Mwy o Newyddion

Plaid Cymru yn galw am gyflymu trydaneiddio’r rheilffyrdd

Mae Plaid Cymru wedi cyflwyno cynnig yn gresynnu at yr oedi pellach cyn trydaneiddio’r brif reilffordd rhwng Caerdydd ac Abertawe.

Cyflwynwyd y datganiad o farn yn y Cynulliad Cenedlaethol gan yr Aelodau Cynulliad Simon Thomas a Bethan Jenkins. Mae’r cynnig yn galw am i lywodraethau weithio ynghyd i beri i drydaneiddio rheilffyrdd yng Nghymru ddigwydd.

Dywedodd Simon Thomas: "Mae’n siom enbyd fod dyddiad cychwyn trydaneiddio wedi ei roi yn ôl eto fyth. Mae Plaid Cymru yn galw ar Lywodraeth y DG a Llywodraeth Cymru i weithio i wneud yn siwr fod trydaneiddio ein rheilffyrdd yn digwydd ledled Cymru.

"Os methant wneud hynny, byddant yn difetha’r waddol a adawyd gan Blaid Cymru mewn llywodraeth pan weithiodd Ieuan Wyn Jones fel Gweinidog Trafnidiaeth Cymru yn ddiflino i wneud trydaneiddio yn flaenoriaeth. Bydd y trydaneiddio i Abertawe yn hwb go-iawn nid yn unig i’r ddinas ond i holl economi’r gorllewin."

Ychwanegodd  Bethan Jenkins: “Ar y naill law, mae gennym Lywodraeth Geidwadol yn y DG yn amharod neu’n analluog i gyflwyno prosiectau seilwaith mawr, ac ar y llaw arall, mae gennym Lywodraeth Lafur Cymru yn amharod neu’n analluog i bwyso arnynt i fwrw ymlaen â’r gwaith.

“Yn y cyfamser, mae economi de-orllewin Cymru a thu hwnt ar ei cholled. Cyflwynwyd y datganiad barn hwn fel dull o gynnu tân dan y ddwy weinyddiaeth fel ei gilydd, ac yr wyf yn gobeithio y bydd ACau eraill sy’n teimlo’r un mor rhwystredig â ni yn atodi eu henwau i’r hyn mae’n galw amdano.”

Llun: Bethan Jenkins