Mwy o Newyddion
Difaterwch Llywodraeth San Steffan yn peryglu dyfodol S4C medd AS Plaid Cymru
Mae AS Plaid Cymru dros Ddwyfor Meirionnydd, Liz Saville Roberts wedi galw am adolygiad annibynnol i ddyfodol S4C yng nghanol ofnau fod darlledu yn yr iaith Gymraeg o dan fygythiad dirfawr yn sgil toriadau niweidiol.
Wrth siarad o flaen dadl heddiw ar S4C, dywedodd Liz Saville Roberts AS byddai diwylliant o doriadau parhaus i'w chyllid yn tanseilio rôl unigryw y sianel fel yr unig ddarlledwr teledu cyfrwng Cymraeg.
Mae Liz Saville Roberts hefyd yn mynegi pryderon am y dull a ddefnyddir gan y llywodraeth i gofnodi ffigurau gwylio ar gyfer y sianel.
Meddai: “Mae Plaid Cymru wedi rhybuddio dro ar ôl tro yn erbyn torri parhaus ar gyllideb S4C, sydd wedi cael ei dorri 35% ers i'r llywodraeth ddod i rym yn 2010.
"Mae hyn wedi cael ei waethygu gan benderfyniad y llywodraeth i dorri grant uniongyrchol unwaith eto, y tro hwn o 26%.
"Mae Torïaid Cymru wedi torri eu hymrwymiad maniffesto eu hunain a chefnu ar eu haddewid i ddiogelu cyllid ac annibyniaeth golygyddol S4C.
"Mae Plaid Cymru yn galw am adolygiad annibynnol i sut ariannir S4C yn y dyfodol ynghyd â rôl y sianel.
"Mae perygl gwirioneddol y bydd y rôl hanfodol a chwaraeir gan S4C wrth gefnogi diwylliant Cymreig i ledu'r defnydd o'r iaith Gymraeg ymhlith siaradwyr ifanc yn cael ei anwybyddu yn Adolygiad Siarter y BBC sydd o’n blaenau, ynghyd ag obsesiwn llywodraeth Dorïaidd San Steffan gyda toriadau pellach.
"Ar ben hynny, mae'r dull presennol a ddefnyddir y llywodraeth i gofnodi nifer y gwylwyr y mae S4C yn ei ddenu - y dull BARM - ar y gorau yn annigonol ac ar y gwaethaf yn gamarweiniol, gan ei fod yn methu â chymryd i ystyriaeth gwylwyr iau a rhai sy'n troi at y sianel drwy’r cyfryngau digidol, sydd yn cynnwys nifer o bobl tu allan i Gymru.
"Mae'n ddull hen-ffasiwn o ddehongli barn y gynulleidfa sydd yn anochel yn cynhyrchu canlyniadau anghywir.
"Mae Ofcom eisioes wedi cydnabod bod gan Gymru ddiffyg lluosogrwydd y cyfryngau.
"Er mwyn atal y duedd hon sy'n peri pryder mawr a diogelu darlledu gwasanaeth cyhoeddus yng Nghymru, mae angen i'r llywodraeth gydnabod pwysigrwydd cynnal annibyniaeth S4C ac ymrwymo fel mater o frys i ddiogelu ei chyllid fel yr unig ddarparwr darlledu trwy gyfrwng y Gymraeg.
"Bydd Plaid Cymru yn parhau i gyflwyno'r achos cryfaf i drosglwyddo cyfrifoldeb dros ddarlledu o San Steffan i Gymru; yn sicr byddai hunaniaeth ac unigoliaeth S4C yn cael ei gwasanaethu'n well petai penderfyniadau ynglŷn a’i dyfodol yn cael eu gwneud gan sefydliad democrataidd sy’n uniongyrchol atebol i bobl Cymru.”
