Mwy o Newyddion

Plaid Cymru yn gwrthwynebu “statws eilradd” Mesur Cymru

Mae Plaid Cymru wedi rhybuddio Ysgrifennydd Gwladol Cymru fod yn rhaid iddo wella Mesur Cymru yn sylweddol os yw am roi i Gymru y setliad sydd ei angen.

Wrth drafod argymhellion y Pwyllgor Materion Cyfansoddiadol a Deddfwriaethol yn eu hadroddiad ar Fesur Cymru, croesawodd arweinydd Plaid Cymru Leanne Wood y ffaith fod y pwyllgor wedi cytuno â llawer o safbwyntiau Plaid Cymru ar y Mesur.

Dywedodd fod y problemau gyda’r Mesur yn cynnwys diffyg awdurdodaeth gyfreithiol; fod gormod o faterion wedi eu cadw’n ôl; mater cydsyniadau’r goron; a mater “profion angenrheidrwydd” a ddehonglwyd fel feto posib.

Dywedodd Leanne Wood: “Mae gan Blaid Cymru lawer o bryderon am Fesur Cymru, ac yr wyf wedi datgan yn glir wrth yr Ysgrifennydd Gwladol na allwn ei gefnogi ar ei ffurf bresennol.

“Mae adroddiad y Pwyllgor Materion Cyfansoddiadol a Deddfwriaethol yn dweud yn glir fod angen cryfhau’r Mesur hwn yn sylweddol cyn iddo gael cefnogaeth y Cynulliad Cenedlaethol.

"Rwy’n falch fod aelodau’r Cynulliad Cenedlaethol o bob plaid wedi siarad ag un llais heddiw ac wedi gwrthod Mesur Cymru annigonol Llywodraeth y DG.

“Mater i Lywodraeth y DG yn awr yw rhoi i Gymru y setliad mae’n haeddu.

"Bydd Plaid Cymru yn cynnig y dylai’r Cynulliad barhau i flocio unrhyw fesur drafft sy’n trin Cymru yn eilradd o gymharu â’r gwledydd datganoledig eraill.”