Mwy o Newyddion
S4C yn penodi Cyfarwyddwr Cyfathrebu ac Ymwneud
Mae S4C wedi cyhoeddi fod Gwyn Williams wedi cael ei benodi i swydd newydd Cyfarwyddwr Cyfathrebu ac Ymwneud.
Mae gan Gwyn Williams brofiad helaeth yn y byd darlledu, ac mae wedi cynhyrchu a chyfarwyddo cyfresi di-ri yn estyn o'r gyfres Hel Straeon ar ddiwedd y 1980au i ddarllediad byw Ras yr Wyddfa yn 2005.
Mae ei brofiad yn y maes darlledu yn cynnwys sawl rôl allweddol, yn cynnwys Prif Weithredwr cwmni Barcud yng Nghaernarfon (2007-2010), ac ef hefyd oedd un o sylfaenwyr y cwmni cynhyrchu Cwmni Da.
Cyn hynny, yn y 1990au roedd Gwyn yn un o sylfaenwyr cwmni cynhyrchu annibynnol arall, FiTi-TiFi oedd yn creu rhaglenni ffeithiol a rhaglenni i blant. Mae hefyd wedi gweithio fel yn llawrydd i nifer o gwmnïau annibynnol a'r BBC, ac mae ganddo brofiad o'r byd newyddion fel cyfarwyddwr Newyddion BBC Cymru.
Yn fwy diweddar, Gwyn Williams oedd Cyfarwyddwr Cyfathrebu, Hybu a Gweinyddu Comisiynydd y Gymraeg, ble bu'n gweithio am dair blynedd a hanner. Mi fydd yn gadael y swydd honno er mwyn ymuno â thîm S4C ym mis Tachwedd.
PERTHNASOL: Cyhoeddi adroddiad ymchwiliad i ddiffyg gweithrediad Cynllun Iaith Gymraeg Awdurdod Parc Bannau Brycheiniog
Dywedodd Gwyn Williams; "Ar ôl dros dair blynedd hapus a chyffrous iawn gyda Chomisiynydd y Gymraeg, rwy'n edrych ymlaen at her newydd gydag S4C.
"Dyma sector dwi'n deall yn dda, ond yn gwybod hefyd fod heriau sylweddol yn wynebu S4C fel nifer o ddarlledwyr cyhoeddus eraill dros y blynyddoedd nesaf.
"Bydd cael gweithio gyda'r tîm brwdfrydig yn S4C ar gyfnod anturus yn faint. Rhaglenni da yw corff ac enaid y sianel ac mae'r cyfle i gydweithio gyda chynhyrchwyr talentog yn un o'r pethau rwy'n edrych ymlaen ato fwyaf."
Dywedodd Ian Jones, Prif Weithredwr S4C; "Llongyfarchiadau i Gwyn Williams ar ei benodiad i'r swydd newydd hon.
"Yn ogystal â phrofiad lefel uchel yn y byd cyfathrebu a hyrwyddo, mae Gwyn yn adnabod y byd darlledu yn dda, ac mi fydd y profiad yma yn allweddol iddo yn y rôl newydd hon gyda S4C.
"Rwy'n edrych ymlaen at ei groesawu i blith y staff yn fuan ac i gyd-weithio'n agos ag ef mewn cyfnod sy'n frith o heriau i S4C. Bydd ei brofiad yn werthfawr i'r sianel yn y misoedd a'r blynyddoedd i ddod."
