Mwy o Newyddion
Lansio ymgyrch ym Mhen Llŷn i ddelio â beicwyr môr anghyfrifol
Bydd Ymgyrch Neifion yn cael ei lansio ym Mhen Llŷn heddiw er mwyn ei gwneud yn haws i bobl gysylltu â’r awdurdodau os ydynt yn amau fod rhywun yn aflonyddu bywyd gwyllt y môr a thorri Côd Ymddygiad Morwrol.
Yn ymuno ag Aelod Seneddol Plaid Cymru Dwyfor Meirionnydd Liz Saville Roberts bydd Rob Taylor o Uned Troseddau Cefn Gwlad Heddlu Gogledd Cymru ynghyd â’r Cynghorydd lleol R H Wyn Williams, Catrin Glyn o Gyngor Gwynedd a defnyddiwr beic môr yn Abersoch i lansio’r ymgyrch cyn tymor yr haf.
Lansiwyd Ymgyrch Neifion yn dilyn adroddiadau fod beicwyr môr yn aflonyddu a phoeni ddolffiniaid oddi ar arfordir Abersoch a Thywyn yn gynharach eleni.
Dywedodd Liz Saville Roberts AS: “Rwy’n falch o weithio ar y cyd âg Adran Troseddau Cefn Gwlad Heddlu Gogledd Cymru a’r gymuned leol yn Abersoch er mwyn codi ymwybyddiaeth o’r mater pwysig yma.
“Mae’r rhan fwyaf o ddefnyddwyr beiciau môr a chychod yn cydymffurfio â rheolau y Côd Ymddygiad Morwrol ond mae’r rhai sy’n fwriadol aflonyddu a phoeni bywyd gwyllt y môr angen eu dwyn i gyfrif.
“Yn ddiweddar mae sawl adroddiad wedi bod o ddefnyddwyr beiciau môr yn aflonyddu ddolffiniaid oddi ar arfordir gogledd Cymru.
"Yr hyn sy’n amlwg yw fod y cyhoedd yn barod iawn i adrodd hyn i’r awdurdodau ond mae peth dryswch ynglŷn â sut a phwy i’w hysbysu.
“Bwriad yr ymgyrch yma yw hyrwyddo defnydd cyfrifol o gychod a beiciau môr a darparu’r cyhoedd â’r wybodaeth briodol er mwyn hysbysu’r awdurdodau o unrhyw weithred anghyfreithlon.
“Hyderaf bydd pawb sy’n dewis treulio’r haf ar ein harfordir godidog yn ymgyfarwyddo âg Ymgyrch Neifion fel bod ein amgylchedd morol yn derbyn y parch sy’n ddyledus iddi.”
Dywedodd y Rhingyll Rob Taylor: “Mae arfordir gogledd Cymru yn cynnal cynefinoedd a bywyd gwyllt pwysig, felly rydym yn annog perchnogion cychod a beicwyr môr i barchu’r amgylchedd yma bob tro.
“Heddiw rydym yn lansio Ymgyrch Neifion i hyrwyddo ymddygiad cyfrifol ar ein arfordir. Bydd Ymgyrch Neifion yn weithredol trwy gydol yr haf.”
Ychwanegodd y Cynghorydd R H Wyn Williams: “Mae'r bae yma yn Abersoch yn lle prysur iawn gyda sawl math o gychod a nofwyr.
“Mae’n hynod o bwysig fod pawb sy’n defnyddio'r Bae yn ymwybodol o'r rheolau ac mae sawl pamffled a'r gael.”
