Mwy o Newyddion
Jessica Lloyd-Jones yn dechrau gwaith ar gomisiwn celf gyhoeddus yn Pontio, Bangor
Mae Jessica Lloyd-Jones, artist o Langollen, wedi dechrau ar gyfnod preswyl fel rhan o gomisiwn celf gyhoeddus ar gyfer Pontio, canolfan gelfyddydau ac arloesi newydd Bangor.
Dros dri mis, bydd Jessica yn datblygu a gwireddu gwahanol syniadau ar gyfer gosodiadau ac ymyriadau yn ymwneud â golau mewn mannau cyhoeddus.
Mae gweithiau safle-penodol blaenorol Jessica yn cynnwys gosodiad golau parhaol yng Nghanolfan Grefftau Rhuthun a golau pensaernïol sy'n ymateb i wynt ym Mhlas Heli, Pwllheli.
Mae ei gwaith yn cyfuno celf, gwyddoniaeth a thechnoleg wrth iddi archwilio perthynas y deunydd a'r prosesau gyda golau, gan greu gweithiau celf a gosodiadau sy'n ein hannog i brofi'r byd mewn ffordd wahanol.
Meddai Jessica: “Mae’n gyfnod cyffrous ac rwy'n edrych ymlaen at y profiad o fod yma yn Pontio.
"Mae'n gyfle unigryw i ymateb i bensaernïaeth yr adeilad newydd, drwy ymyriadau creadigol sy'n archwilio perthynas y deunyddiau â golau i drawsffurfio mannau mewnol yn llefydd synhwyraidd a throchol.
“Mae'r adeilad ar hyn o bryd yn ganfas wag, ac yn un mawr iawn - her sy'n rhoi'r cyfle i arbrofi ar raddfa fawr gydag effaith weledol drawiadol.
"Rwy'n awyddus i ddefnyddio deunyddiau a thechnegau arloesol, a chydweithio â'r gymuned leol o wyddonwyr a thechnolegwyr, yn ogystal â'r cyhoedd.
"Mae gennyf ddiddordeb mewn golau fel ffenomena naturiol a sut y gellir dal a thrawsnewid ei ynni.
"Fy null i fydd ymateb i'r thema gyffredinol ‘Newid Golau', gan gyfeirio at y llif o olau naturiol sy'n dod drwy'r ffasadau gwydr mawr, gan newid drwy'r dydd i mewn i'r nos wrth i olau artiffisial gymryd drosodd, gan oleuo'r adeilad fel ffagl yn y dirwedd.”
Ychwanegodd Elen ap Robert, Cyfarwyddwr Artistig Pontio: “Rydym yn falch iawn o groesawu Jessica yma i Pontio.
"Rydym yn edrych ymlaen yn fawr at weld sut y bydd y gwaith hwn yn datblygu mewn gofod unigryw sy'n cynnig y fath botensial.”
Dilynwch ddatblygiad y project ar sianeli cyfryngau cymdeithasol Pontio #NewidGolau.
Cyllidir elfen celf gyhoeddus Pontio gan Gyngor Celfyddydau Cymru a Phrifysgol Bangor.
