Mwy o Newyddion

Pen-blwydd yn sbarduno 50 o resymau dros godi arian i elusen ganser yng Nghymru

Mae unig elusen ymchwil canser unswydd bwrpasol Cymru yn dathlu’i 50fed pen-blwydd yn 2016 gyda lansio her codi arian genedlaethol i bobl Cymru.

A hwythau wedi’u sefydlu yn 1966 gan grŵp bychan o athrawon wedi’u lleoli yn Ysbyty Felindre yng Nghaerdydd, mae Ymchwil Canser Cymru ers hynny wedi tyfu i fod yn fudiad mawr yn y frwydr i ddarganfod triniaethau manwl newydd ar gyfer canser, diagnosis cynnar a chynnydd tuag at iachâd mewn safleoedd ym Mangor, Abertawe a Chaerdydd.

Cefnogir yr elusen gan lawer iawn o bobl gyffredin ledled Cymru, sydd wedi codi miliynau o bunnau drwy gymynroddion, heriau anhygoel i godi arian, rhoddion a phryniannau mewn siopau elusen.  Rhoddir pob rhodd a wneir i Ymchwil Canser Cymru yn syth i’r timau o wyddonwyr blaenllaw, sydd ymysg goreuon y byd, a leolir yma yng Nghymru, er budd cleifion canser ym mhobman.

Yn awr, wrth i’r elusen nodi’i 50fed pen-blwydd, mae’n apelio at bobl Cymru i roi cynnig ar ei hymgyrch ‘Fifty for Fifty’ gan helpu Ymchwil Canser Cymru i barhau â’i waith hanfodol yn y frwydr yn erbyn canser.  

Mae’r her yn syml – p’un ai ei fod yn rhedeg 50 milltir, pobi 50 o deisennau, codi 50 o bwysau neu chwarae 50 o offerynnau, mae Ymchwil Canser Cymru yn gobeithio y bydd eu cefnogwyr creadigol yng Nghymru yn codi cymaint o arian â phosibl, gyda 50 fel thema.  

Mae gan yr elusen hefyd ei hamrywiaeth ei hun o ddigwyddiadau dathliadol ar y gweill i godi arian yn 2016, yn cynnwys taith fawr yn Anialwch y Sahara lle’r ymunir â’r elusen gan gefnogwyr, yn cynnwys y dyluniwr ffasiwn, Julien MacDonald, a chyflwynydd ITV, Ruth Wignall, yn ogystal â digwyddiad awyrblymio, y Naid Fawr Gymreig, Y Ddringfa Fawr Gymreig, apêl colli pwysau ‘Lose Pounds to Raise Pounds’ a llawer mwy o gyfleoedd i bobl ddangos eu cefnogaeth drwy gydol y flwyddyn.

Bydd 2016 hefyd yn dyst i gyhoeddi grantiau mawrion, hynod bwysig gan yr elusen i brosiectau ymchwil cyffrous yng Nghymru a leolir mewn prifysgolion ac ysbytai ledled  Cymru.

Wrth siarad am 50fed Pen-blwydd yr elusen, dywedodd Liz Andrews, Cyfarwyddwr Elusennau Ymchwil Canser Cymru: “Dim ond drwy gefnogaeth pobl yng Nghymru, a redodd, a ddringodd, a feiciodd, a bobodd, a bartïodd, a gasglodd, a siopodd ac a roddodd y mae’r elusen wedi gallu gwneud y fath effaith yn y frwydr yn erbyn canser yn yr 50 mlynedd diwethaf hyn.

“Dengys y ffigurau diweddaraf bod tua 50 o bobl yng Nghymru bob dydd yn cael diagnosis o ganser.  Fodd bynnag, mae mwy o bobl yn goroesi canser nag erioed o’r blaen, gydag ymchwil yn cyfrannu’n sylweddol, diolch i’r datblygiadau a wneir gan wyddonwyr ym meysydd atal, diagnosis cynharach o ganser a gwell triniaethau.  Gall miloedd o deuluoedd ledled Cymru yn awr ddisgwyl treulio mwy o amser gyda’u hanwyliaid, diolch i wyddoniaeth ymchwil canser, ac oherwydd yr ymdrechion codi arian a wneir gan bobl gyffredin.

“Eto, erys digon o waith i’w wneud.  Gwyddom fod un o bob tri o bobl yng Nghymru yn debygol o gael diagnosis o ganser yn ystod eu hoes, ac mae angen mynd i’r afael â hynny.  Po fwyaf o arian a godwn, po fwyaf o fywydau y gallwn helpu i’w hachub a’u gwella yn y dyfodol, a dyna pam ein bod yn apelio at bobl Cymru yn y flwyddyn arbennig iawn hon. 

“Efallai eich bod wedi trechu canser a'ch bod yn cyrraedd 50 eleni ac eisiau dathlu gyda ni; efallai eich bod chi a’ch teulu wedi teimlo effeithiau canser i’r byw.  Mae yna gymaint o gerrig milltir ac atgofion fydd yn ddwys bersonol i bron pawb yng Nghymru y cyffyrddwyd â nhw gan ganser, ac yn 2016 bydd yna o leiaf 50 o resymau i godi arian gyda ni ac i wneud gwahaniaeth positif.”

Hanner cant o Syniadau Codi Arian

Gwirfoddoli 50 o oriau yn un o’n siopau elusen

Codi £50 drwy helpu gydag un o’n casgliadau mewn bwced

Beicio 50 milltir

Rhoddi £50 drwy’n tudalen Just Giving

Pobi 50 o deisennau cwpan

Rhedeg 50 cilometr

Dim yfed alcohol am 50 niwrnod

Gwau 50 o sgarffiau

Rhedeg 50 lap trac rhedeg

Cwblhau 50 o sesiynau yn y gampfa

Codi pwysau 50 o weithiau

Cerdded 50 milltir dros nifer penodol o ddyddiau

Bod yn ddistaw am 50 awr

Dim bwyta siocled am 50 niwrnod

Dim yfed te am 50 niwrnod

Nofio 50 hyd pwll nofio

50 cilometr ar felin draed

50 awr o Swmbathon

Marathon 50 awr o daflu dartiau

Darllen 50 o lyfrau

Felothon 50 awr dan do

50 o gylchynnau hwla

Taflu crempogau 50 gwaith

Ymarferion gwthio i fyny 50 gwaith

Ymarferion eistedd i fyny 50 gwaith

Dysgu dweud ymadrodd mewn 50 o ieithoedd

Fel grŵp, colli 50 pwys o bwysau

Codi 50 cilogram

Marathon 50 awr o ffilmiau

50fed parti pen-blwydd

Eillio 50 o bennau

Abseilio 50 troedfedd

Dringo 50 rhes o risiau

Cadw 50 o oedau carwriaeth

Ysgrifennu 50 o flogiau

Rhoi cynnig ar 50 ystum ioga

Rhoddi 50 o eitemau i siop Ymchwil Canser Cymru

Plicio 50 o datws

Cael 50 o dyllau chwarae golff

Bod yn llysieuwr(aig) am 50 niwrnod

Cael 50 o stripiau cŵyr

Bwyta 50 toesen

Gwau 50 o hetiau

50 steil gwallt

Chwarae 50 o gemau tenis

Cael 50 tatŵ

50 awr o chwarae bingo

Cynnal 50 o foreau coffi

Pobi 50 o fathau o deisennau

Rhoi cynnig ar 50 o ryseitiau newydd