Mwy o Newyddion
Symud myfyrwyr o brotest yn erbyn cau Neuadd Pantycelyn
MAE Undeb Myfyrwyr Cymraeg Aberystwyth yn dweud fod Llywydd Prifysgol Aberystwyth, Syr Emyr Jones Parry, wedi gorchymyn i swyddogion diogelwch y Brifysgol symud myfyrwyr oedd yn cynnal protest y bore yma y tu allan i gyfarfod Cyngor Prifysgol Aberystwyth er mwyn tynnu sylw at eu hymgyrch yn erbyn cau Neuadd Pantycelyn fel llety ar gyfer myfyrwyr Cymraeg.
Daw'r brotest yn dilyn cyfarfod ddydd Mercher, pan ddaeth rhai o gyn Lywyddion UMCA i Aberystwyth i gwrdd â'r Is-Ganghellor ac uwch swyddogion y Brifysgol gyda'r myfyrwyr presennol, er mwyn dangos cefnogaeth i ymgyrch y myfyrwyr.
Yn y cyfarfod hwnnw, nododd yr Is-Ganghellor yr Athro April McMahon yn eglur mai penderfyniad Cyngor y Brifysgol oedd cau Neuadd Pantycelyn fel llety i fyfyrwyr Cymraeg, gan awgrymu nad oedd modd i reolwyr y Brifysgol newid y polisi hwnnw heb benderfyniad o'r newydd gan y Cyngor.
Meddai Mared Ifan, Llywydd UMCA: “Rydyn ni'n falch o'r gefnogaeth sydd wedi bod i'n hymgyrch ni gan gynfyfyrwyr a phobl Cymru yn gyffredinol. Mae'r Is-Ganghellor wedi nodi'n eglur mai Cyngor y Brifysgol sydd wedi penderfynu cau Neuadd Pantycelyn. Rhaid i'r myfyrwyr fynd â'r achos i aelodau'r Cyngor felly.
“Mae Pantycelyn yn hanfodol i'r gymuned Gymraeg ym Mhrifysgol Aberystwyth. Ddylai Emyr Jones Parry ac aelodau'r Cyngor ddim cau llais y myfyrwyr allan.
"Yn hytrach dylen nhw wrando ar lais y myfyrwyr a chefnogwyr ledled Cymru, a newid y penderfyniad yma a fydd yn niweidiol iawn i'r Gymraeg. Mae'n rhaid cadw Pantycelyn fel llety i fyfyrwyr Cymraeg ar ôl 2014-15”.
Mewn datganiad yn dilyn y brotest dywed Prifysgol Aberystwyth eu bod yn parchu hawl myfyrwyr i brotestio.
"Cafwyd protest gan nifer fach o fyfyrwyr y bore yma parthed cynlluniau’r Brifysgol i adleoli cymunded Gymraeg myfyrwyr y Brifysgol i ddatblygiad newydd Fferm Penglais.
"Bu Sir Emyr, Llywydd y Brifysgol, yn trafod â’r grwp gan nodi ei fod yn hapus iddynt barhau â’u protest ar yr amod eu bod yn gallu gwneud hynny heb darfu ar allu’r cyfarfod i fynd i’r afael â’r gwaith sylweddol o’u blaenau.
"Oni bai eu bod yn gallu gwneud hynny, gofynnwyd iddynt ystyried symud, ac fe gytunon i wneud hynny."
