Mwy o Newyddion
Lansio cystadleuaeth er cof am T. Llew Jones
Bydd cystadleuaeth newydd yn cael ei lansio yn enw’r awdur poblogaidd T. Llew Jones i hyrwyddo llyfrau Cymraeg i blant.
Caiff y gystadleuaeth newydd hon ei lansio ar Ddiwrnod T. Llew Jones (11 Hydref, diwrnod ein ben blwydd) gan ei feibion, Emyr Llywelyn a Iolo Jones, fel rhan o’r dathliadau a gynhelir yn flynyddol gan ysgolion ledled Cymru. Trefnir y gystadleuaeth gan Gronfa Goffa T. Llew Jones.
“Buom yn ystyried yn ofalus sut orau i ddathlu gwaith un o awduron mwyaf poblogaidd Cymru,” meddai Owenna Davies, Cadeirydd y Gronfa Goffa, “ac roedd yn naturiol i ni ddewis hybu maes llyfrau plant, oedd mor bwysig yng ngolwg T. Llew ei hunan. Roedd bob amser yn pwysleisio mai ysgrifennu ar gyfer y darllenwyr ifanc oedd ei fwriad ac mai trwy greu stori gref, anturus roedd modd apelio at ddychymyg y plant. Teimlwn yn hyderus y bydd awduron profiadol a newydd yn ymateb i’r her, ac fe fyddai ennill Cystadleuaeth T. Llew Jones yn glod arbennig i unrhyw awdur.”
Gofynnir i’r ymgeiswyr gyflwyno pennod gyntaf o nofel i blant rhwng 10 a 12 oed, ynghyd â chrynodeb syml o weddill y stori, erbyn y dyddiad cau ar ddiwedd Ionawr 2013. Bydd Cronfa Goffa T. Llew Jones yn cyflwyno gwobr o £300 i’r enillydd.
Yn achos nofelau a fabwysiedir yn ddiweddarach gan gyhoeddwr, bydd posibilrwydd o dderbyn comisiwn awdur o hyd at £2,000 dan nawdd Cyngor Llyfrau Cymru.
“Fel awdur, trawsnewidiodd T. Llew Jones y ddarpariaeth ym maes llyfrau Cymraeg i blant,” meddai Elwyn Jones, Prif Weithredwr y Cyngor Llyfrau, “gan gyhoeddi llyfrau anturus oedd wrth ddant y darllenwyr ifanc. Pa ffordd well, felly, i’w gofio na thrwy sicrhau deunydd darllen i blant fydd yn llwyr deilwng o’i enw?”
Bydd Llenyddiaeth Cymru hefyd yn cefnogi a hyrwyddo’r gystadleuaeth, ac ychwanegodd Lleucu Siencyn, y Prif Weithredwr: “Rydym yn falch iawn o gael bod yn rhan o drefniadau’r gystadleuaeth newydd hon gan sylweddoli pwysigrwydd hyrwyddo llenyddiaeth plant, a hynny yn enw brenin llyfrau plant Cymru.”
Ceir gwybodaeth lawn am y gystadleuaeth ar wefan Cronfa Goffa T. Llew Jones – www.tllewjones.com – a sefydlwyd yn unswydd i goffáu cyfraniad yr awdur i lenyddiaeth Cymru.
