Mwy o Newyddion

Ymdrechion cartrefi gwyrdd Llafur yn methu ateb yr her

Dywedodd Gweinidog Amgylchedd cysgol Plaid Cymru Llyr Gruffydd nad yw Llafur yn gallu ateb her newid hinsawdd, a bod angen cynlluniau Plaid Cymru i gyflwyno rhaglen effeithiolrwydd ynni newydd i gartrefi os yw Cymru am gwrdd â’i tharged allyriadau.

Beirniadodd Llyr Gruffydd ymdrechion presennol y llywodraeth Lafur i ôl-ffitio cartrefi, gan rybuddio nad yw eu rhaglenni effeithiolrwydd ynni yn agos at y raddfa sydd ei angen i gwrdd â manit yr her. Os aiff ymdrechion y llywodraeth Lafur i ôl-ffitio cartrefi ymlaen ar y raddfa bresennol, dywedodd y cymerai 78 mlynedd i gyrraedd y lefel o effeithiolrwydd ynni sydd ei angen yng nghartrefi Cymru.

Mae Plaid Cymru wedi addo cyflwyno’r rhaglen effeithiolrwydd ynni fwyaf a welodd Cymru erioed.

Dywedodd Llyr Gruffydd: “Byddai llywodraeth Plaid Cymru ar ôl mis Mai yn cychwyn ar y rhaglen effeithiolrwydd ynni cartrefi fwyaf a welodd Cymru erioed. Byddai hon yn rhaglen gwerth biliynau o bunnoedd i drawsnewid yr hyn yw ar hyn o bryd y stoc tai sydd ymhlith y lleiaf ynni-effeithiol yn Ewrop.

“Nid yn unig y byddai hyn yn helpu i greu swyddi, ond fe fyddai hefyd yn mynd i’r afael â thlodi tanwydd ac yn gostwng allyriadau carbon. Ennill, ennill, ennill i Gymru.

“Byddai dod â’r tai sy’n perfformio waethaf i fynyd i raddfa ddigonol yn lleihau allyriadau nwyon tŷ gwydr o dai o 40%, ac yn gostwng nifer yr aelwydydd mewn tlodi tanwydd o 40%, gan leihau biliau ynni i bobl yng Nghymru o £423 miliwn y flwyddyn.

“Byddai hyn yn codi’r nifer sylweddol o 132,000 o aelwydydd allan o dlodi tanwydd, a mantais ychwanegol fyddai lleihau nifer yr afiechydon resbiradol a marwolaethau gaeaf oherwydd oerfel ymysg yr henoed – gan ysgafnhau peth o’r pwysau ar ein gwasanathau iechyd sydd dan straen.

“Ac yn y broses, byddai’n creu 6,000 o swyddi uniongyrchol a thros 14,000 o swyddi gros, pan fyddwch yn ystyried y gwariant ar y gadwyn gyflenwi a’r effaith lluosydd.

“Mae Llafur wedi bodloni ar eu rhaglenni cymedrol fu ond yn gymharol lwyddiannus. Mae’n amlwg nad yw Llafur yn gallu ateb yr her, a bod angen camau mwy pendant. Llywodraeth Plaid Cymru yw’r newid sydd ar Gymru ei angen.”