Mwy o Newyddion

Croesawu llwyddiant Cymru ym maes allforio

Mae Gweinidog yr Economi wedi croesawu'r ffigurau allforio diweddaraf sy'n dangos bod Cymru wedi perfformio'n well na gwledydd eraill y DU dros y flwyddyn ddiwethaf.
 
Mae ffigurau allforio nwyddau chwarter cyntaf 2014 a gyhoeddwyd ddoe gan Gyllid a Thollau Ei Mawrhydi yn dangos mai Cymru welodd y gyfradd fwyaf o gynnydd mewn allforion o bedair gwlad y DU ar gyfer y cyfnod a ddaeth i ben ym mis Mawrth 2014, a'r cynnydd mwyaf ond un o holl wledydd a rhanbarthau'r DU dros yr un cyfnod.
 
Dywedodd Edwina Hart, Gweinidog yr Economi: "Dyma rywbeth cadarnhaol arall sy'n dangos bod economi Cymru yn perfformio'n well na rhannau eraill y DU.

"Mae masnach ryngwladol wedi bod yn flaenoriaeth i ni erioed, ac ers 1999 mae cynnydd o 129.1% wedi bod mewn allforion o Gymru, sef y cynnydd mwyaf o holl wledydd y DU a rhanbarthau Lloegr.
 
"Wythnos nesaf byddwn yn anfon taith fasnach i Dde Affrica, sy'n cyd-fynd â thaith haf y tîm rygbi cenedlaethol, i adeiladu ar ein proffil uwch yn ystod y cyfnod hwnnw. Dyma un o gyfres o deithiau masnach ac arddangosfeydd tramor mewn 18 o wledydd gwahanol ar draws y byd a gaiff eu cynnal eleni.

"Mae gennym ni hefyd raglen gynhwysfawr o gymorth i helpu busnesau i ddatblygu marchnadoedd allforio sy'n bodoli eisoes a rhai newydd. Mae'r farchnad ryngwladol hefyd yn bwysig o ran denu prosiectau mewnfuddsoddi i Gymru ac rydym yn gosod y safon yn y maes hwnnw hefyd wrth i nifer y prosiectau buddsoddi gynyddu o bron 200% y llynedd, yn ôl ffigurau UKTI."