Mwy o Newyddion
Tecstio dros S4C newydd
Mae'n amser i'r gwleidyddion ddelifro S4C newydd, dyna fydd neges rali ar faes yr Eisteddfod ddydd Iau.
Ers i'r Llywodraeth gyhoeddi cynlluniau i gwtogi ar eu grant i'r unig sianel deledu Gymraeg o naw deg pedwar y cant, mae degau o fudiadau, arweinwyr y pedair prif blaid yng Nghymr a'r Archesgob Cymru Barry Morgan wedi datgan eu gwrthwynebiad. Beirniadwyd cyd-cynllun y BBC a'r Llywodraeth gan y Pwyllgor Materion Cymreig a'r Pwyllgor Diwylliant yn San Steffan, ac ym mis Mawrth eleni, cyflwynodd ymgyrchwyr ddeiseb a lofnodwyd gan 13,000 o bobl yn erbyn y cwtogiadau.
Yn annerch y dorf yn y rali fydd Llywydd Plaid Cymru Jill Evans, AS Llafur Susan Elan Jones a Meic Birtwistle o Undeb y Newyddiadurwyr. Yn ystod y rali, bu siaradwyr Cymdeithas yr Iaith Gymraeg yn annog protestwyr i decstio yr Ysgrifennydd Diwylliant Jeremy Hunt gyda neges yn erbyn y newidiadau.
Meddai Menna Machreth, llefarydd darlledu Cymdeithas yr Iaith Gymraeg: "Mae grym pobl yn ymgyrchu wedi golygu fod yr ymgyrch hon wedi symud agenda Llywodraeth San Steffan i ddiddymu S4C i'n sefyllfa bresennol sef nesáu at dadwneud ei chynlluniau'n llwyr.
"Mae pawb yng Nghymru eisiau gweld gwireddu S4C newydd, dim mwy o'r hen gelwydd oddi wrth y Torïaid na neb arall sy'n mynnu fod llai na hynny'n dderbyniol. Yma yn yr Eisteddfod Genedlaethol yn Wrecsam, rydym am alw ar wleidyddion i 'wneud nid dweud' a phleidleisio i dynnu S4C allan o'r Mesur Cyrff Cyhoeddus."
Fe gerddodd y protestwyr draw at stondin Llywodraeth Cymru i ddadlau dros ddatganoli darlledu i Gymru.
Ychwanegodd Ms Machreth: "Mae llais unedig pobl Cymru wedi dweud eu bod nhw yn erbyn cynlluniau'r llywodraeth, ac mae'n bryd i Lywodraeth Cymru gynnig arweiniad ar y pwnc hynod bwysig hwn a mynnu fod y cyfryngau yn cael eu datganoli i Gymru.Rhaid i'r BBC yn Llundain sylweddoli bod eu bwriadau i dorri gwasanaethau yn mynd i grebachu'r cyfryngau yng Nghymru ac mae angen i S4C fod yn barod i wrando a diwygio os yw am adennill hyder pobl yn ogystal â chamu ymlaen i'r oes ddigidol.'
Yn siarad yn y rali, dywedodd Llywydd Plaid Cymru Jill Evans: "Mae'n hollbwysig bod y llywodraeth yn San Steffan yn deall bod eu gweithredoedd wedi gwylltio cymaint o bobl.
"Mae'r frwydr dros ein sianel yn parhau, yn cynnwys ar lefel Ewropeaidd. Mae gan y bygythiad i S4C effaith tu hwnt i Gymru. Mae pobl mewn gwledydd eraill sydd yn brwydro dros hawliau ieithoedd lleiafrifol yn ymwybodol iawn o bwysigrwydd y sianel i'r Gymraeg ac i statws ein hieithoedd i gyd."
Llun: Jill Evans
