Mwy o Newyddion

Heledd Gwyndaf yw Cadeirydd newydd Cymdeithas yr Iaith

Mae mam o Dalgarreg, Ceredigion wedi ei hethol fel Cadeirydd newydd Cymdeithas yr Iaith Gymraeg yn dilyn cyfarfod cyffredinol blynyddol y mudiad dros y penwythnos. 

Cafodd Heledd Gwyndaf ei geni ym Mangor a threuliodd cyfnod ym Mhen Llŷn.

Symudodd hi i'r De yn weddol ifanc ac aeth i Ysgol y Dderwen, Caerfyrddin, Ysgol y Strade, Llanelli ac i Ysgol Dyffryn Teifi.

Mynychodd Brifysgol Bangor i astudio Hanes a Chymraeg ac i'r Unol Daleithiau i ennill gradd meistr mewn Theorïau Dysgu ac Addysgu.  

Wedi cyfnodau o weithio ym maes darlledu, cyfathrebu ac addysg, mae hi bellach yn byw ar fferm odro yn Nhalgarreg gyda'i gŵr Hywel a thri o blant - Gwydion, Gruffudd a Gwenllïan.

Yn siarad wedi iddi gael ei hethol fel Cadeirydd Cymdeithas yr Iaith Gymraeg, dywedodd Heledd Gwyndaf:  "Mae'n fraint ar y naw bod yn Gadeirydd ar fudiad mor allweddol â Chymdeithas yr Iaith, mudiad sy'n cynnig gobaith i'r Gymraeg.

"Dechreuais i ymwneud mwy mwy â'r Gymdeithas wedi i mi dderbyn llythyr personol wrth un o hoelion wyth y mudiad, Ffred Ffransis, tra yn y Brifysgol ym Mangor.

"Mae'r mudiad wedi sicrhau, gan gydweithio ag eraill, nifer o fuddugoliaethau dros y flwyddyn neu ddwy ddiwethaf, gan gynnwys cryfhau statws y Gymraeg yn y Bil Cynllunio, atal toriadau pellach i S4C ynghyd â sicrhau bod pob disgybl yn astudio ar gyfer yr un cymhwyster Cymraeg.

"Rwy'n gobeithio adeiladu ar y llwyddiannau hynny.

"Mae tîm arbennig o swyddogion gwirfoddol a chyflogedig yn y Gymdeithas, ac rwy'n falch iawn o gael y cyfle i ymgyrchu gyda nhw.

"Rwy'n awyddus i weld pwyslais pellach yn cael ei roi ar gryfhau'r mudiad ar lawr gwlad ac yn edrych ymlaen at yr her." 

Llun: Heledd Gwyndaf (gan Rhys Llwyd)