Mwy o Newyddion

BBC Radio Cymru yn dweud 'diolch o galon' gyda gwledd o gerddoriaeth ar ddiwrnod Santes Dwynwen

Ar Ddiwrnod Santes Dwynwen bydd BBC Radio Cymru yn gwahodd gwrandawyr i fwynhau gwledd o gerddoriaeth yn Neuadd Hoddinott y BBC yng Nghaerdydd -  cartref Cerddorfa Genedlaethol Gymreig y BBC.

Bydd Diwrnod Diolch o Galon yn rhan o flwyddyn o ddathliadau Radio Cymru yn 40 oed eleni - ac yn gyfle i ddiolch i’r gwrandawyr ac i’r rheiny sydd wedi cyfrannu at lwyddiant yr orsaf er 1977.

Darlledir yr achlysur yn fyw ar Radio Cymru rhwng 10am a 5pm, a bydd rhai o leisiau mwyaf cyfarwydd Radio Cymru yn cyflwyno.

Mae cerddoriaeth Gymraeg wrth galon Radio Cymru a bydd Cerddorfa a Chorws Cenedlaethol Cymreig y BBC a rhai o artistiaid gorau Cymru yn perfformio yn y digwyddiad unigryw ar Ionawr 25.

Yn ogystal â rhai o’r hen glasuron, sy’n rhan o stori Radio Cymru, mae’r cerddor John Quirk wedi ysgrifennu trefniannau newydd i’r gerddorfa ar gyfer yr achlysur.

Dywedodd Dyl Mei, cynhyrchydd rhaglen Tudur Owen, sydd wedi dewis cerddoriaeth ar gyfer y diwrnod: “Dwi erioed wedi gweld cerddorfa yn fyw o’r blaen.

"Felly bydd hi’n bleser pur clywed un go iawn y BBC yn chwarae rhai o fy newisiadau personol.

"Mae o’n neud i fi deimlo fel Mozart - er ’mod i dal i edrych fel Pavarotti!”

Ymhlith yr uchafbwyntiau, bydd Ywain Gwynedd yn canu Sebona Fi - hoff gân gwrandawyr Radio Cymru yn siart #40Mawr yr orsaf yn 2016.

Bydd Alys Williams yn perfformio Pan Fo’r Nos Yn Hir ac fe fydd Ywain Gwynedd yn canu Diolch Yn Fawr, un o glasuron Meic Stevens, gyda Chôr Radio Cymru a Chorws y BBC.

Dywedodd Ywain Gwynedd: “Mae’n bleser cael bod yn rhan o’r diwrnod.

"Dwi wedi bod yn ddigon lwcus i gael cyfleon gwych gan Radio Cymru dros y blynyddoedd ac mae rôl yr orsaf yn hybu bandiau ac artistiaid ifanc yn holl bwysig.

"Heb gerddoriaeth gyfoes a pherthnasol, does dim posib i’r iaith Gymraeg ffynnu.

"Radio Cymru yw’r platfform mwyaf sydd ganddon ni i’r gerddoriaeth yna sydd, diolch byth, yn fwy toreithiog na fuodd hi erioed.”

Bydd y gantores a’r gyflwynwraig Shân Cothi yn canu Calon Lân.

Y tro diwethaf iddi ganu hon yn Neuadd Hoddinott oedd yn 2015, fel rhan o ddeuawd gydag Andres Evans ym Mhatagonia.

Gosodwyd record byd newydd ar Radio Cymru wrth i ddeuawd gael ei chanu gan gantorion oedd 7,000 o filltiroedd ar wah?n.

Bydd Neuadd Hoddinott ym Mae Caerdydd yn agored i wrandawyr Radio Cymru sy’n dymuno bod yn rhan o’r dathliadau.

Dywedodd Betsan Powys, Golygydd Radio Cymru: “Mae croeso cynnes i bawb ymuno â ni ar Ddiwrnod Santes Dwynwen i fwynhau diwrnod i’w gofio yn Neuadd Hoddinott.

"Does dim angen tocynnau ac mae cyfle i bobl gyrraedd unrhyw bryd yn ystod y dydd.

"Hoffwn ddal ar y cyntaf o nifer o gyfleon fydd eleni, i ddiolch yn fawr i’r rheiny sydd wedi cyfrannu at lwyddiant yr orsaf.

"Ac mae’r diolch mwya, wrth gwrs, i’n cynulleidfa sy’n cadw cwmni i ni bob dydd. Diolch o galon!”

Llun: Ywain Gwynedd