Mwy o Newyddion

Bronglais ymysg pedwar ysbyty sy'n treialu oriau ymweld agored

Mae Ysbyty Bronglais, Aberystwyth, yn treialu oriau ymweld agored ar wardiau Meurig.

Mae cynllun peilot un mis o oriau ymweld agored yn cael ei gyflwyno ar draws pedair ysbyty acíwt Bwrdd Iechyd Prifysgol Hywel Dda er mwyn helpu i lywio adolygiad yn eu polisi ymweld â chleifion mewnol.

Fel rhan o'r adolygiad hwn, mae'r Bwrdd Iechyd Prifysgol yn edrych ar bob agwedd o ymweld â chleifion mewnol a bydd yn cynnwys ymgynghori â grwpiau staff a chleifion. Bydd gwerthusiad yn digwydd ar ddiwedd y mis i adolygu llwyddiant y peilot.

Gall ymwelwyr ag Ysbyty Bronglais alw i mewn i weld eu hanwyliaid sy'n cael eu trin ar wardiau Meurig rhwng 2pm ac 8pm bob dydd tan 9 Gorffennaf, 2016.

Dywedodd Caroline Oakley, Cyfarwyddwr Nyrsio, Ansawdd a Phrofiad y Claf: "Pan fydd cleifion yn cael bwyd neu'n derbyn gofal, efallai y gofynnir i ymwelwyr i gamu y tu allan i ardal y ward am gyfnod byr er mwyn rhoi rhywfaint o breifatrwydd i’w anwyliaid ac i helpu staff y ward i gyflawni eu dyletswyddau.

Staff y ward sydd â’r hawl i wneud y dewis hwn, ac rydym yn gobeithio na fydd hyn yn atal teulu a ffrindiau rhag galw heibio – mae’r fantais i gleifion o gael ymwelwyr tra yn yr ysbyty yn enfawr.

"Rydym yn gobeithio y bydd agor wardiau am gyfnod hirach yn rhoi rhywfaint o normalrwydd i gleifion ac yn fwy cyfleus i deuluoedd.

"Byddwn hefyd yn edrych i mewn a allai polisi ymweld mwy hyblyg helpu gyda thagfeydd parcio yn rhai o'n hysbytai.

"Rydym yn gwerthfawrogi y bydd rhai cleifion yn ffafrio oriau ymweld mwy strwythuredig, a byddwn yn trafod hyn gydag unigolion er mwyn sicrhau bod eu dewisiadau personol yn cael eu bodloni."

Bydd cyfle i ymwelwyr roi adborth ar eu profiad, naill ai'n uniongyrchol i Brif Nyrs y ward neu mewn llyfr sylwadau sydd ar gael ar bob ward sy'n cymryd rhan, a bydd hyn yn ffurfio rhan o'r gwerthusiad ar ddiwedd y cyfnod prawf.
 

• Mae Ysbyty Glangwili, Caerfyrddin yn treialu oriau ymweld agored ar wardiau Gwenllian, Ceri a Derwen.
• Mae Ysbyty Tywysog Philip, Llanelli, yn treialu oriau ymweld agored ar Ward 1 a Ward  9.
• Mae Ysbyty Llwynhelyg, Hwlffordd yn treialu oriau ymweld agored ar Ward 3.