Mwy o Newyddion
Côr Gobaith yn dathlu dengmlwyddiant
Bydd Côr Gobaith yn dathlu ei ddengmlwyddiant nos Sadwrn, gyda chyngerdd yng Nghanolfan Morlan, Aberystwyth yn cychwyn am 7.00. Mae'r cyngerdd yn dwyn y teitl 'Côr Gobaith, y deng mlynedd cyntaf gobeithio’.
Yn 2006, yn dilyn cynnal Fforwm Cymdeithasol Cymru yn Aberystwyth, penderfynodd Susie Ennals ddod ynghyd ag eraill i ffurfio Côr Gobaith.
Yr oedd Fforwm Cymdeithasol Cymru yn gynulliad Cymru-gyfan o grwpiau cymdeithas sifil a drefnwyd er mwyn rhannu syniadau a chwilio am ffyrdd newydd o gydweithio.
Yr oedd Susie wedi canu gyda Chôr Cochion, côr sosialaidd Caerdydd sy'n canu'n rheolaidd ar strydoedd y ddinas ac mewn protestiadau.
Mae Côr Gobaith yn canu dros heddwch, cyfiawnder a chynaladwyedd amgylcheddol. Côr stryd ydyw sy'n benderfynol o ddod â cherddoriaeth a gwleidyddiaeth gobaith i ofodau cyhoeddus, a daw ei aelodau mor bell â Machynlleth a Llanbedr Pont Steffan.
Ers ei sefydlu, mae Côr Gobaith wedi canu ar Sgwâr Owain Glyndŵr yn Aberystwyth ar ddydd Sadwrn bob mis yn ddi-ffael.
Yn wreiddiol, ymrwymiad i ganu nes ddiwedd y rhyfel yn Irac oedd hwn, neu o leiaf nes bod Prydain ddim bellach yn rhan o'r weithred anghyfreithlon honno.
Erbyn hyn, mae'r ymrwymiad yn ymwneud ag egwyddorion cyffredinol heddwch, cyfiawnder a chynaladwyedd.
Mae'r côr yn bysgio i godi arian i achosion ac ymgyrchoedd lleol a rhyngwladol.
Yn aml, rhoddir yr arian a godir i Médecins Sans Frontières (Meddygon heb Ffiniau).
Ond mae Côr Gobaith hefyd wedi canu i Medical Aid for Palestinians, Cymorth i Fenywod a changen Aberystwyth o Freedom from Torture.
Bob blwyddyn mae Côr Gobaith yn mynychu'r Ŵyl Corau Stryd ac wedi canu mewn gwyliau ym Manceinion, Brighton, Sheffield, Bury, Hebden Bridge a Whitby.
Yn 2013, tro Côr Gobaith oedd hi i gynnal yr Ŵyl.
Gyda'r haul yn gwenu, gorymdeithiodd tri deg chwech o gorau a rhyw saith cant o bobl lawr Rhiw Penglais i gyd-ganu’n fôr o leisiau ar y prom.
Yr oedd corau o bob rhan o Brydain yn canu a chodi arian o amgylch y dref cyn cynnal cyngerdd mawr yng Nghanolfan y Celfyddydau gyda'r holl gorau yn cymryd rhan.
Derbyniodd yr Ŵyl gefnogaeth nifer o fudiadau, pobl a busnesau yn Aberystwyth, yn arbennig Canolfan y Celfyddydau a Chyngor y Dref.
Bydd y cyngerdd dathlu nos Sadwrn yn adrodd hanes Côr Gobaith trwy lun a chân, ac yn cynnwys delweddau lliwgar o amryw brotest ac ymgyrch dros y blynyddoedd a nifer o ganeuon o blith casgliad helaeth y côr.
Yn ogystal â hen ffefrynnau i gynhesu'r galon, bydd cyfle i glywed sawl cân newydd a gyfansoddwyd gan aelodau'r côr mewn ymateb i faterion cyfredol megis newid hinsawdd, digartrefedd a thlodi.
Mae Cyfarwyddwr Cerddorol cyfredol y côr Nest Howells wedi estyn y casgliad i gynnwys nifer o ganeuon Cymraeg, a hefyd wedi addasu geiriau nifer o ganeuon adnabyddus a chyfieithu caneuon protest o bob rhan o'r byd.
Dywedodd Elin Jones, ymgeisydd Plaid Cymru dros etholaeth Ceredigion yn etholiadau'r Cynulliad: "Hoffwn ddymuno pen-blwydd hapus iawn i Gôr Gobaith.
"Bu'r Côr yn rhan o sawl ymgyrch bwysig, o achub gwasanaethau cyhoeddus i wrthwynebu rhyfeloedd anghyfiawn a chodi arian i ffoaduriaid.
"Mae Côr Gobaith wedi bodloni codi llais dros gymaint o achosion da.
"Gall Ceredigion fod yn falch o'r côr sydd wedi ychwanegu dimensiwn cerddorol newydd i draddodiad hir yr ardal o gefnogi heddwch a rhyng-genedlaetholdeb."
