynegiannol, iechyd a llesiant, y dyniaethau, ieithoedd, llythrennedd a chyfathrebu, mathemateg a rhifedd, gwyddoniaeth a thechnoleg.

Bydd hyn yn ychwanegu at y gwaith a wnaed yn datblygu’r Fframwaith Cymhwysedd Digidol a’r gwaith ar egwyddorion cynllunio strategol, addysgeg ac arferion yn ogystal â gweithgarwch i lunio’r Safonau Addysgu Proffesiynol newydd.

Dyma’r Ysgolion Arloesi diweddaraf:

• Bassaleg School, Uwchradd
• Connah’s Quay High School, Uwchradd
• Fitzalan High School, Uwchradd
• Glan y Môr Comprehensive, Uwchradd
• Gwernyfed High School, Uwchradd
• Llanidloes High School, Uwchradd
• Pembroke High School, Uwchradd
• Portfield School, Arbennig
• Porthcawl Comprehensive School, Uwchradd
• Rhyl High School, Uwchradd
• St Joseph’s RC Primary, Penarth, Cynradd
• The Maelor School, Uwchradd
• Welshpool High School, Uwchradd
• Ysgol Brynrefail, Uwchradd
• Ysgol Cedewain,  Arbennig
• Ysgol David Hughes, Uwchradd
• Ysgol Dewi Sant, Uwchradd
• Ysgol Dinas Bran, Uwchradd
• Ysgol Dyffryn Conwy, Uwchradd
• Ysgol Friars, Uwchradd
• Ysgol Gyfun Llangefni, Uwchradd
• Ysgol Penboyr, Cynradd
• Ysgol Syr Hugh Owen, Uwchradd
• Ysgol y Creuddyn, Uwchrad
• Ysgol y Gogarth, Arbennig