Mwy o Newyddion
Gwelliannau i T2 yn cwblhau’r gwaith i weddnewid rhwydwaith TrawsCymru
Heddiw, lansiodd y Gweinidog Trafnidiaeth, Edwina Hart, wasanaeth bws newydd a gwell rhwng Bangor ac Aberystwyth. Dyna gam olaf y gwaith i weddnewid gwasanaethau TrawsCymru, a olygodd cyflwyno 46 o fysus newydd ar ei chwe llwybr hir ers 2011.
Yn ogystal â phedwar bws Optare Metrocity newydd gyda seddi mwy cyfforddus, WiFi am ddim a system ddwyieithog i gyhoeddi’r stop nesaf, mae amserlen newydd wythnos saith niwrnod wedi’i chyflwyno er mwyn cael pobl at waith, hyfforddiant a gwasanaethau.
Mae gwelliannau tebyg wedi’u gwneud i chwe llwybr rhwydwaith bws pell TrawsCymru, sy’n derbyn cyllid gan Lywodraeth Cymru. Cludwyd 1.5 miliwn o deithwyr yn 2014/15, mwy nag erioed o’r blaen.
Meddai Mrs Hart: “Y lansiad hwn heddiw o’r gwasanaeth T2 newydd rhwng Bangor ac Aberystwyth yw penllanw rhaglen gynhwysfawr o welliannau i TrawsCymru, sy’n cynnwys darparu cerbydau modern sy’n fwy hygyrch, yn fwy cyfforddus ac sydd â chyswllt gwell â’r Rhyngrwyd.
"Mae Llywodraeth Cymru’n cydnabod mor bwysig yw gwasanaethau bws yng Nghymru, yn enwedig yng nghefn gwlad, er mwyn i bobl allu manteisio ar swyddi a gwasanaethau. Rydym bellach wedi rhoi holl argymhellion y Dr Victoria Winckler a gyhoeddodd yn ei hadolygiad o rwydwaith TrawsCymru ar waith.
“Rydym yn buddsoddi hefyd mewn darparu dros 720,000 o basys bws am ddim i bobl dros 60 oed, pobl anabl ac aelodau’r lluoedd arfog, ac fe gyflwynon ni’r FyNgherdynTeithio yn ddiweddar, sy’n cynnig disgownt i deithwyr 16-18 oed.
"Mae’n dangos ymrwymiad Llywodraeth Cymru i sicrhau bod ein rhwydweithiau bws yn cwrdd ag anghenion cyfnewidiol ein cymunedau ac yn cynyddu’r nifer sy’n teithio arnyn nhw.”
Er 2011, mae 46 o fysus eco-gyfeillgar lloriau isel newydd wedi’u cyflwyno ar chwe llwybr rhwydwaith TrawsCymru, sy’n golygu gwasanaeth amlach a chysylltiadau gwell â’r prif drefi.
Meddai Robert Drewery o Optare, sydd wedi cyflenwi'r bysiau Metrocity newydd i TrawsCymru: “Mae Optare yn dylunio ei bysiau gyda’r environment mewn golwg ac rydym yn falch i gyflenwi'r bysiau newydd Metrocity ar gyfer y gwasanaeth T2.”
Mae gan ragor na 720,000 o bobl docynnau gostyngol yng Nghymru, gan gynnwys aelodau a chyn-aelodau’r lluoedd arfog. Ym mis Medi llynedd, cyflwynodd Llywodraeth Cymru FyNhocynTeithio sy’n cynnig gostyngiad o draean i bobl 16-18 oed ar fysus lleol a theithiau TrawsCymru ledled Cymru.
