Mwy o Newyddion

Y Gymraeg: Dyfodol i'r Iaith yn galw am gyfarfod byrs

Mae Dyfodol i'r Iaith yn gofyn am gyfarfod brys gyda'r Prif Weinidog, Carwyn Jones, i gael esboniad am fwriad y Llywodraeth i dorri gwariant ar y Gymraeg. Daw'r cais yn sgil cyllideb ddrafft y Llywodraeth sy'n amlinellu'r bwriad i dorri £1.6 miliwn (19%) o gyllid y Gymraeg.

Nid yw'n glir a yw £1.2 miliwn arall sy'n cael ei neilltuo ar gyfer y Gymraeg yn y gymuned yn ychwanegol, ond hyd yn oed os ydyw, bydd gwariant ar y Gymraeg yn cael ei leihau gan £400,000.

Yn ôl Dyfodol i'r Iaith, mae'r toriad sylweddol hwn yn tanseilio'n llwyr hyder yn ymrwymiad y Llywodraeth i'r Gymraeg, gan fod yr arian yma'n debygol o effeithio ar fentrau a phrosiectau sy’n gwneud gwir wahaniaeth i'r iaith. Mae Dyfodol i'r Iaith am weld cynnydd sylweddol yn yr arian i gefnogi siaradwyr newydd o bob oed i ddefnyddio'r Gymraeg mewn cyd-destunau allweddol i'w dyfodol; y cartref, y gymuned, siopau, busnesau a bywyd cymdeithasol.

Mae'r Llywodraeth wedi llwyddo i gynyddu gwariant mewn sawl maes, ond nid y Gymraeg.

Dywed Heini Gruffudd, Cadeirydd Dyfodol: " Ni allwn gyrraedd y nod o Gymru ddwyieithog heb ymrwymiad brwd gan y Llywodraeth. Mae angen rhaglenni hyrwyddo eang i hybu defnydd o'r iaith ac i gynyddu siaradwyr. Heb ddiogelu'r elfen sylfaenol hon, daw unrhyw fesur rheolaethol, megis y safonau iaith yn gynyddol ddibwys."

"Byddwn yn pwyso am gyfarfod gyda'r Prif Weinidog cyn gynted â phosib i gael eglurhad o'r sefyllfa ac i bwysleisio pwysigrwydd allweddol y cyllid hwn i dwf y Gymraeg."

Llun: Heini Gruffudd