Mwy o Newyddion
Cyflwyno Coron Eisteddfod 2011
Cyflwynwyd Coron Eisteddfod Genedlaethol Wrecsam a’r Fro i Gadeirydd Pwyllgor Gwaith y Brifwyl mewn digwyddiad arbennig yn nhref Wrecsam ddoe.
Rhoddir y Goron a’r wobr ariannol gan Brif Gyfrinfa Talaith Gogledd Cymru. Cynlluniwyd a chynhyrchwyd y Goron gan John Price o Fachynlleth, a dyma’r bedwaredd Goron iddo’i chreu ar gyfer Eisteddfod Genedlaethol Cymru.
Mae Coron yr Eisteddfod eleni’n cyfuno ardal Wrecsam a’r Fro a dathliadau canmlwyddiant a hanner y Brifwyl, gan greu gwrthrych hynod hardd a gynlluniwyd gan John Price o Fachynlleth. Dyma’r bedwaredd Goron i’w chreu ganddo, gan ei fod eisoes wedi creu Coronau 1997, 2001 a 2003. Rhoddir y Goron a’r wobr ariannol eleni gan Seiri Rhyddion Gogledd Cymru
Mae band y Goron yn cynrychioli un o safleoedd treftadaeth y byd, pont ddŵr Froncysyllte, ac mae’r band hwn yn rhan ganolog o’r Goron, a’i bwau’n ffordd o arddangos nifer o ddelweddau eraill. Mae’r cynllunydd yn cymharu’r bont gyda’r Eisteddfod, gan ddatgan bod y Brifwyl yn gyfle i greu pontydd rhwng wahanol sefydliadau, rhwng siaradwyr Cymraeg, dysgwyr a’r di-Gymraeg, ynghyd â’r rheini sydd wedi symud i’r ardal i fyw. Mae’r Eisteddfod yn cynnig rhywbeth i bawb.
Meddai Aled Roberts, Cadeirydd Pwyllgor Gwaith Eisteddfod 2011, “Mae’n bleser gan Bwyllgor Gwaith y Brifwyl dderbyn Coron yr Eisteddfod eleni, a diolch i Brif Gyfrinfa Talaith Gogledd Cymru am eu haelioni. Mae hon yn Goron ysblennydd, ac mae’n llwyddo i adlewyrchu hanes a threftadaeth cyfoethog Wrecsam a’r dalgylch. Mae John wedi creu tair Coron Genedlaethol o’r blaen, a’r dair wedi’u hennill, felly gobeithio bod hyn yn golygu y bydd teilyngdod ar lwyfan y Pafiliwn brynhawn Llun yr Eisteddfod eleni.”
Meddai Ieuan Redvers Jones, Prif Feistr Seiri Rhyddion Talaith Gogledd Cymru: “Rydym i gyd yn cydnabod pwysigrwydd yr Eisteddfod Genedlaethol a’r budd a ddaw i’n diwylliant ac i’r ardal leol, a roeddwm yn falch o’r cyfle i gyflwyno’r Goron eleni.
Ychwanegodd: “Rwy’n gobeithio y bydd y cyflwyniad hwn yn cadarnhau cefnogaeth y Seiri Rhyddion i ddiwylliant a gwerthoedd Cymru. Mae’n bleser personol i mi i gyflwyno Coron Eisteddfod Wrecsam, gan y magwyd fy nhad yn Adwy’r Clawdd. Pob llwyddiant i’r Eisteddfod.”
Mae’r Nod Cyfrin ar ganol y Goron eleni wedi’i wneud o lo, ac meddai John Price, y cynllunydd: “Y peth euraidd i ni fel Cymry yw’r Eisteddfod, a glo oedd ‘aur’ ardal ddiwydiannol Wrecsam, felly roedd yn bwysig bod glo’n cael ei gynnwys rhywle ar y Goron.
“Ar y naill ochr i’r Nod Cyfrin, ceir glowr a gweithiwr haearn, ac mae cerfluniau o’r rhain i’w gweld yng nghanol tref Wrecsam. Yn ogystal, mae cyfraniad addysg, yr eglwysi, y drychineb yng Ngresffordd, y system gamlas, coeden Ywen Penley, sydd yn bum cant oed medd rhai, a dolen drws, sy’n cynrychioli’r ffaith bod yr Eisteddfod yn agor y drws i bawb sy’n byw yn y dalgylch, yn siaradwyr Cymraeg ai peidio, ac mae’n agor y drws ar un o wyliau celfyddydol mawr y byd.”
Cynhelir Seremoni’r Coroni ddydd Llun 1 Awst am 16.30.
Dylai unrhyw un sy’n dymuno mynychu’r seremoni sicrhau bod ganddynt docyn sedd gadw gan y bydd y Pafiliwn yn orlawn ar gyfer y Coroni. Gellir prynu tocynnau ymlaen llaw drwy ffonio 0945 4090 800 neu www.eisteddfod.org.uk, neu gellir eu prynu ar y diwrnod yn y ddwy fynedfa.
Fferm Bers Isaf, oddi ar Ffordd Rhuthun, Wrecsam yw lleoliad yr Eisteddfod eleni, a chynhelir y Brifwyl o 30 Gorffennaf – 6 Awst. Mae trefnwyr yn disgwyl hyd at 160,000 o ymwelwyr yn ystod yr wythnos.
