Mwy o Newyddion

Croesawu tro pedol ar arian i atal llifogydd

Mae AC Plaid Cymru dros Arfon, Sian Gwenllian  wedi croesawu ymrwymiad gan Lywodraeth Cymru i leihau toriadau arfaethedig i gynlluniau gwarchod rhag llifogydd fel rhan o’r gyllideb derfynol y cyhoeddwyd heddiw, 20 Rhagfyr.

Bydd y toriad yn llai oherwydd y defnyddir gwariant cyfalaf ychwanegol a ddaw i Gymru o ganlyniad i Ddatganiad yr Hydref a gyhoeddwyd gan Ganghellor y DG fis diwethaf.

Adeg cyhoeddi Datganiad yr Hydref, plediodd Plaid Cymru achos dros wario unrhyw arian ychwanegol fyddai’n dod i Gymru ar amddiffynfeydd rhag llifogydd ymysg pethau eraill.

Meddai Sian Gwenllian AC sydd ar Bwyllgor Newid Hinsawdd y Cynulliad: "Dyma dro pedol i’w groesawu gan Lywodraeth Cymru yn dilyn sylwadau a wnaed gan Blaid Cymru.

"Pan gynigiodd y Llywodraeth Lafur y toriad o 36% i gynlluniau gwarchod rhag llifogydd i ddechrau, gwrthwynebodd Plaid Cymru symudiad o’r fath yn gryf.

"Nid yn unig mae cynlluniau gwarchod rhag llifogydd yn chwarae rhan hanfodol yn amddiffyn cartrefi a’n cymunedau yn ehangach, ond y maent hefyd yn  allweddol yn y frwydr yn erbyn newid hinsawdd.

"Dyma ein barn ni ym Mhlaid Cymru, a dyna pam y gwnaethom ymateb i  Ddatganiad yr Hydref fis diwethaf trwy annog Llywodraeth Cymru i wario unrhyw arian ychwanegol fyddai’n dod i Gymru ar amddiffynfeydd llifogydd a buddsoddiadau eraill mewn seilwaith.

"Mae ardaloedd fel ffordd ddeuol yr A55 yn f’etholaeth i wedi eu taro’n galed gan lifogydd dros y blynyddoedd, ac yr wyf yn  falch yr aiff yr arian hwn beth o’r ffordd at liniaru problemau o’r fath.

"Un yn unig yw hwn o’r pynciau y buom ni’n dwyn pwysau yn eu cylch yn  ystod ein trafodaethau gyda Llywodraeth Cymru ac y mae’n dangos sut mae Plaid Cymru yn cyflawni ein haddewid i gyflwyno fel gwrthblaid."