Mwy o Newyddion

Galw ar Awdurdod i greu gwefan dwyieithog

Heddiw cyhoeddodd Comisiynydd y Gymraeg adroddiad ymchwiliad statudol i ddiffyg gweithrediad Cynllun Iaith Gymraeg Awdurdod Parc Bannau Brycheiniog.

Penderfynodd y Comisiynydd gynnal ymchwiliad statudol dan adran 17 Deddf yr Iaith Gymraeg 1993 yn dilyn derbyn adroddiad monitro blynyddol yr Awdurdod. Wrth gynnal yr ymchwiliad nod y Comisiynydd oedd canfod a fu methiant gan yr Awdurdod i weithredu ei gynllun iaith Gymraeg wrth lansio’r wefan www.breconbeacons.org.

Yn ei hadroddiad mae’r Comisiynydd o’r farn bod yr Awdurdod wedi cyflawni cymal 3.1 o’i gynllun iaith drwy roi ystyriaeth i’r angen i ddarparu fersiwn ddwyieithog o’r wefan wrth lunio’r tendr cychwynnol. Ond ar ôl ystyried y dystiolaeth fe ddaeth hefyd i’r casgliad fod yr Awdurdod wedi methu â chyflawni cymal 4.5 yn ei gynllun iaith drwy beidio â lansio gwefan oedd yn arddangos testun Cymraeg a methu gwneud trefniadau pwrpasol i gyfieithu testun Saesneg y wefan.

Ymhellach, o’r wybodaeth a ddarparwyd, fe ddaeth y Comisiynydd i’r casgliad fod y Awdurdod wedi methu â chyflawni cymal 6.6.2 o’i gynllun iaith gan nad oedd unrhyw dystiolaeth ei fod wedi annog y bartneriaeth yr oedd yn gweithredu ynddi i fabwysiadu polisi dwyieithog.

Mae’r Comisiynydd wedi gwneud pedwar argymhelliad i’r Awdurdod:

o   Dylai’r Awdurdod lunio cynllun adfer manwl gyda’r nod o sicrhau gwefan gyrchfan ddwyieithog.

o   Dylai’r Awdurdod ddiwygio canllawiau golygyddol ei wefan er mwyn osgoi cyhoeddi gwefannau nad ydynt yn ddwyieithog yn y dyfodol.

o   Dylai’r Awdurdod annog Partneriaeth Cyrchfan Cynaliadwy Bannau Brycheiniog i fabwysiadu polisi dwyieithog.

o   Dylai’r Awdurdod osod trefn mewn lle i sicrhau bod unrhyw ddeunydd marchnata a gyhoeddir gan yr Awdurdod, pan mae’n gweithredu fel partner mewn consortiwm, yn ddwyieithog.

Mae amserlen benodol wedi ei gosod ar gyfer gweithredu’r argymhellion hyn. Bydd swyddogion y Comisiynydd yn monitro sut caiff yr argymhellion eu cyflawni.