Y Cymro

Superb Skoda - Car o sylwedd enillodd sylw

2016-09-05T00:00:00+1:00

DYWEDIR mae Vaclav Havel, diweddar Arlywydd y Tsiec-Weriniaeth fu’n gyfrifol am Superb 2001 Skoda. Erbyn 1999 rhoddodd Tryciau Tatra’r gorau i wneud ei car mawr (a swyddogol y llywodraeth). Gofynnodd Havel i Skoda (eiddo i VW ers degawd) am rywbeth yn ei le. Cafwyd gafael ar lwyfan Audi estynedig gan Grŵp VW Tseina, ei ail-gorffori ac atgyfodi enw pencar Skoda’r 30au.

Camp fu lansio car safonol ei faint i ganol tiriogaeth “glaswaed” Ewrop. Ond wedi saith mlynedd a 170,000 (bu diwygio arno yn 2006) gellid cyfiawnhau olynydd yn 2008. Gyrriant blaen eto a mwy confensiynol ond arlwy ehangach: 4x4, e.e.

Mwy o faint eto na rhelyw’r ‘canol-uwch’ (cymaint â char safonol y garfan uwch) ac, er siap sedan-debyg, hatch ydoedd. Allweddol fu lansio fersiwn Ystâd arno yn 2009 a bu cryn ddiwygio yn 2013 gan gynwys peiriannau newydd mwy darbodus.

Daeth Superb newydd fis Medi’r llynedd (hatch ac ystâd gyda’i gilydd). Mymryn mwy eto, hwy hefyd y sail olwyn (pellter rhwng yr echelau). Mwy o le i drigolion y sedd ôl na llawer i gar “mawr” ac ar eu hennill yw’r gyrrwr a chyd-deithiwr blaen.

Cam pellach ym menter (un sylfaen hyblyg) MQB enfawr Grŵp VW, chwaer-gar yw’r Superb III i Passat VIII VW. (Dan adain yr MQB yw modelau uwch-fini hyd at y canol-uwch tra chyfundrefn MLB/MLBevo sy’n gofalu am y mwy ac amgenach.)

O ganlyniad, unplyg-wytnach ond ysgafnach yw corff y Superb newydd meddid – hyn er budd llwnc a CO2: 1.4 TSI 125 petrol (125g/km-Treth Ffordd ‘D’ a £110); 1.6 TDI 120 Diesel ‘Greenline’ (95g/km-Tr.Ff.’A’ a £0). Amrywio rhwng £19,005 a £34,120 wna prisiau gofyn arlwy cyfan yr hatch; £20,205-£35,320 yr Ystâd.

Petrol: 1.4 TSI 125/150; 2.0 TSI 220/280. Diesel 1.6 TDI 120; 2.0 TDI 150/190. Chwe ger nerth braich neu 6/7 DSG (deu-afael awto heblaw’r 1.4 TSI 125). Gyrriant 4x4 ar gael gyda’r 2.0 TDI 150 (6NB)/190 (DSG) a 2.0 TSI 280 (DSG).

‘S’, ‘SE’, ‘SE L Executive’ a ‘Laurin & Klement’ yr ystod. Rhaid esgyn i barthau’r SE L Executive cyn cael mordwyo lloeren ysywaeth: £24,640-£31,885. Ond daw ‘Smart Link’ gyda’r SE (£21,610-£25,255) sy’n cydweithio â MirrorLink, Apple Car Play ac Android Auto all hefyd gynnig mordwyo trwy app ffon fudol. Sgrin 8” dasfwrdd yr SE sy’n gyfrwng (radio hefyd) megis y modelau drytach.

Daw’r adnoddau cyfathrebu/cyswllt a gwybodaeth/diddanu disgwyledig gyda phob un (Bluetooth ac ati) ynghyd â WiFi yn yr SE L Executive ac L&K. Mae cymorth parcio (ôl yn unig) ar yr SE tra llidiart ôl trydan a dyfais addasu ymateb y car ddaw gyda’r SE L Executive. Serch atyniadau (cysur a chyfarpar) yr L&K, modelau rhatach na £30,000 fydd yn denu. Y dewis amlwg o hyd yw’r Ystâd 2.0 TDI 150 a 6-ger nerth braich. Ond mae dau beiriant petrol tra-chyhyrog hefyd.

Peiriant Golf GTi VW yn wreiddiol, daeth y 2.0 TSI 220 ar gael gyda’r SE L Exec neu L&K (os DSG-awto’r unig gyfrwng yma). Felly hefyd y 2.0 TSI 280 grymusaf er ychwanegu 4x4: pen-peiriant Scirocco R (gyrriant blaen) VW yw hwn.

Cydnerth ond darbodus yw’r TSI 280 a mwy nag atebol y car yntau (caffaeliad y 4x4). Cysur y flaenoriaeth, ‘d oes ganddo mo osgo manwl-ddanteithiol y GTi ond sicr ei droedle ydyw. Diymhongar (dim bathodyn “vRS”) ond ymhlith goreuon y canol-uwch gwerinol os nad deinamaidd gystal â Mondeo Ford neu’r Mazda6.

Mwy amlwg-gaboledig yw’r Passat neu V60 Volvo hwythau’n ymylu at grachach y dosbarth canol. Agosau at y cyfryw grachach wna pris gofyn y Skoda hwn ond o daro bargen glos, wele gar o sylwedd, mwy lawer o faint, enillodd gryn sylw.

Manylion: SE L Executive 2.0 TSI 280 DSG 4x4; £31,445-£32,745; 155mya; 0-62mya 5.8 eiliad; 39.8myg swyddogol; 31 ar brawf (Gwibiadur); CO2 160-164 g/km; Tr.Ff.’G’/£185; Yswiriant 27E; Uchafbwys ôl-gerbyd a breciau 2,200kg.

Clubman MINI: Ystâd fechan, heini, egniol a ffasiynol

2016-06-07T00:00:00+1:00

CAMP BMW wrth atgyfodi’r MINI yn 2001 fu ail-greu doniau deinamaidd y gwreiddiol gyda char uwch-fini ei faint a drytach. Apeliodd at “yr ifanc” – nid car teulu bychan rhad mwyach. Daeth ail epil y llinach gyfoes yn 2006 a’r Clubman cyntaf yn 2007.

“Traveller” (Morris Mini Traveller gynt) fu’r bwriad ond gan eraill oedd yr hawl i’r enw a dyna droi at ‘Clubman’. Ymgais i adnewyddu’r Mini oedd y Clubman cyntaf (1969-1982).

Hirach oedd fersiwn ystâd hwnnw ar sail y fen fasnachol fechan ac arddel drysau cefn hwnnw wnaed megis y Traveller (“Countryman” os dan fathodyn Austin).

Gyda Clubman 2007 daeth corff hirach fymryn eto ond mwy o le ar gyfer trigolion y sedd ôl. Go fychan y ‘gist’ o hyd ond, o blygu’r sedd gefn wele ofod eitha’ sgwar-helaeth.

Arddel drysau fen-debyg y tu ôl wnaed hefyd: adlais “amlwg-retro” braidd ond agor yn ddefnyddiol lydan a sychwr-olchwr ar gyfer ffenest y naill a’r llall.

Ychwanegwyd un sgil-ddrws ar yr ochr dde (ochr y gyrrwr yma) – hanner maint un cyffredin gan agor allan o’r tu ôl yn yr hen ddull. Tri drws oedd patrwm sylfaenol y car a buasai’n rhaid symud y tanc petrol os am osod drws tebyg ar yr ochr arall.

Daeth y MINI diweddaraf yn 2014 a’r Clubman newydd y llynedd: 4 drws cyfarwydd bellach ond deu-ddrws ôl megis cynt. Teulu estynedig sydd erbyn heddiw: Hatch 3/5 drws; Convertible (to clwt agored); Clubman; Paceman (coupe-debyg 3 drws); Countryman (5 drws mwy ei faint SUV-debyg). Adnewyddwyd pob un heblaw am y Countryman. Daw olynydd hwnnw yn yr Hydref: 5 drws canol-is ei faint.

Nid atgyfodi’r MINI’n unig wnaed ond hefyd y cysylltiad â John Cooper greodd Mini Cooper a Cooper S chwedlonol y 60au. Modelau: ‘One’; ‘Cooper’; ‘Cooper S’; ‘John Cooper Works’ (trachwim). Peiriannau: 1.2, 1.5 a 2.0 litr petrol; 1.5 a 2.0 litr Diesel.

Daeth gyrriant ‘ALL4’ (4x4) ar gael gyda’r Clubman, Countryman a Paceman hefyd.
‘D oes dim ‘Clubman One’ yma – Cooper 1.5, Cooper S 2.0/4x4 (petrol); Cooper 1.5D, Cooper 2.0SD/4x4 (Diesel) yw’r arlwy. Dim fersiwn John Cooper Works ychwaith. Blwch 6-ger nerth braich (neu awtomatig) sy’n gyfrwng ond 8-ger awto newydd gyda’r 2.0 Cooper S/SD. Clubman Cooper S (egniol) 8-ger awto fu ar brawf.

Hwy a lletach na’i ragflaenydd (a’r MINI 3/5-drws cyfredol), mentro i diriogaeth y canol-is wna’r Clubman newydd. Gwnaed hyn gyda’r Countryman eisoes ond ystâd yw hwn rhagor rhywbeth ‘SUV-aidd’.

Tipyn mwy o le i deithwyr a’u trugareddau ond, er ei hyd a lled, is ydyw na hatch cyffredin. Rhwng hyn a’i olwg ac osgo amlwg “FINI-aidd” dal i arddel delwedd gynnil a heini wna hwn.

Dyna yw hi wrth y llyw hefyd. Deialau mawr crwn adnabyddus sydd ger bron y gyrrwr ond cartref i fap a dyfais mordwyo lloeren hynod hawdd a hwylus yw’r un canol erbyn hyn.

Daw digon o rym o grombil y peiriannau 2.0 litr (petrol 192mn neu Diesel 190) a hynod gyhyrog yw ymateb uned betrol y Cooper S hyd yn oed a’r awto-flwch 8ger.
Caffaeliad fuasai gyrriant 4x4 wrth gwrs a mwy o hwyl y 6ger nerth braich (rhatach £1,715 hefyd).

Ond eithriadol sicr ei droedle o hyd yw’r Clubman a ‘MINI-gywir’ y llywio, cornelu a chorff-reolaeth. Coeth yw cynllun y siasi a’i grogiant ôl annibynol aml-gymalog. Safon y reid yn well dipyn na chynt (sail olwyn hwy yn hybu hynny).

Wedi dweud hyn oll, drud yw prisiau gofyn y Clubman: £19,965-£27,390. Cooper S: £22,755 (£24,285 yr ‘ALL4’). Cynwys mordwyo lloeren wna’r Cooper S ond rhaid talu £655 am gymorth parcio clyweledol blaen/ôl, £270 am wresogi seddi blaen, £40 am addasu uchder sedd y teithiwr blaen, e.e. Egniol. heini a ‘ffasiynol’ yw’r ystad fechan hon ond mae’n cystadlu a blaenoriaid y canol–is: A3 Audi; Golf VW; Cyfres 1 BMW; V40 Volvo ac ati. ‘D oes dim edliw “cymeriad” unigryw y Clubman serch hynny.

Manylion: 142mya; 0-62mya 7.2 eiliad; 47.9myg swyddogol; 35myg ar brawf (8ger awtomatig); CO2 137g/km; Tr.Ff.’E’/£130; Tr.Ff.’E’/£130; Grŵp Yswiriant 22.

Zafira Tourer Vauxhall: cludydd hyblyg-ymarferol

2016-04-26T00:00:00+1:00

WRTH lansio’r Zafira ym 1999 Opel-Vauxhall fu’r cyntaf i ymateb i Scenic 1996 – Renault arloesodd y cludydd cynnil Ewropiaidd. Seiliedig ar y Megane canol-is, buan ddaeth hwnnw’n gar teulu cyfarwydd. Gwnaed mwy nag ymateb: y Zafira oedd y cyntaf o’i fath a saith sedd (5+2) megis cerbydau ‘MPV’ mwy eu maint.

Ateb Renault oedd cynnig fersiwn ychwanegol sef Grand Scenic 2004 – hwy a 5+2. Felly fu hi gyda Ford (C-Max/Grand C-Max) a Peugeot (3008 a 5008), e.e. Megis Vauxhall, cadw at un cerbyd 7 sedd wnaeth Touran VW a’r Mazda5.

Erbyn hyn wrth gwrs yr ‘SUV’ sy’n prysur “ymdeyrnasu” dros bob carfan o’r bron. Allweddol iddo yntau fu mabwysiadu caban hyblyg hylaw yr MPV (‘Multi Purpose Vehicle’) a dyna fu hi gyda’r ceir pontio SUV-debyg bondigrybwyll ddaeth wedyn.

Ni fydd olynydd i’r Mazda5, gyda llaw. Yn ôl y cwmni am yr CX-3 ac CX-5 SUV-debyg fydd y gofyn a mudo tua’r math hwn o gar fydd cynulleidfa’r cludydd. Go SUV-debyg ei olwg yw olynydd y Scenic (ddangoswyd yn Sioe Genefa fis Mawrth; yma yn y Gaeaf) a chynnig gyrriant 4x4, e.e., wna’r BMW 2 Tourer.

Eistedd rhwng y canol-is (Astra) a chanol-uwch (Insignia) wna’r Zafira Tourer ac mae’n gar mwy na’i ragflaenydd. Os bydd dyfodol i gludyddion, un carfan neu “gorlan” ganolig ei maint (a chanol-uwch) fydd hi. Ers ei lansio (Sioe Frankfurt 2011; yma 2012) buddsoddwyd ynddo – peiriannu newydd petrol a Diesel, e.e.

Daeth Astra newydd eleni a disgwylir olynydd i’r Insignia yn 2017. Gan mai unigryw i raddau yw llwyfan y Zafira, diwygio/adnewyddu welir ar gyfer 2017 mae’n debyg yn hytrach na cherbyd cwbl newydd. Mwy am hynny cyn bo hir.

Trawst-echel ôl (er un leolwyd yn sicrach a chyswllt Watts) sydd ganddo rhagor crogiant annibynol (aml-gymalog) yr Insignia. Llai na hollol lyfn yw’r reid dros frith-frychau ffyrdd heddiw. Nid anghysurus serch hynny ac atebol ddigon weddill y doniau deinamaidd: llywio, cornelu a chorff reolaeth. Sicr ei droedle ydyw.

Design, Exclusiv, Energy, Sri, SE ac Elite yr ystod: £17,815-£27,320. Fersiynau 120/140mn ar yr 1.4i Tyrbo petrol sydd ar gael yma bellach a dau fodur Diesel: 1.6 CDTi 136 neu 2.0 CDTi 170. Blwch 6 ger nerth braich neu 6 awto. Er cyfoes yr uned betrol, Diesel y dewis amlwg a thynnu’n gryf wna’r 2.0 CDTi 170 gyda’r blwch chwe ger nerth braich yn gyfrwng. SE 2.0 CDTi 170 (£25,450) fu ar brawf.

Hyblyg-ymarferol oddi mewn: dwy sedd gefn sy’n plygu’n fflat a rhes ganol tair rhan sy’n plygu 35/30/35. Go hael yw arlwy’r SE: Awto-Nawsaerydd; Adnoddau Cyfathrebu/Adloniant disgwyleddig; sbid-reolydd; olwynion aloi 17”; goleuadau blaen atodol; cymorth parcio clyweledol blaen/ôl; ffenestri a drychau (wresogwyd) trydan; rheseli to “arian” ac ati. Ond swits drydan sydd rhagor brec llaw go iawn a £1,200 pellach yw pris Mordwyo Lloeren (er cyswllt ‘Intellilink’ amgenach i’w ganlyn). Serch hynny, cludydd cyfoes mwy nag atebol yw’r Zafira diweddaraf.

Manylion: 129mya; 0-62mya 9.1 eiliad; 57.7myg swyddogol; 45/46 (Gwibiadur) ar brawf; CO2-129g/km-Tr.Ff.’D’/£110; Yswiriant 21E; Uchafbwys ol-gerbyd a breciau 1,650kg.

Korando Sports SsangYong: gwneud argraff a denu cynulleidfa

2016-04-19T00:00:00+1:00

“Dwy Ddraig” yw ystyr SsangYong. Yn ôl chwedl gwlad, bu’n rhaid i’r ddwy aros am fileniwm cyn cael hedfan i’r nefoedd gan nad oedd un yn barod i fynd heb y llall.

Sefydlwyd y busnes gwreiddiol ym 1939, dechrau adeiladu tryciau a bysiau ym 1954 a’r Jeep wedyn ar gyfer byddin UDA ym 1964. Prynwyd cwmni Keohwa ym 1986 gan elwa ymhellach ar arbenigedd 4x4 hwnnw. Daeth y ‘Ddwy Ddraig’ yn enw ym 1988.

Prynodd Daimler-Benz gyfran o stoc y cwmni yn y 90au ond gydag argyfwng cyllid Asia ddiwedd y ganrif cafodd Grwp Daewoo feddiant arno. Hoe fer fu hi serch hynny cyn i Daewoo yntau fethu gan adael SsangYong yn annibynol-amddifad eto yn 2000.

Y cam nesaf fu cytundeb a SAIC (Shanghai Automotive Industry Corp) yn 2003 cyn dod yn is-gwmni iddo yn 2004. Erbyn 2008 ysywaeth wele gais am warchodaeth gyfreithiol dros asedau Ssang-Yon ac ymadawiad SAIC. Wedi cyfnod dan reolwr benodwyd gan y llys, fe’i prynwyd yn 2011 gan Grŵp Mahindra a Mahindra, India.

Adeiladu’r Jeep dan drwydded fu dechrau gyrfa gynhyrchu Mahindra ym 1947 ac fe dyfodd yn gorfforaeth enfawr: ceir a cherbydau masnachol; cerbydau amaethyddol; awyrofod; cychod; technoleg; cyllid; dur; amddiffyn; eiddo; ynni a gwestai/arlwyo. Ehangu strategol yw’r bwriad gyda SsangYong: ceir a cherbydau ysgafn yn neilltuol.

Eisoes (2010) lansiodd SsangYong y Korando: car pontio SUV-debyg cynnil ei faint sy’n arddel corff unedol. Daeth y Tivoli (llai eto) y llynedd. Gyrriant blaen a 4x4 atodol eu patrwm, gwahanol ydynt i’r Actyon (nad yw ar gael yma) a’r Rexton sy’n gerbydau 4x4 deu-ddiben mwy sylweddol gyrriant ol/4x4 a siasi ar wahan. Serch tebygrwydd yr enw, fersiwn pick-up ar yr Actyon/Rexton nid y Korando yw’r Korando Sports.

Cydnaws a gorchwylion pick-up yw perthyn i’r cyfryw mwy traddodiadol. Dyna yw hi’n fydeang heblaw am y bychain sy’n seiliedig ar feniau ysgafn. Rhesymau: gwytnwch/hir-hoedledd; cludo llwyth trwm unau’r tu cefn neu wrth dynnu ôl-gerbyd.

O’r herwydd, trawst-echel ol a dolennau dur hynafol yn grogiant fu’n “de rigeur”. Blaenoriaid y garfan yma: Mitsubishi (L200), Ford (Ranger), Nissan (Navara), Isuzu (D-Max), Toyota (Hi-Lux) a Volkswagen (Amarok). Dim ond Navara newydd Nissan (o blith yr uchod) dorrodd ar yr hyn a fu gyda chrogiant ôl aml-gymalog annibynnol.

Dull Siapan a Korea (a Tseina erbyn hyn) ar y dechrau fu allforio cerbydau cyntefig (os dibynadwy) ond rhad a hael eu harlwy (offer a chyfarpar). Yn groes i hyn ennill y blaen ar Nissan wnaeth SsangYong gyda chrogiant ôl annibynnol y Korando Sports.

Prynwyr preifat (fwy fwy) sy’n gynulleidfa bellach ac, ar y dechrau, llai na thunell uchafbwys y llwyth. Erbyn hyn, tunnel (a mwy fymryn) yw hi gan ddianc rhag treth ar werth os at ddibenion masnachol. Parthed ôl-gerbyd (a breciau), 2.7 tunnell yw hi – nid cystal â’r 3t disgwyledig bellach neu, e.e., 3.5t (gyda’r gorau) D-Max Isuzu.

SX ac EX y modelau (£14,995-£18,495 cyn TAW), gyrriant 4x4 (rhan amser) y naill a’r llall, 6ger nerth braich neu awto sy’n gyfrwng ac mae gers isel/uchel wrth gwrs ar gyffer y diarffordd. Eithaf hael yw’r arlwy: olwynion aloi 16” (SX) neu 18” (EX) a daw gwresogi seddi blaen, addasu sedd yrru trydan a chymorth parcio ôl, e.e., gyda’r EX.

Serch hynny (a’i grogiant cyfoes) nid yw ymddygiad y SsangYong mor gywrain â’r Mitsubishi neu VW, e.e., nac ychwaith ddiwyg y caban. Unioni’r cam i raddau pell wna’r prisiau: drytach fymryn na Great Wall (Tseina); tipyn rhatach na’r blaenoriaid uchod. Yn ôl ystadegau 2015 yr SMMT, ‘Rhif 3’ y garfan oedd y Korando Sports yma – dim ond ar yr L200 a Ranger fu mwy o fynd. Gwnaeth argraff a denu cynulleidfa.

Manylion: Diesel 2.0 e-XDi 4 silindr 155mn; 6ger NB/6awto (ar brawf); 106mya; 35.3 myg (swyddogol); 27 ar brawf (27/28 Gwibiadur); CO2 212g/km; Tr.Ff.£230; Gwarant 5 mlynedd (heb gyfyngu milltiroedd); Yswiriant 6E; Mordwyo Lloeren £999.

Atgyfodi llinach ceir campau hygred

2016-04-11T00:00:00+1:00

Dangoswyd yr F-Type yn Sioe Paris 2012 a daeth ar gael yn ystod 2013. ‘Roadster’ to clwt agored oedd hwnnw ond erbyn diwedd 2013 (ar gyfer 2014) daeth Coupe to caled.

Y llynedd ychwanegwyd dewis o flwch 6ger nerth braich (8ger awto fel arall) a gyrriant 4x4 hefyd rhagor patrwm gyrriant ôl clasurol y car sylfaenol.

Ystod y modelau erbyn hyn: F-Type 3.0 litr V6 silindr 340mn; F-Type S 3.0 V6 380; F-Type 5.0 V8 R 550; F-Type 5.0 V8 SVR 575 4x4 sef y pencar (200mya; 0-60mya 3.5eiliad; £110,000 Coupe/£115,485 To Clwt). Arddel uwch-wefrwr wna’r cyfryw oll. Dim ond gyda’r ddwy uned V6 a gyrriant ôl ddaw’r dewis o flwch 6ger nerth braich.

F-Type S Coupe 3.0 V6 380 (£60,775) fu ar brawf – model sydd un cam yn uwch na’r 340 “rhataf” (£51,775). Gyrriant ôl a 6ger nerth braich felly. Seiliedig ar adeiladwaith aliwminiwm yr XK ddaeth i ben yn 2014 ydyw – ond fe’i talfyrrwyd. Wele gaban dwy sedd ddigyfaddawd rhagor “2+2” yr XK felly. Car mwy cynnil ac unswydd.

Bwriadol hefyd fu dewis yr enw. Creu dilyniant wnaed: E-Type eiconaidd 1961-1975 yr ysbrydoliaeth (a ‘chynsail’) i’r F-Type. Hyn gan ymneilltuo rhag XJS (GT-teithiol) 1975, XK8 1996 ac XK 2006-2014. Cyn yr E-Type, rhyfeddodau prin oedd yr C a D-Type.

Fersiwn rasio yr XK 120 (1948-1954) oedd y C-Type (1951-1953), esblygiad arno y D-Type (1954-1956). Ceir oes aur buddugoliaethau rasio Jaguar.

“Competition” oedd ystyr “C” yr C-Type (dim ‘A’ neu ‘B’ cyn hynny). Ar y cyd a’r D-Type daeth XK 140 masnachol 1954-1957 ac XK 150 (1957-1961) gan ddatblygu ymhellach beiriannau ‘XK’ 6 silindr unionsyth 3.4 a 3.8 chwedlonol y cwmni. Seren syfrdanol Sioe Genefa 1961 oedd E-Type Jaguar – car “allai gyrraedd 150mya” ar gael i’r cyhoedd am brisiau rhatach lawer nag ‘exotica’ eraill Lloegr neu’r Eidal.

Tyfodd peiriant yr E-Type i 4.2 litr ym 1964 cyn ei ddisodli gan uned newydd 5.4 litr V12 ym 1971. Braenaru’r tir wnaeth y Gyfres III honno ar gyfer XJS gwahanol iawn 1975 – coupe deu-ddrws ar lwyfan XJ6/XJ12 sedan y cyfnod addaswyd ar ei gyfer.

Gyda diflaniad yr XK, rhaid i’r F-Type gystadlu â Boxster (to clwt), Cayman (coupe) Porsche ar y naill law a’r 911 mwy (2+2) a drytach-amgenach. A siarad yn fras ac yn fuan, drytach yw’r Jaguar na fersiynau rhataf y Boxster/Cayman tra rhatach (dipyn), e.e., yw’r F-Type S 3.0 V6 380 na’r 911 cyfatebol. Mae gan Mercedes, BMW ac Alfa Romeo fodelau sy’n cystadlu – Mercedes hwyrach â’r arlwy rymusaf-gyflawn agosaf.

Serch hynny, arwyddocaol yw gweld mor agos y daeth Jaguar a’r F-Type at flaenor carfan mor ragorol. Cyhyrog yw ymateb yr F-Type tra disglair ei ddoniau deiamaidd: llywio siarp-fanwl; cornelu a chorff-reolaeth cyson-sicr. Car campau o arddeliad.

Ymarefol hefyd, hwylus yw’r hatch a hael ei faint y gist. Mae digon o le i yrrwr go dal os cyfyng braidd a llai nag egonomaidd-rwydd ambell weithred. Nid yw’r newid ger mor slic-lyfn a hynny a go drwm (a siarp) y gafael troed – blinedig yw ymlwybro drwy dagfeydd trefol. Haws na fuasai hi wrth lyw E-Type y 60au serch hynny! Golygus a gosgeiddig unau’n sefyll neu ar garlam, ‘d oes ganddo mo hud-a-lledrith aesthetaidd hwnnw ond campawith yw’r F-Type sy’n atgyfodi llinach ceir campau hygred Jaguar.

Manylion: 171mya; 0-62mya 5.5 eiliad; 28.8myg swyddogol; 24 ar brawf; 27 go ddarbodus yn ol y Gwibiadur; 234g/km CO2; Tr.Ff.’L’/£500; Grwp Yswiriant 47.

CR-V Honda: SUV cyfarwydd ac ymarferol

2016-03-14T00:00:00+1:00

“UN o geir SUV mwyaf poblogaidd y byd” yn ôl Honda a go deg yr honiad gan mor gyfarwydd yw’r CR-V ar ffyrdd Ewrop, Gogledd America a llawer gwlad Ddwyreiniol.

Gwerthwyd rhagor na 5m ers y dechrau ym 1995 a rhagor na 750,000 yn Ewrop meddid ers ei lansio yma ym 1997. Ffatri Swindon yn Lloegr sy’n ei adeiladu.

Diwygwyd car 1995 yn 2002 a thrachefn yn 2004 – gan gynnig Diesel (2.2litr, 4silindr ac allweddol i Ewrop) o’r diwedd.

Daeth olynydd hwnnw yn 2006 (gyda dewis ychwanegol o beiriant petrol 2.4 litr ar gyfer UDA).

Fe’i diwygwyd yntau yn 2010 ac adnewyddu’r peiriant Diesel.

Dangoswyd y CR-V cyfredol yn Sioe Detroit 2012 a daeth Diesel newydd 1.6 litr ar ei gyfer yn 2013. Bu’r diwygio diweddaraf y llynedd.
S, SE, SR ac EX yw’r modelau: £22,770-£34,710. Petrol 2.0 i-VTEC 155mn a Diesel 1.6 i-DTEC 120 neu 160 y peiriannau ar gynnig yma.

Blwch 6ger nerth braich sy’n gyfrwng neu (1.6 i-DTEC 160 gyrriant 4x4 yn unig) auto-flwch 9ger newydd a wele ddiweddaru hefyd ar y Diesel 160 – gwefrwr tyrbo deu-ystod grymusach bellach.

Diesel gyrriant 4x4 (serch rhan-amser) y dewis amlwg ac, os hynny, £28,060 (SE) y rhataf.

Dim ond gyda’r 9ger awto ddaw dyfais sy’n ffrwyno’r car os ar ei waered ond braf cael brec llaw go iawn (rhagor swits drydan) sy’n gydnaws gydfynd a gers nerth braich o droi oddi ar y tarmac a/neu dan dywydd mawr a/neu wrth dynnu ol-gerbyd.

Go elfennol yw’r ddarpariaeth 4x4; dim clo 50-50 (blaen-ôl) nac addasu ymateb (ar-ffordd egniol neu ‘eira’, e.e.). Ar amrantiad yw deffro’r echel ôl ac amrywio’r torch rhwng y ddwy echel wna’r ddyfais ond ‘cefnogi’ wna’r gyrriant ôl atodol ac ar gyfer mentro achlysurol oddi ar y tarmac y’i bwriadwyd.

Gwell gydag nac hebddo, serch hynny: dim chwildroi olwynion blaen o yrru ymaith ymhlith y manteison deinamaidd.

Gyrriant blaen yw’r S tra daw goleuadau blaen atodol, cymorth parcio clyweledol (blaen ac ôl), camera gyrru tua’n ôl ac ati gyda’r SE: £28,060*.

“Penawdau’r SR”: olwynion 18” (aloi eto), cysgod wydr, rheseli to, gwresogi seddi blaen, addasu uchder sedd y teithiwr blaen, golchi goleuadau blaen a mordwyo lloeren (allweddol bellach): £31,175*.

Ychwanegu to gwydr, sedd yrru/llidiart ôl drydanol (defnyddiol) a ‘moethusrwydd’ pellach wna’r EX: £33,060*. (* Diesel 4x4 6ger NB. SR sy’n apelio.)

Blaenoriaid y garfan yw Qashqai Nissan/Kadjar Renault (chwaer-geir hynod atebol a hydrin), Yeti Skoda, X1 BMW, CX-5 Mazda a Sportage Kia.

Gall yr Honda gymharu â’r cyfryw (car pontio SUV-debyg ydyw rhagor SUV cyflawn) ond bydd angen caboli pellach cyn bo hir.

Er hynny, amryddawn ac ymarferol yw caban yr CR-V (sedd ôl/llwyth-ofod) a safonol ei beirianwaith. Cymharol gryf ei werth yn ail-law hefyd.

Manylion: CR-V 1.6 i-DTEC 160 EX 6ger NB; 125mya; 0-62mya 9.7 eiliad; 55.4myg (swyddogol); 40myg (gwibiadur) ar brawf; CO2 133g’km; Tr.Ff.’E’/£130; Yswiriant 27; Uchafbwys ol-gerbyd a breciau 2,000kg.

Kadjar Renault – Diesel darbodus a gyrriant 4x4 atodol

2016-03-07T00:00:00+1:00

ER mai achub Nissan rhag methiant wnaeth Renault ym 1999, Nissan fu’n ‘gymorth mewn cyfyngder’ i Renault yn ddiweddar. “Cynghrair” fu hi yn hytrach na cheisio uno dau gwmni a dau ‘ddiwylliant’ mor wahanol yn ffurfiol. Doeth fu hynny – aflwyddianus fu mwy nag un ymgais fel arall. Epil diweddara’r bartneriaeth hon yw Kadjar Renault.

Hwyrfrydig fu Ffrainc i gydnabod grym a gafael yr SUV. Renault arloesodd y cludydd cynnil (Scenic 1996; fersiwn ar y Megane canol-is) a dal i gloddio’r wythien honno wnaed tra arloesi’r car pontio SUV-debyg wnaeth Nissan a’r Qashqai cyntaf yn 2007.

Cynnig 4x4 ar rai fersiynau wnaeth hwnnw er hybu delwedd fwy hygred. Ysgubol-lwyddianus ydoedd a daeth y diweddaraf yn 2014 gan ymestyn yr arlwy trwy gynnwys yr X-Trail newydd (SUV mwy unswydd gynt) yn fersiwn hwy arno a lle i saith (5+2).

Chwaer-gar i Qashqai Nissan felly yw’r Kadjar ond Palencia, Sbaen yw ei gartref yn hytrach na Sunderland. (Ffatri yn Tseina hefyd.) Er newydd bob elfen weledol o’r bron, llwyfan CMF (canol-is/canol-uwch) Renault-Nissan sy’n sylfaen a thebyg y dewis Diesel serch un uned betrol 1.2 litr: 1.6 grymusach ar gael gyda’r Nissan.

‘Expression’, ‘Dynamique’, ‘Dynamique S’ a ‘Signature’ yr ystod: £17,995-£26,295. Daw ‘Nav’ (Mordwyo Lloeren) i ganlyn pob un heblaw’r Expression rhataf. Petrol 1.2 TCe 130mn, dau Diesel (1.5 dCi 110; 1.6 dCi 130) a blwch 6 ger nerth braich yn gyfrwng. Awto deu-afael ar gael gyda’r dCi 110 (£1,200) a, phwysicach dipyn, gyrriant 4x4 gyda’r dCi 130 (£1,500 – pob model heblaw’r Expression rhataf eto).

Er llwyddianus ddigon, gyrriant blaen 4x2 yn unig yw’r Captur llai ond caffaeliad yw cael cynnig 4x4 – er mai 8% o’r gynulleidfa fydd yn ei ddewis meddid. Mwy yw cyfran 4x4 y Qashqai ond, megis hwnnw, tua 80% fydd yn mynd am y Diesel mae’n debyg.

Model am fodel, rhatach yw’r Kadjar a hael ei arlwy yw’r Dynamique S – Mordwyo Lloeren, cymorth parcio clyweledol blaen ac ôl, awto-nawsaeru deu-barth ac ati. A hwnnw, gyrriant blaen a’r 1.5 dCi 110 dan ei gwfl fydd dewis y mwyafrif yn ol y cwmni – 99g/km CO2 ac osgoi’r Dreth Ffordd os ar olwynion 17” (Dynamique; 103g/km a £20 os yr ‘S’ ag olwynion 19” ond gellir archebu’r 17” llai ar ei gyfer).

Signature Nav 1.6 dCi 130 4WD (gyrriant 4x4) fu ar brawf. Daw olwynion aloi “diemwnt-debyg” eu cynllun (er 19” eto), to haul gwydr-banoramaidd, goleuadau LED cyflawn, corff-baneli atodol (ar gyfer y ‘diarffordd’), dodrefnu mothusach (addasu uchder sedd teithiwr blaen, e.e.) ac awdio BOSE amgenach 8-llefarydd i’w ganlyn.

Gyrriant blaen yn sylfaenol o fynd wrth eich pwysau hyd yn oed o osod y botwm y 4x4 ar “Auto”. Mantais amlycaf y ddyfais yw atal yr olwynion blaen rhag chwildroi wrth daro’r sbardun a symud ymaith yn chwim (ffordd wlyb yn arbennig). Gellir dewis “2WD” (gyrriant blaen yn unig) neu “Lock” (clo 50-50 blaen-ol hyd at 25mya) os gwaethygu wna’r amgylchiadau. O dynnu ôl-gerbyd/carafan a than dywydd mawr neu o synhwyro slip, cynyddu wna cyfraniad yr echel ôl ar amrantiad yn “Auto”.

Atebol ddigon yw llywio, cornelu a safon reid y Kadjar – cysur fu’r flaenoriaeth a ‘d oes fawr o darfu ar ei osgo ar ffyrdd cyffredin. Nid yw mor siarp-fanwl a Kuga Ford na deinamaidd-gystal ag CX-5 Mazda dyweder. Heblaw am y Qashqai, ei elynion amlycaf eraill yw Sportage newydd Kia ac CR-V Honda.

Hylaw a hydrin i’w yrru, caboledig yw caban y Kadjar. Trwy fabwysiadu’r Qashqai creodd Renault gar pontio canol-is apelgar tra-chystadleuol ei bris gofyn (fersiynau drytach hael eu harlwy yn arbennig). Mae’n haeddu lle ymhlith y blaenoriaid uchod.

Manylion: Signature Nav 1.6 dCi 130 4WD; £26,295; 118mya; 0-62mya 10.5 eiliad; 57.6myg swyddogol; 41-43 ar brawf (Gwibiadur 44-47); CO2 129g/km-Tr.Ff.’D’/£110; Yswiriant 18E; Uchafbwys ol-gerbyd a breciau 1,800kg.

50 milltir i'r galwyn

2012-05-18T00:00:00+1:00

Mae gan drefn yr awdurdodau o fesur llwnc car bwrpas. Dull wyddonol ydyw o gymharu un yn erbyn y llall. Mae dwy raglen gyfrifiadurol – un sy’n adlewyrchu gyrru trefol, gyrru tu hwnt iddo y llall. Cyfartaledd y ddau yw’r “llwnc swyddogol” bondigrybwyll. Gwahanol yw hi gan amlaf ar ffyrdd go iawn. Tipyn o beth yw cael car car teulu all arddel 50myg – ond dyna’n union wnaeth yr Hyundai hwn.

Cyfrif y milltioredd rhwng un tanc llawn a’r nesaf ddaw agosaf at union lwnc y car. (Gall offer trydanegol y dasfwrdd – gwib-gyfrifiadur – roi syniad go dda bellach hefyd.) Mae mwy o ewyn ar derv (Diesel) na phetrol gan greu’r argraff o bryd i’w gilydd fod y tanc yn llawn. Mae’n werth gadael iddo setlo a gwneud yn siwr.

Pum mlynedd ers yr i30 cyntaf daeth olynydd fis Mawrth. Mae’n efelychu goreuon y dosbarth (Golf a Focus, e.e.), trwy arddel echel ol aml-gymalog a chrogiant annibynol. Hyn er budd doniau deinamaidd heb aberthu safon y reid.

Datblygwyd y car yn yr Almaen a ffatri yn y Tsiec Weriniaeth sy’n ei adeiladu. Tri Diesel a dau betrol (1.4/1.6 litr), blwch 6 ger nerth braich sy’n gyfrwng (awtomatig ar gael ar fodelau neilltuol). Blue Drive yw enw Hyundai ar y ceir Diesel mwyaf darbodus a CO2 lanaf, y cyfryw’n arddel diffodd-tanio a dulliau arbed ynni eraill.

Classic, Active a Style yw’r ystod (‘Style Nav’ mordwyo lloeren hefyd), £14,495-£20,795 y prisiau gofyn a 7E-14E y tocynnau yswiriant. Cyfathrebu Bluetooth a llafar-ymateb, goleuadau blaen atodol, nawsaerydd, ffenestri blaen/drychau drws trydan, awdio RDS/Cr.Dd./MP3/iPod/Aux/USB a sedd yrru sy’n esgyn/disgyn ddaw gyda’r rhataf, e.e. Ychwanegu olwynion aloi 15”, corffwaith a dodrefnu amgenach, ffenestri ol trydan, cymorth parcio (ol) clywedol ac ati wna’r Active.

A nid y tlotaf un lwyddodd i gyrraedd 50myg ond yr 1.6 CRDi 110 (mae Diesel 128 marchnerth hefyd). Pris gofyn: £17,995. Gall daro 115mya a 62mya ymhen 11.5 eiliad. Ei lwnc swyddogol yw 76.3myg – 50myg ar brawf gan awgrymu mwy eto gyda gyrru beunyddiol tynerach. CO2: 97g/km, Tr. Ff. ‘A’ – sef dim i’w dalu.

Serch crogiant ol cymeradwy, llyfndra yw pwyslais hwn rhagor llywio a chorff reolaeth fanwl. Nid model ‘GTi-debyg’ mohonno. Mae gan yr Active ‘Flex Steer’ Hyundai sy’n gadael i’r gyrrwr ddewis rhwng ymateb ‘Comfort’, ‘Normal’ a ‘Sport’. Trymach a mwy “sylweddol” yw’r llywio gyda’r ‘Sport’ ond nid gwell o’r herwydd.

Mae ganddo 6 ger o leiaf – caffaeliad wrth dynnu’r gorau o’r peiriant – a nid rhy eco-wantan yw’r ymateb. Serch hynny, safon yr adeiladwaith a chostau cynnal a chadw yw ei brif atyniadau - heb anghofio ei fod bellach ymhlith y blaenoriaid.

RXH 508 Peugeot (£33,695) –

Peugeot fu’r cyntaf i hebrwng car Diesel-Trydan croesryw i’r farchnad gyda’r 3008 Hybrid4. Hatch cludydd-debyg canol-is (os go hael ei faint) yw hwnnw. Dim ond mis neu ddau’n hwyrach wele fersiwn tipyn uchelgeisiol. Seiliedig ar 508 Ystad canol-uwch y cwmni (hwnnw nemor blwydd oed) mae’n arddel yr un peiriant 2.0 HDI 163 marchnerth Diesel a lleoli modur trydan yn yr echel ol.

Gyriant blaen yw patrwm ceir Peugeot ond gyrru’r echel ol wna uned drydan yr Hybrid4. Gall deithio rhwng 1-2 filltir ar y batri’n unig meddid cyn i’r peiriant danio o ddeialu ZEV (‘Zero Emissions Vehicle’) ar y das-fwrdd. Hyn ar gyfer y dagfa drefol. ‘Auto’, ‘Sport’ a ‘4WD’ yw’r gosodiadau eraill – Auto yn amrywio’r cyfrwng yn ol y galw; Sport yn tynnu ar y ddwy uned, 200m/n o gyfanswm ac ymateb cyhyrog i’r sbardun; 4WD yn ffrwyno’r echel ol a sicrhau gyrriant 4x4 parhaol.

Ond ystad SUV-debyg yw hwn nid cerbyd 4x4. Defnyddiol uwch ei osgo, tywydd mawr neu’r diarffordd addfwyn fydd ei orwelion – trac lleidiog neu faes sioe. Nid maes carafannau: 1100kg prin uchafbwys olgerbyd. Anghydnaws yw tynnu a char croesryw wrth gwrs gan mai gweithio o hyd fydd y peiriant. Nid yw’r llwnc mor wych a hynny ychwaith (68.9myg swyddogol) gan awgrymu tipyn llai gyda gyrru beunyddiol. Ei rinweddau yw CO2 isel (107 g/km), trethi (ffordd a busnes) rhad. Serch hynny, hael yw’r arlwy (Mordwy Lloeren Bluetooth, Nawsaeru deu-barth, gwybodaeth ar y sgrin ger bron y gyrrwrr. Graenus ei gaban gallai apelio.

Diwygio cyn y chwyldro

2012-03-16T00:00:00+1:00

LLENWI bwlch wnaeth Exeo SEAT. ‘D oedd dim car canol-uwch cystadleuol gan is-gwmni Sbaen Grwp Volkswagen nac ystad (pwysicach fyth yma). Adfer cyn A4 Audi (2000-2007) yn sylfaen wnaed yn 2009 gan gynnig sedan ac ST (ystad). Eleni bu diwygio pellach arno: ymbincio allanol; olwynion aloi newydd; goleuadau blaen bi-xenon; caboli oddi mewn; peiriannau CO2-lanach a llwnc ysgafnach.

Yr oedd mwy i Exeo 2009 na phryd a gwedd. Cafodd beiriannau diweddaraf VW gan gynwys Diesel 2.0 litr cronfa ganol: 120, 140 (143 bellach); 170 marchnerth. Dramor, mae 1.6, 1.8, 2.0 petrol ond, yma, dim ond y 2.0 TSI: 211m/n: 148mya; 0-62 ymhen 7.3 eiliad; £24,430 Sport (£23,375 sedan). Daeth blwch 6 ger (nerth braich) llyfn gydnaws i’w canlyn hefyd a bu cryn waith ar y crogiant a’r sadwyr.

Go gaboledig ei gorffwaith a’i gaban o hyd, cysurus yw hi oddi mewn - safle yrru dda. Gyrriant blaen (yn unig) yw’r patrwm, ‘d oes dim son am 4x4 quattro Audi (mwy soffistigedig na 4x4 rhelyw Grwp VW). S, SE, SE Tech, Sport, Sport Tech yw’r dewis: £20,650-£25,650 (£1,000/£1,200 drytach model am fodel na’r sedan).

Gall y 2.0 TDI CR Diesel 143m/n Sport (£22,630) gyrraedd 130mya; 0-62 ymhen 9.6 eiliad. Ymateb yn dda i dorch y peiriant ac wmff ychwanegol y gwefrwr tyrbo wna’r gerio. Hyderus-gyhyrog, mae digon o fynd ynddo. Echel ol gywrain ac aml-gymalog eisoes a siasi ddiwygwyd mae’n well car na’r A4 blaenorol.

Yswiriant 24E (1-50). Llwnc swyddogol: 56.5myg, 42myg darbodus iawn ar brawf (46+ beunyddiol dyweder); CO2 132g/km-Tr.Ff.’F’-£115 rhesymol hefyd. Hael yw arlwy’r model ‘S’ rhataf un: cyfathrebu ‘Bluetooth’, nawsaeru deuol, olwynion aloi, ffenestri/drychau trydan; prif oleuadau halogen, awdio/Cr.Dd./At-blwg/USB, breciau ABS/EBA, sadio trydanegol ESP, cloi canolog o bell ac ati.

Er mai cul a byr yw’r Exeo bellach, cynnil o’i gymharu a rhelyw’r canol-uwch (sylweddol erbyn hyn), ymarferol yw’r ST. Seddi ol sy’n plygu’n fflat a phlwg 12v atodfol yno hefyd ynghyd a chilfachau ar gyfer trugareddau teulu neu orchwyl.

Gall yr Exeo gymharu a’r blaenoriaid: Mondeo Ford (olynydd ar gyrraedd); Passat VW; Superb Skoda (car mwyaf y garfan); Insignia Vauxhall; 508 Peugeot; Mazda6 (olynydd ar gyrraedd). Deinamaidd gymeradwy os nad y gorau un.

Ond aros pryd yw hyn i gyd. Hebrwng cynllun newydd wna A3 Audi eleni a Golf VII 2013. Nid llwyfan ond adeiladwaith gyflawn all lwyfannu’r uwchfini (Polo), canol-is (Golf) a chanol uwch (Passat). Bydd gan Audi rywbeth tebyg – ar gyfer peiriant sy’n wynebu tua’r blaen (clasurol), gyrriant o du ol iddo a quattro 4x4. Yn y cyfamser, diwygio go ddefnyddiol (cyn y chwyldro) welir gydag Exeo 2012.

Zafira Tourer Vauxhall: £21,000-£28,465 yma’r mis hwn
Gwerthu’n gryf wnaeth cludydd cynnil Vauxhall, y Zafira, ers 1999 a’i adnewyddu yn 2005. Bu’n geffyl blaen am gyfnod maith – hyd yn oed yn Hydref ei ddyddiau. Bydd yn goroesi’r car newydd, meddid, gan fod gofyn amdano: £14,000-£25,000.

Mwy o faint yw’r Zafira Tourer a thipyn drytach y prisiau gofyn. Cyfuno elfennau’r Insignia (canol-uwch) tua’r blaen ac Astra oddi ol wna sylfaen y Zafira Tourer – “hannu” o’r canol-is felly ond y bwriad yw gallu cystadlu a rhai o gludyddion mwy eu maint, S-Max Ford, e.e., a pharthed hwnnw mae’n rhatach o ryw £1,000.

Arloesi’r cludydd cynnil saith sedd (5+2) wnaeth y Zafira a gwella ar hynny wna hwn. Gellir plygu sedd ganol yr ‘ail res’ a’i droi’n fraich-orffwys tra llithro yn ol ac i mewn wna’r ddwy sedd arall gan greu llawer mwy o le ar gyfer dau deithiwr. Achlysurol y seddi cefn ond plygu’n fflat wna’r cyfan gan greu llwyth ofod eang..

Ffafriol fu argraff y rhagolwg – doniau deinamaidd siarp-fanwl a chymeradwy, os ar draul reid sy’n llai na llyfn ar brydiau. Heini yw’r unedau Diesel os hyglyw ac aflafar braidd. Cafwyd gryn hwyl ar y Zafira newydd – mwy amdano yn y man.

Dau Gymro’n ennill gwobrau gohebwyr moduro Cymru

2011-11-24T00:00:00+1:00

Plas Newydd, cartref ardalyddion Mon, ddewiswyd gan Ohebwyr Moduro Cymru ar gyfer cyflwyno Gwobr Goffa Tom Pryce a’u Gwobr Fodurol Arbennig eleni.
Cyflwynodd Arglwydd Raglaw Gwynedd, Ei Anrhydedd Huw Morgan Daniel y Wobr Goffa i Nick Reilly CBE, Llywydd General Motors Ewrop. Ei gyd-Gymro a Chadeirydd Vauxhall Motors, Bill Parfitt CBE dderbyniodd y Wobr Fodurol Arbennig.
Nos Sadwrn, yng nghinio blynyddol y gymdeithas ym Modysgallen, llongyfarchwyd y ddau gan Arglwydd Raglaw Clwyd, Trefor Glyn Jones CBE ac is-Ysgrifennydd Gwladol Cymru, y Gwir Anrhydeddus David I Jones AS.
Ganwyd a magwyd Nick Reilly ar Ynys Mon a bydd yn ymddeol fis Mawrth nesaf. Gall daflu golwg dros 37ain blwyddyn gyda’r cwmni a swyddi blaenllaw yn Asia, Ewrop ac America Ladin.
Ef lwyddodd i brynu gweddillion Daewoo Motor De Corea yn 2002 a’u troi’n gyfrwng trawsnewid Chevrolet yn is-gwmni bydeang i GM. Aeth rhagddo wedyn i arolygu datbygiad y Gorfforaeth ar draws y Dwyrain a Deheudir America.
Dychwelodd i Ewrop yn 2009 i gipio’r awennau yn ystod argyfwng fu gyda’r gwaethaf welodd y cwmni – a llwyddo eto. Cyn hyn oll bu’n Reolwr Cyffredinol Ellesmere Port ym 1990 ac yna Cadeirydd a Phrif Weithredwr Vauxhall Motors ym 1996. Y naill swydd a’r llall yn golygu cysylltiad agos a Chymru Ddiwydianol.
“Anrhydedd eithriadol yw derbyn y wobr hon” ddywed Nick Reilly “ac arbennig iawn hefyd gan fe’m ganwyd ergyd carreg oddi yma. Bydd yr achlysur hwn gyda chyfeillion yn y diwydiant ac ym mro fy mebyd yn rhywbeth y byddaf yn ei drysori gydol gweddill fy mlynyddoedd.”
Derbyniodd Bill Parfitt y CBE i gydnabod ei gyfraniad i’r diwydiant fodurol fis Mehefin eleni. Gwr y de-ddwyrain ydyw – fe’i ganwyd nepell o Gasgwent. Cafodd yrfa hir a llewyrchus gyda rhai o enwau masnachol mwyaf adnabyddus y busnes cyn dod yn Gyfarwyddwr Lleng-Werthiant Vauxhall Motors ym 1998.
Daeth yn Gyfarwyddwr Gwerthiant, Marchnata ac Ol-Werthiant yn fuan gan arolygu is-gwmniau eraill GM (Chevrolet, SAAB, Cadillac ac ati) led led Gwledydd Prydain ac Iwerddon. Ychwanegwyd lleng-werthiant Ewrop i’w ddyletswyddau yn 2005. Bu’n Gadeirydd Vauxhall Motors ers 2008.
Diwygiodd Bill Parfitt y cwmni drwyddo draw a Vauxhall bellach sydd ben ben a Rhif 1 y farchnad (Ford) gyda thri o’i geir yn y ‘Deg Uchaf’.
“Cymru fu ‘milltir sgwar’ blynyddoedd allweddol fy ngyrfa” ddywed Bill Parfitt “a bum yn pregethu a gweithio dros y sector fodurol yma fyth ers hynny. Braint enfawr yw derbyn y wobr hon gan GMC a fy nghyd-Gymry.”
Yn ol Huw Thomas, Cadeirydd GMC, “Cyfle gwych fu hwn i gydnabod cyfraniad eithriadol Nick Reilly a Bill Parfitt i’r diwydiant. ‘Blaenor y Byd Modurol’ yw arysgrif y Tlws eleni – a gwir y gair. Dyma un o arweinyddion bydeang y busnes. Cyflawnodd Bill Parfitt ‘dyrn o waith’ eithriadol eto gyda Vauxhall gan adfer a meithrin y cysylltiad a Chymru a’i gweithgareddau modurol holl-bwysig”

Ol-Nodyn ar y Gwobrau –
1. Bu farw Tom Pryce, gyrrwr rasio gorau Cymru, yn ystod Grand Prix Kyalami, De’r Affrig. Rhedodd swyddog tan ar draws y trac o flaen ei gar a lladdwyd y naill a’r llall ohonynt. Cyflwynir y Wobr gan GMC er coffa amdano i gydnabod cyfraniad eithriadol gan Gymro neu Gymraes i fyd trafnidiaeth. Gall fod yn rhodd corfforaethol hefyd os bydd cysylltiad arbennig a Chymru.
2. Cyflwynir Gwobr Fodurol Arbennig GMC i gydnabod cyfraniad rhagorol I’r sector fodurol. Derwen Sessile (o gyffiniau Caerfyrddin) fu deunydd y fuddged eleni osodwyd ar sylfaen aliwminiwm sy’n cynwys yr arysgrif.

Lluniau: Nick a Susie Reilly ym Mhlas Newydd gyda GMC (Gohebwyr Moduro Cymru nid
General Motors Corporation … am unwaith!).
Llun gan David Parry-Jones

Arglwydd Raglaw Gwynedd, Huw Morgan Daniel; Nick Reilly; Bill Parfitt; Huw Thomas

Cysur ac amgylchedd

2011-10-20T00:00:00+1:00

Leaf Nissan (£25,990 – gan gynwys £5,000 o gymorthdal cyhoeddus)

Car y Flwyddyn (Ewrop) 2011, Leaf Nissan oedd y car trydan cyntaf i ennill y gystadleuaeth. ‘D oes ganddo ddim modur wrth gefn ond mae digon o fywyd ynddo, meddid, ar gyfer 100 milltir cyn gorfod adfer y batri. Gyda plwg trydan cyffredin yn gyfrwng, gall hyn gymeryd 8 awr – h.y.dros nos.

Daw plwg newydd (ar y car) ar gael yn 2012 all “lenwi’r” batri hyd at 80% mewn rhyw hanner awr yn ol pob tebyg. Mae gan rhai modurdai Nissan ddyfais all wneud hyn eisoes – a’r bwriad yw ehangu’r rhwydwaith. Bydd ffatri Sunderland yn dechrau adeiladu’r Leaf yn 2013 (gyda’r QashQai a Juke cyfredol).

Er mai tua 80 milltir sy’n debycach yn feunyddiol (tynnu ar yr un gronfa drydan wna’r nawsaerydd, ffenestri a drychau, e.e.), dywedir fod hyn y ddigon ar gyfer mwyafrif ‘gweithlu’ gorllewin Ewrop. Pe bai modd adfer y batri yn ystod y dydd (gwethle neu faes parcio) gellid ‘comiwtio’ cryn bellter. Mae cynlluniau ar gyfer hyrwyddo darpariaeth debyg mewn llefydd mwy cyfleus a chyhoeddus.

Un peth yw gyrru a dychwelyd o’r gwaith (ac ai hwnnw fydd y patrwm “llethol” tua’r dyfodol?) ond rhinwedd car modur yw hwyluso gweithgareddau fin nos – cymdeithasol, diwyllianol neu deuluol. Mae hyn yn wir ar gyfer y penwythnos – mae mwy i’w wneud na dim ond mynychu’r dref a/neu archfarchnad agosaf. Dyma fantais Ampera Opel-Vauxhall, e.e., a’i beiriant petrol wrth gefn.

O gydymffurfio a “dalgylch” y Leaf, serch hynny, digon cysurus a chyfarwydd yw hi wrth y llyw. Heblaw am ‘garped’ o fatriau ion lithium dan y llawr, hatch canol-is 5 drws gyrriant blaen cwbl gonfensiynol sydd yma. Crogiant blaen annibynol a thrawst-echel ol, cymorth trydanol i’r llyw ac ati. Go gaboledig yw’r caban a chysurus y seddi (blaen, o leiaf) – a thawel hollol yw elfennau’r gyrriant.

Mae pentwr o dechnoleg gwybodaeth (hybu gyrru darbodus, hoedledd y batri ac ati) ger bron y gyrrwr a thebyg i gar awtomatig yw’r ymateb: 80kW-109 march-nerth; 90mya; 0-62mya ymhen 11.9 eiliad. ‘D oes dim treth ffordd, wrth gwrs, a thua £2 meddid fuasai cost adfer y batri dros nos. Gellir cadw golwg ar bethau drwy ffon mudol a gosod y nawsaerydd,e.e. Wedi dweud hynny, dinasoedd yr iseldir a’u maesdrefi fydd cynefin y car hwn – a drud iawn y pris gofyn.

XJ 3.0 V6D Jaguar (£55,500-£69,500)

Go wahanol yw cysur ac amgylchedd XJ Diesel diweddaraf Jaguar. Ond er 155mya (gyfyngwyd) a 60 ymhen 6 eiliad, nid afradlon mohonno: 39.2 myg ar gyfartaledd swyddogol a 189g/km (‘J’/£245 y flwyddyn). Hyn i ganlyn y fersiwn hir (mwy o le y tu ol) – ysgafnach 20kg yw’r car safonol, 184g/km (‘I’/£210).

Corff aliwminiwm drwyddo draw (etifeddwyd gan ei ragflaeynydd ac esblygwyd) gyfranodd - ysgafnach 200kg na dur - ac hefyd egni darbodus y Diesel 3.0 litr AJ-V6D Gen III dan ei gwfl. Arddel hwn ddau wefrwr tyrbo sy’n gweithio’n ddilynol gan greu bwrlwm o dorch gan dynu’n gryf drwy chwe ger y blwch awtomatig.

Gyrriant ol clasurol, megis Mercedes-Benz a BMW, yw patrwm y gyrriant a mae dyfais sy’n amrywio’r ymateb (‘Cyffredin’, ‘Gaeaf’, ‘Deinamaidd’). Wedyn, mae tri gosodiad i’r “Trac DSC” (sadio trydanegol). Rhwng hyn oll a phedalau newid ger yr olwyn lywio, gall y gyrrwr reoli ymddygiad y car yn fanwl pan ar garlam.

Ar garlam neu beidio, hybu cysur y car cyfan wna crogiant ol aer atodol. Camp hynod fu cyfuno cystal lyfndra a llywio, cornelu a chorff-reolaeth mor eithriadol fanwl. ‘D oes dim byd cyfatebol all ymateb mor siarp a chytbwys gyson a hwn.

Luxury, Premium Luxury a Portfolio yw’r ystod a daw arlwy go foethus i ganlyn – gan gynwys dyfais i ymestyn gwaelodion y seddi blaen (ar ben “bopeth” arall) sy’n gaffaeliad ar unrhyw daith i’r neb sy’n dalach neu hirgoes. Car rhagorol yw’r XJ – cabolrwydd, cysur, peirianwaith coeth a doniau deinamaidd sy’n disgleirio.

Cludydd cynnil ond caboledig

2011-09-29T00:00:00+1:00

TEBYG i hel achau yw ceisio didoli holl epil Grŵp Volkswagen. Nid un llinach ond llinachau bellach - prysur symud tua Rhif.1 y byd modurol wna’r cwmni.

Mabwysiadu llwyfan y Golf V wnaeth Golf VI 2008 a Touran 2003 oedd y cyntaf i arddel hwnnw. Coeth ydoedd gan arddel crogiant ôl aml-gymalog annibynol – er budd llywio, cornelu a chorff-reolaeth manwl heb aberthu safon reid llyfn-gysurus. O’i ddatblygu, mwy nag atebol ydoedd, meddid, ar gyfer y genhedlaeth gyfredol.

Mae sôn am Golf VII erbyn diwedd 2012 ond daeth y Touran diweddaraf ar gael fis Medi diwethaf (ar ôl diwygio sylweddol yn 2007). Eleni bu adnewyddu ar y Tiguan (SUV) ynghyd a Golf Cabriolet (to clwt agored) a Jetta (sedan 4 drws) – y naill a’r llall yn fodelau newydd. A mae’r Eos (to caled agored) yma o hyd hefyd.

Trwy ddull adeiladu modiwlar y Grŵp mae gan y cyfryw fersiynau fodolaeth sy’n fwy fwy annibynol. Nid un llwyfan sy’n sylfaen ond cyfuniad o gydrannau a bydd yr uchod yma am beth amser eto.

Y Car

S, SE a Sport yw’r ystod a phetrol (1.2 TSI 105 neu 1.4 TSI 140) a Diesel (1.6 TDI 90 neu 105; 2.0 TDI 140 neu 170) y peiriannau. Bu ehangu yma eto ar dechnoleg ‘BlueMotion’ VW gyda’r 1.2 TSI 105, 1.6 TDI 105 a 2.0 TDI 104 yn arddel y bathodyn. Olwynion aloi a theiars sy’n llusgo llai sydd ganddynt, dyfais diffodd-tanio wrth sefyll ac ail-gychwyn ynghyd ag adgipio ynni wrth frecio – hyn yn hwb i’r eiliadur a’r batri gan ysgafnhau’r baich ar y peiriant o gynhyrchu trydan.

Daw blwch 6 ger nerth braich (cydnaws a slic) i ganlyn pob model heblaw’r 2.0 TDI 170. Chwe ger deu-afael awtomatig yw hwnnw (ar gael am arian pellach ar y 2.0 TDI 140 hefyd). Ond y blwch nerth braich yw’r dewis amlwg.

Yn groes i lawer o’r rhelyw, un model sylfaenol sydd i’r Touran (‘d oes dim un ‘Grand’ estynedig). Ond, megis Zafira Vauxhall, mae lle i saith (5+2) ynddo beth bynnag – gyda’r dewis o hepgor y ddwy sedd ôl achlysurol. Plygu i’r llawr wna’r ddwy res ôl wrth gwrs a mae digon o le ar gyfer offer, geriach a thrugareddau. Go hael yw’r arlwy. Daw nawaerydd; olwynion aloi 15”; rheseli to; awdio Cr.Dd.; breciau ABS a sadio trydanegol ESP a chwe swigen awyr achubol ar y rhataf un.

Manylion

SE 1.6 TDI 105: £22,025* (£18,175-£26,520 rhataf-drytaf); 114mya; 0-62mya 12.8 eiliad; 55.4myg swyddogol; 41-43myg ar brawf - 45beunyddiol ddarbodus dyweder; CO2 134g/km; Tr.Ff.’E’/£115; Yswiriant 13E. Ymhlith cyfarpar ychwanegol yr SE: olwynion aloi 16”; cymorth parcio clyweledol; USB iPod-MP3 awdio; seddi blaen mwy cysurus all esgyn/disgyn. (*BlueMotion: £22,250).

Y Gystadleuaeth

C-Max(5 sedd)/Grand C-Max(7 sedd) Ford; Mazda5; Peugeot 3008/5008; Scenic/Grand Scenic Renault; Zafira Vauxhall (olynydd ar gyrraedd).

Dyfarniad

Manwl a siarp yw doniauau deinamaidd y Ffordyn a’r Vauxhall ond glan ei wedd a’i ddiwyg a hynod gaboledig (caban a chorffwaith) yw Touran VW. Cysur a llyfndra y flaenoriaeth ond mwy nag atebol yr ochr ddeinamaidd, darbodus hefyd.

Haeddu mwy o sylw

2011-09-16T00:00:00+1:00

Cafodd Honda gryn hwyl gyda’r Jazz (uwchfini) a’r CR-V (SUV cynnil) – Civic hefyd i raddau (olynydd i hwnnw ar gyrraedd). Peirianneg coeth a chywrain yw sylfaen enw bydeang y cwmni. Daeth cerbydau croesryw petrol-trydan Honda’n adnabyddus hefyd. Ond, am ryw reswm, taro llai na deuddeg fu hynt yr Accord.

Marchnata llai na chraff hwyrach? Lle didrugaredd yw carfan y canol-uwch – digon anodd i gar a chrach-fathodyn bellach. Os am lwyddo ymhlith y gwerin, rhaid canolbwyntio ar brynwyr masnachol y lleng a’r lliaws. Yn draddodiadol (yma o leiaf) prynwyr preifat yw cynulleidfa Honda a phrin yw’r cyfryw yno.

Y Car

Gyrriant blaen confensiynol, daeth y cyntaf ym 1981, y car cyfredol yn 2008 a bu diwygio arno eleni. Mae peiriannau petrol 2.0/2.4 litr 156/201 marchnerth a Diesel 2.2 i-DTEC 150/180. Sedan neu Tourer (ystâd) sydd ar gael. Daeth CO2 y 2.2 i-DTEC awtomatig a’r 2.0i petrol yn is na 160 g/km syn bwysig ar gyfer lwfansau busnes ac is na 140g/km yw’r DTEC 6 ger nerth braich. Bu gwaith aerodeimaidd ar waelodion corff y car hefyd.

Mae safon reid ac ymddygiad y car yn well a bu ymbincio oddi allan ac oddi mewn gydag arlwy fwy hael, olwynion aloi 17”, goleuadau blaen sy’n troi gyda’r llyw, ac ati. Mwy cysurus yw hi yn y caban a thawelach hefyd. Daw mordwyo lloeren llafar-ymateb i ganlyn y model drytach (£1,150 fel arall) a mae hyn yn cynwys cyfathrebu Bluetooth a chymorth parcio clywedol yn ôl y model.

Eang yw’r adnoddau trydanegol: sadio; llywio; brecio gan gynwys tynnu ôlgerbyd – trwy dawelu unrhyw arwydd o siglo.

Mae digon o fynd yn y DTEC 150 hyd yn oed a slic-gydnaws yw’r blwch 6 ger nerth braich. Hynod ddefnyddiol ar ffyrdd gwledig Cymru yw 4ydd ger y model hwnnw.

Cymeradwy yw doniau deinamaidd yr Accord – llywio, dal y ffordd a safon y reid. Cysurus gynhaliol yw’r safle yrru.

Manylion

Accord 2.2 i-DTEC 6 ger NB: £24,700 (2.0i rhataf £21,605); 132mya; 0-62mya 9.5 eiliad; 52.3myg swyddogol; 38/39myg ar brawf sy’n awgrymu 45 darbodus dyweder yn feunyddiol; CO2 g/km; Tr.Ff.’E’/£115; Yswiriant 25E.

Y Gystadleuaeth

Mondeo Ford, Passat VW, Superb Skoda, Insignia Vauxhall, Mazda6; 508 Peugeot, i40 Hyundai, S60 Volvo, A4 Audi, Exeo SEAT.

Dyfarniad

Nid yw mor lyfn a diymdrech â’r Passat nac mor loyw ei rinweddau deinamaidd â’r Mondeo – hwnnw a Superb Skoda’n cynnig mwy o le oddi mewn (Skoda’n arbennig). Ond coeth ei beirianwaith ydyw. Os nad cystal â goreuon yr uchod (Mondeo, Passat, Superb), mae’n haeddu lle gyda’r blaenoriaid – a mwy o sylw.

O na fyddai’n Haf o hyd!

2011-08-25T00:00:00+1:00

Tri car safonol Audi yw’r A4, A6 ac A8. Gyda’r criw cyfredol serch hynny, daeth nifer o fodelau A5 ac A7. Gwneud mwy na llenwi bwlch wna’r cyfryw a nid Sport-back (hatch) coupe-debyg yn unig mo’r A5 – Coupe a Cabriolet hefyd.

Cabriolet yw enw Audi ar ei geir to clwt agored (heblaw am y TT ‘Roadster). A tho clwt fu hi – nid ‘Coupe Cabriolet’ (to caled all blygu ymaith). Symud ynghynt, mwy syml y peirianwaith, mynd a llai o le yn y gist ac ysgafnach ydyw – er budd osgo deinamaidd y car. Tawel a chlud oddi mewn bellach a gellir arddel ffenest ôl wydr a gwresogydd. Gall y to esgyn neu ddisgyn heb stopio (hyd at 31mya).

Y Car

Daeth yr A5 Coupe i Sioe Genefa fis Mawrth 2007 tra diwedd 2008 oedd hi cyn lansio’r Cabriolet, Hydref 2009 y Sportback 5 drws. ‘Ymestyn’ yr A4 wnaed – ‘d oedd dim Coupe neu Sportback gynt ond olynydd uniongyrchol yw’r Cabriolet i’r A4 blaenorol. Glan a chaboledig, denodd gynulleidfa selog. Gweddu’n well eto wna corff hwy yr A5 ac chafwyd hwyl ar osgo ynghyd a gwedd a diwyg y cynllun.

Pris gofyn yr A5 rhataf (1.8 TFSI 158 marchnerth petrol) yw £28,915 – ‘SE’ ac ‘S line’ yw’r fersiynau drytach a mae S5 V6 3.0 333m/n trachwim yn ben ar y cyfan: £45,150. Gellir talu crocpris am fodelau V6, quattro 4x4 a/neu grogiant arbennig ond y mwyaf “naturiol” o blith ystod go eang yw’r llai drud a gyrriant blaen syml.

Heblaw am yr 1.8 litr, mae 2.0 TFSI 210 petrol neu 2.0 TDI 170 Diesel. Daw blwch 6 ger nerth braich slic a chydnaws i’w canlyn (awto am arian pellach) a swynol-egniol yw’r 2.0 TFSI petrol (ysgafnach rywfaint na’r Diesel). Eitha’ hael yw’r arlwy: olwynion aloi 17”; nawsaerydd; ffenestri/drychau trydan sy’n cydweithio â’r to; diffodd-tanio ac ail-gipio egni; ABS-ESP ac ati. Ond rhaid talu £1,995 am “Becyn Technoleg” (lloeren-fordwyo, gwell Awdio a sbid-reolydd).

Manylion

2.0 TFSI 211/SE 6 ger NB: £31,815/£33,745; 155mya; 0-62mya 6.9 eiliad; 41.5 myg swyddogol; 29-34myg ar brawf; CO2 159g/km-Tr.Ff.’G’/£165; Yswiriant 33E.

Y Gystadleuaeth

Cyfres 3 BMW (‘CC’ to caled) neu E-klasse cabriolet Mercedes-Benz (to clwt).

Dyfarniad

O na fyddai’n Haf o hyd – ond ar gyfer yr ysbeidiau heulog sydd ohonni, digon egniol yw Cabriolet 2.0 TFSI A5 Audi. Rhatach na BMW neu Mercedes – sy’n denu gwario mwy am fersiynau grymusach er elwa ar y gyrriant ôl clasurol. Caboledig, darbodus a chysurus mae dewis o fodelau am brisiau lled resymol – a dal eu tir yn well yn ail-law hefyd mae’n debyg wna’r cyfryw.

Diwygio ac ‘e-Diesel’ newydd

2011-08-18T00:00:00+1:00

ENBYD gystadleuol yw carfan y canol-is. Serch poblogrwydd y cludydd cynnil, hynod bwysig o hyd yw’r hatch, ystâd ac eraill. Rhagorol yw safon deinamaidd y blaenoriaid – a nid dim ond y “GTi-debyg”. Er yn amlwg, llai na ‘blaenllaw’ fu 308 Peugeot ond gwerthwyd tua miliwn a chafwyd hwyl ar y 3008 (cludydd debyg) a’r 5008 (7 sedd) mwy diweddar. Addawol felly yw’r argoelion.

Y Car

Daeth 308 cyfredol Peugeot yn 2007 (Hatch 5 drws) a’r ‘SW’ (ystâd) yn 2008. Eleni bu diwygio drwyddo draw gan gynwys peiriannau newydd a chaboli oddi mewn ac allan. Sylfaen y 308 yw’r 307 blaenorol – cadwodd lwyfan hwnnw gan arddel corff a chaban newydd (megis Golf V a VI 2009 Volkswagen). Er gwella arno, ar gysur fu’r pwyslais rhagor llywio, cornelu a chorff-reolaeth siarp-fanwl.

Access, Active, Allure, GT, Oxygo ac SR yw’r ystod, £15,245-£21,645 y prisiau gofyn a mae peiriannau petrol 1.4 ac 1.6 litr (98, 120, 156 a 200 marchnerth) neu 1.6 HDI Diesel (92, 112 a 150m/n). Diesel newydd yw’r e-HDI 112m/n – ar gael gyda phob fersiwn heblaw’r GT (petrol 200m/n yn unig). Daw blwch 6 ger nerth braich i’w ganlyn neu ffon ‘hanner awtomatig di-afael’: £17,645-£19,565.

Chwe ger nerth braich yw’r dewis amlwg a rhwng 109g/km a 118g/km yr CO2 (yn ôl yr arlwy, teiars ac ati). Heblaw am ddiffodd-tanio wrth sefyll ac ail-gychwyn, gweithredu’n amgenach wna eiliadur (ynghyd ag uwch-gynhwysor) y car. Yn hytrach na dim ond cynhyrchu trydan, hwn sy’n ail-ddechrau’r peiriant (a mae cyfundrefn ad-gipio egni hefyd). Mwy sydyn a llai herciog yw’r ail-danio meddid.

Manylion

Allure e-HDI 5 drws, 6 ger NB: £19,565; 118mya; 0-62mya 11.4 eiliad; 67.2 myg swyddogol a c50+ beunyddiol dyweder; CO2 118g/km; Tr.Ff.£30; Yswiriant 15E.

Y Gystadleuaeth

Golf VW (Leon SEAT, A3 Audi, Octavia Skoda), Focus Ford a Giulietta Alfa Romeo ar y blaen (deinamaidd a chyffredinol) gydag Astra Vauxhall yn agos ond go gaboledig yw caban y 308 bellach, cyson ei ymateb ar y ffordd a chysurus.

Dyfarniad

Nid rhad mohonno a serch olwynion aloi 18”, seddi (hanner) lledr, nawsaerydd mwy cyflawn, to gwydr, cymorth parcio (ôl) ac ati’r “Allure”, un rhatach all ddenu. Eang yw’r argraff oddi mewn ond cyfyng braidd y safle yrru i’r tal a hirgoes er addasu i “bob-cyfeiriad”. Darbodus yw e-Diesel 2011 ond rhaid cloriannu’n fanwl i sicrhau mai dim ond “ceiniog” fydd hi ar “ddiwedd y gân”.

‘Almaenwr’ cynnil a chyfoes

2011-08-12T00:00:00+1:00

SUV cyntaf BMW oedd X5 1999 o ffatri newydd yn Spartanburg, De Carolina. UDA fuasai prif farchnad yr SUV ysgafnach a mwy heini hwn. Ar y ffordd fawr oedd ei bwyslais hefyd serch 4x4 go atebol ar gyfer troi oddi arno’n achlysurol.

Datblygodd yr “xDrive” erbyn hyn. ‘D oes dim gers isel/uchel ond 4x4 parhaol ydyw a 40%-60% ei osgo blaen/ôl (gan efelychu gyrriant ôl clasurol). Gall symud rhwng yr echelau ar amrantiad a rhwng olwynion yr echel ôl hefyd (megis differyn gwrth slip). Sadio’r car wrth gornelu ar garlam wna hyn neu, oddi ar y ffordd fawr, hybu gwell gafael – caffaeliad ar neu oddi ar y tarmac felly.

Dyna’r gyfrinach. ‘SAV’ – Sport Activity (nid Utility) Vehicle yw enw BMW ar ei X-gerbyd. Daeth yr ail X5 (7 sedd) yn 2006 ac X6 (pontio 4x4-Hatch) yn 2008. Bu gofyn am rywbeth tebyg ond mwy cynnil – wele X3 2003, ddiwygwyd yn 2006. Daeth ail epil hwnnw y llynedd gan ddilyn X1 (llai fymryn a mwy car-debyg) 2009.

X3 BMW

Cwmni Magna Steyr, Graz, Awstria (Steyr Daimler Puch gynt) adeiladodd yr X3 cyntaf dan gontract. Y tro hwn, magwyd yr X3 diweddaraf ar aelwyd BMW. Fe ddaw, fel yr X5/X6 o Spartanburg. Hwy a lletach yw’r X3 gan greu “mwy o le” ar gyfer yr X1 (dyna wnaed â’r X5). Gyda’i arlwy, rhatach meddid yw’r car newydd.

Diesel 2.0 litr neu 3.0 Diesel, wyth ger awtomatig yn unig yw’r 30d tra 6 ger nerth braich yw’r 20d (8 ger awto - £1,525). Os am gymorth llywio amgenach: ‘Servotronic’ £180;‘Variable Sport’ £380. Rheoli sadwyr: £930. Hepgor y cyfryw sy’n syniad a phrynu olwynion mwy 19” (£845) a seddi blaen ‘Sports’ (£440).

Eithaf hael yw’r offer a chyfarpar: nawsaerydd deu-barth; cymorth parcio blaen ac ôl clywedol; pentwr o ddyfeisiadau trydan (ffenestri, drychau) a thrydanegol (brecio, sadio ac ati). Ond maith a drud yw’r rhestr (a phecynnau) offer atodol. Serch awtomatig y mwyafrif, daw rheolaeth lwyrach gyda blwch nerth braich.

Manylion

X3 2.0D 8 ger awtomatig: £32,665 (£31,140 – 6 ger n/b); 184m/n; 130mya; 0-62mya 8.5 eiliad; dyfais diffodd-tanio ac adgipio egni; 54.4myg swyddogol; 31-36myg ar brawf gan awgrymu 40 beunyddiol; CO2 147g/km-Tr.Ff.’F’-£130; Breciau ABS/DBC/CBC; Sadio/Gafael DSC/HDC (ffrwyno’r car ar lethrau serth/llithrig); Uchafbwys ôl-gerbyd a breciau 2,400kg; Yswiriant 28.

Y Gystadleuaeth

Freelander Land Rover, Q5 Audi, Tiguan VW, XC60 Volvo. Evoque Range Rover ar gyrraedd os drytach – megis EX 30d Infiniti ond 3.0 V6 serch ‘cynnil’ ei faint.

Dyfarniad

Tipyn o gamp fu cael awtomatic sydd gystal a 6 ger n/b (chwimdra, glendid CO2 a llwnc swyddogol). X3 BMW sydd ar y blaen gyda hyn oll. ‘D oes dim gers isel gan y Freelander (na’r gweddill) ond hwnnw sy’n rhagori oddi ar y ffordd fawr. Er hynny ‘Almaenwr’ Spartanburg, drwyddo draw, yw’r SUV cynnil mwyaf cyfoes.

Dau sy’n denu sylw

2011-07-08T00:00:00+1:00

Amorok Volkswagen

DWY garfan bwysig yw’r Pick-Up a’r Hatch Poeth a daeth dau gerbyd newydd gan Grŵp Volkswagen i ddenu sylw’r naill gynulleidfa a’r llall. Cyrhaeddodd Amorok VW fis Mai a bydd nifer dethol o brynwyr yn cael gafael ar RS3 Audi y mis hwn.

Bu cip ar L200 Mitsubishi y mis diwethaf. Hwnnw fu’n arwain carfan y pick-up yma ers tro gyda’r model cyfredol ar gael ers 2006. Yn ôl yr SMMT, yr L200 oedd ar y blaen eto gydol y llynedd gyda Navara Nissan, HiLux Toyota, Ranger Ford a Rodeo Isuzu’n ei ganlyn. Dros bedwar mis cyntaf eleni, serch hynny, bwrodd y Nissan heibio iddo gyda Toyota, Isuzu a Ford yn 3ydd, 4ydd a 5ed.

Herio’r cyfryw yw bwriad VW gyda’r Amorok. Volkswagen yr Arianin sy’n ei adeiladu ac aeth ar werth yn Ne America, Asia, Awstralia a De’r Affrig eisoes.

Cab dwbl, 4 drws 5 sedd, Startline, Trendline a Highline yw ystod y modelau. Er confensiynol yr adeiladwaith: siasi ar wahân, trawst echel ôl a dolennau dur yn grogiant (annibynnol gyfoes – blaen), dywed VW mai cynnig cysur ac offer mwy car-debyg eto na’r rhelyw wna’r Amorok. Wele flwch 6 ger nerth braich ar bob un ac addaswyd y sadio trydanegol ESP a brecio ABS ar gyfer y diarffordd – esgyn a disgyn llethrau. Daw clo trydanegol ar y differyn (EDL) ac ASR gwrth-slip hefyd.

Gall gyflawni tyrn o waith: ysgwyddo llwyth trymach na 1,000kg (oll ond un*); llawr ddigon llydan ar gyfer ewro-baled wysg ei ochr; tynnu olgerbyd a breciau hyd at 2,690kg; gerio 4x4 uchel/isel; uchder ac adnoddau diarffordd cymeradwy.

Rhan-amser yw 4x4 y cerbyd safonol ond mae fersiwn 4x4 parhaol heb gers isel. Anelwyd hwnnw at brynwyr preifat – 750kg yw uchafswm y llwyth*. A dyma lle mai gan yr L200 fantais o hyd. Ar y Warrior/Barbarian (mwy moethus a drytach) mae SuperSelect Mitsubishi’n cynnig 4x4 uchel (parhaol) ar y ffordd fawr (sy’n gaffaeliad wrth dynnu olgerbyd, e.e.) ynghyd a 4x2 cyffredin a 4x4 isel oddi arno.

Peiriannau: Diesel 2.0 TDI 122; 100mya; 0-62 - 13.7 eiliad; 37.2myg swyddogol; CO2 199g/km. Diesel 2.0 TDI 163 deu-dyrbo; 112 mya; 0-62 - 11.1 eiliad; 35.8 myg swyddogol; CO2 209g/km. Prisiau: £16,995-£21,575 heb TAW; £21,343-£26,839 gyda TAW ac ati. Caboledig a char-debyg fu’r argraff gyntaf – addawol.

RS3 Audi –

Pum silindr a 2.5 litr o faint yw peiriant A3 (Sportback – 5 drws) grymusaf Audi. Efelychu’r TT (Coupe/To Clwt) RS wna hyn ond mynd yn groes i’r S3 (3 drws) a’i uned 4 silindr 261m/n a hefyd Golf 2.0 TSI 270 R Volkswagen. Modelau hatch trachwim y Grwp yw’r cyfryw – cyflymach na’r Golf GTi 210, e.e.

Gyrriant blaen yw’r GTi ond 4x4 y criw crasboeth. Seiliedig ar gyfundrefn Haldex IV diweddaraf, ar allu deinamaidd cyflawn y car mae’r pwyslais yn hytrach na ‘chymorth hawdd ei gael mewn cyfyngder’. Daw 340m/n o’i grombil -155mya (gyfyngwyd) tra 4.6 eiliad yw’r naid 0-62mya. Ei lwnc yw 31myg (ar gyfartaledd swyddogol) a 212g/km yw’r CO2 (‘K’-£260). Dywed Audi mai’r RS3 sydd ratach (£39,930), ysgafnach ei lwnc a CO2 lanach na modelau cyfatebol BMW (Cyfres 1 M Coupe) neu Mercedes-Benz (C63 AMG). Gyda CAP Monitor yn prophwydo gwerthoedd ail-law cryf, hwn meddid sydd rataf i’w gynnal a’i gadw.

‘D oes dim blwch gers nerth barich ar gael ysywaeth, “S tronic” (deu-afael DSG gynt) 7 ger yw’r cyfrwng. Cymeradwy ddigon ydyw – newid di-oedi a llif gyrriant yn gyson ond braf fuasai rheolaeth fwy cyflawn blwch confensiynol ar gar o’r fath.

Trwm dan dechnoleg (ABS, ESP), cyson-fanwl yw’r llywio trydan-fecanyddol os marwaidd a “thawedog” braidd. Cyson yw’r cornelu a dal y ffordd ond sadrwydd rhagor llyfndra yw blaenoriaeth y reid – iawn ar ffyrdd llyfn a di-graith. Archebwyd y cyfan o’r 500 cerbyd glustnodwyd ar gyfer y farchnad hon mae’n debyg a bydd olynydd, yn ol pob son, i’r A3 (a’r Golf?) y flwyddyn nesaf. O gadw’r danteithiol rymusaf tan y diwedd, dyma ddull cofiadwy o ganu’n iach.

Mwy gwaraidd bellach

2011-06-03T00:00:00+1:00

WFFTIO hunan-gyfiawnder gwleidyddol yr Efengyl Werdd wnaeth Mitsubishi wrth ddenu’r sawl oedd a’i fryd ar gerbyd hamdden 4x4 at y pick-up. Addasu cerbyd cydnerth hygred allai wneud ‘tyrn o waith’ fu’r gyfrinach. ‘Warrior’ ac ‘Animal’ yr enwau cyntaf, ‘Warrior’ a ‘Barbarian’ erbyn hyn – 80% y gwerthiant bellach. Pen-cerbyd y garfan ers tro, daeth yr L200 ym 1996 a’i epil diweddaraf yn 2006. Pen-llanw’r pick-up oedd 2006 a 40,103 yn gyfanswm. Erbyn 2009, 18,870. Uchaf-bwynt yr L200 fu 2003: 45.5% y farchnad; 23.9% yn 2009. Cynydd eleni: gw.isod.

Y Cerbyd

Erbyn hyn, ac ar ôl diwygio 2010, go wahanaol yw’r modelau ymarferol (4Work a 4Life) a’r Warrior/Barbarian. Gyrriant 4x4 oll, “Easy Select” yw enw’r cwmni ar drefn y 4Work/4Life sy’n arddel clo ar ddifferyn yr echel ol – gyrriant ôl ar y ffordd fawr, 4x4 o droi oddi arno. Addasu 4x4 y Shogun wna “Super Select” y Warrior a Barbarian gan ychwanegu glud-gyplydd canol sy’n caniatau 4x4 parhaol – caffaeliad wrth dynnu olgerbyd/carafan neu ddygymod â thywydd mawr.

Grymusach hefyd yw Diesel 2.5 litr y ddau flaenor: 175 marchnerth (13m/n rhagor na chynt) tra 134m/n (dim newid) yw hi gyda’r ddau arall. Pum ger nerth braich (caffaeliad fuasai 6ed) neu 5 awtomatig – hwnnw’n cynnig dull ‘Sport’ sy’n gadael i’r gyrrwr elwa’n well ar rym a thorch y peiriant. Daw sadio trydanegol hefyd gyda’r Super Select sy’n gaffaeliad pellach – go chwim yw hwn erbyn hyn.

Bu tipyn o ymbincio ar olwg yr L200, olwynion aloi 17” y peth amlycaf. Bu mwy o waith ar y caban gyda gwell dodrefnu sy’n fwy cysurus. Daw mordwyo-lloeren sy’n cynwys camera ar gefn y cerbyd (cymorth gweledol, os nad clywedol, wrth yrru tua’n ôl) – hyn ar ben nawsaerydd mwy cyflawn y Warrior. Caban dwbl (4 drws, 5 sedd) yw’r cyfryw - cabanau sengl neu ‘Club’ 2+2 ar gael gyda’r gweddill.

Manylion

Awto.5 ger: 2.5l 4sil.tyrbo; 109mya (111-5 nerth braich); 0-62mya 13 eiliad (12.1-5n/b); 30.1myg swyddogol (34-5n/b); 25/26myg ar brawf (amcan/awgrym o 30 yn bosib); CO2 248g/km (218-5n/b); Tr. Ff.’L’/£445 (‘K’/£260-5n/b); Yswiriant 10E (9E-5n/b); Uchafbwys llwyth 1,045kg; Olgerbyd 2,700kg (gyda breciau).

Y Gystadleuaeth

Navara Nissan, HiLux Toyota, Ranger Ford a Rodeo Isuzu sydd amlycaf ond, yn ôl SMMT Llundain, Mitsubishi oedd ar y blaen eto’r llynedd trwy gofrestru 6,418. Dros bedwar mis cyntaf eleni, serch hynny, bwrodd Nissan heibio iddo (Toyota, Isuzu a Ford: 3, 4, 5). Herio’r cyfan wna Amorok VW – mwy am hwnnw yn y fan.

Dyfarniad

Cysurus a llyfn iawn i ‘dryc ysgafn’, go egniol yw’r L200 ac fe ellir ei yrru’n eithaf brwd. Go waraidd yw’r “Barbarian” hwn ond blaenllaw o hyd ei gymwysterau.

Gwefr os nad gwefreiddiol

2011-05-26T00:00:00+1:00

DULL croesryw petrol-trydan Honda fu cyfuno’r uned drydan gyda’r gyrriant – IMA (Integrated Motor Assist). “Cymorth hawdd ei gael” wrth gychwyn o’r sefyll, cyflymu ac yna ysgafnhau’r baich ar y peiriant a hwnnw’n mynd wrth ei bwysau.

Cyfosod trydan a phetrol fu trefn Toyota (ac eraill – Jazz Ebrill, Civic newydd Rhagfyr Honda hefyd) gan neilltuo mymryn o yrru trydanol cyn i’r peiriant danio. Gyda’r naill a’r llall, adfywio’r batri wna’r peiriant (ac ad-gipio egni brecio) wrth iddo yntau ymsefydlu. Di-enaid a chlinigol yn aml fu’r ceir hyn, nid felly’r CR-Z.

Y Car

Fersiwn ar Insight Honda lansiwyd yn Sioe Detroit 2009 yw CR-Z 2010 Gyriant blaen cyfarwydd y patrwm a bendith yr IMA (rhatach hefyd) yw blwch 6 ger nerth braich rhagor awto CVT addasu di-fwlch. Gyda’r Insight diweddaraf (1.3 litr) serch hynny, awto.CVT yn unig yw hi ond daw blwch 6 ger N/B hefyd ar yr CR-Z.

Ychwanegu 14 marchnerth at 114m/n y peiriant 1.5 litr wna’r uned drydan – tipyn grymusach na 87m/n yr Insight. Coupe diamwys, isel ei osgo yw’r CR-Z a safle yrru gyffelyb ond cysurus a digon o le ar gyfer dau oedolyn. “2+2” ydyw ond prin y lle tu ôl ar gyfer neb ond baban neu gi. Hatch ydyw ac fe ellir plygu’r seddi (nid yn fflat ysywaeth) ond mae hollt y ffenest ôl yn amharu ar yr olwg drwy’r drych.

Go elfennol yw’r siasi ond diwygiwyd y crogiant a’r sadwyr er budd cornelu a dal y ffordd. Trydan yw’r llywio a marwaidd ydyw os manwl. O daro’r botwm ‘Sport’ daw ymateb mwy egnïol i’r sbardun trwy dynnu ar fwy o dorch ‘trydanol’ ac ychwanegu dogn o drymdra i’r llywio – hwnnw’n fwy cydnaws-siarp o’r herwydd.

Serch trawst-echel ôl ddigon elfennol, sad-gyson ond digon cysurus yw ansawdd reid y car. Mae llu wybodaeth ar y dasfwrdd i ysgogi gyrru ‘Eco’ neu ‘Normal’, dyfais ddiffodd-danio er arbed petrol – gellir gyrru’n “hamddenol” hefyd.

Manylion

CR-Z 6 ger N/B: S, Sport a GT;124mya; 0-62mya 9.9 eiliad; 56.4myg swyddogol; 44/45myg ar brawf; 117g/km-‘C’-Tr.Ff.£0; £17,695-£20,820; Yswiriant 16/17.

Y Gystadleuaeth

Dim yn uniongyrchol serch Scirocco VW, Cyfres1 BMW, C30 Volvo petrol/Diesel.

Dyfarniad

Arddel tipyn o wefr wna’r CR-Z os nad gwefreiddio. Ernes o’r hyn a ddaw ydyw ac os am gar glân (rhagor CO2 yn unig, e.e.) gall yr Honda heini hwn apelio.

Mwy na llenwi bwlch

2011-05-13T00:00:00+1:00

CAFODD Audi flwyddyn dda y llynedd. Gwerthodd ragor na miliwn o geir (+15%). “Rhif 1 Ewrop” y ‘glaswaed’ bellach (+18.2%) ond 43.4% fu dringfa Tseina gan fynd a chwarter y cynyrch cyfan o’r bron. Daw 13eg model newydd eleni a’r bwriad yw disodli BMW. Er ‘dethol’, mae gan yr A7 “gyfran yn y rhyfel mawr”.

Cyfrinach Audi yw adnoddau Grwp Volkswagen - dyna pam y magodd BMW berthynas a Peugeot a hefyd Daimler (Mercedes-Benz) wedyn a Renault-Nissan.

Gor-symleiddio yw son am “lwyfan” yma. Mae gan VW gyfres o adeiladweithiau sylfaenol a gellir amrywio hyd, lled, uchder (sail olwyn, trac ac ati) darpar geir wrth eu cynllunio. Esblygu’r A4 wna’r A5, helaethu arno yr A6. Achub y blaen ar hwnnw (o ryw dri mis) wnaeth yr A7 ond addasiad ydyw ar adeiladwaith yr A6.

Llenwi’r bwlch rhwng yr A6 a’r A8 (aliwminiwm drwyddo draw) wna’r A7 megis CLS Mercedes-Benz sy’n seiliedig ar yr E-klasse ond sefyll rhyngddo a’r S-klasse mawr. CLS 2004 atgyfododd y coupe 4 drws a daeth olynydd iddo eleni.

A chraff fu Audi wrth ‘lenwi bylchau’ (A5: Coupe, Cabriolet neu Sportback - hatch 5 drws) ond Sportback coupe-debyg yn unig yw’r A7. Petrol 2.8 FSI a 3.0 TFSI (201-296 marchnerth) neu Diesel 3.0TDI (201-294m/n) yw’r peiriannau – V6 oll.

Awtomatig yn unig ysywaeth: parhaol di-fwlch ‘Multitronic’ os gyrriant blaen; 7 ger deu-afael ‘S-tronic’ gyda’r quattro 4x4 (quattro pob un yma heblaw’r 3.0 TDI 201). Quattro yw’r dewis amlwg gan mai hwn sy’n lliniaru effaith pwysau blaen y car cyffredin gyda mwy o dorch yn mynd i’r echel ol. Nid yw mor gytbwys a gyrriant ol clasurol (BMW a Mercedes) ond ‘d oes dim edliw ei allu dan dywydd mawr.

Caffaeliad yw hatch (BMW 5 GT hefyd) rhagor sedan yr CLS ac XF Jaguar. Hir y “gist” ond ‘d oes fawr o uchder o gyrraedd ei gwt. A chan mai car isel a hir yw hwn mae angen y cymorth parcio clywedledol a’r camerau atodol (£500).

Hynod gaboledig yw caban yr Audi a’i arlwy ond mae llawer o’r eitemau arloesol ar restr atodol faith a drud: crogiant aer (£2,000), sbid-reolydd effro (£1,800), Mordwyo Lloeren MMI+ (£1,175) ac ati. £45,220-£49,790 yw’r prisiau a £48,000 y 3.0 TDI quattro SE sy’n fwy nag atebol heb ychwanegu’r uchod (gan fwyaf).

Gall gyrraedd 155mya a 62 ymhen 6.3 eiliad ond 158g/km go resymol (‘G’) yw’r CO2 (£165 y flwyddyn). Dangosodd cyfrifiadur y car 37/38myg darbodus iawn dros gyfnod (47.1myg swyddogol) sy’n awgrymu 40 posib. Audi all gystadlu a goreuon y garfan eto, mae’n gwneud mwy na ‘llenwi bwlch’. Serch hynny, syniad fuasai bwrw golwg dros yr A5 Sportback (£25,455-£38,725) cyn taro’r fargen.

NV200 Nissan – Modur Melyn 2013 Efrog Newydd

O ganlyn y Checker Cab enwog a Crown Victoria Ford wedyn, daeth tro ar fyd wrth i NV 200 Nissan ennill sel bendith y ddinas fel y tacsi swyddogol ar gyfer y ddegawd nesaf: 2013-2023. Cludydd sy’n seiliedig ar gerbyd masnachol yw’r NV 200 – creadur gwahanol iawn i’r sedan Americanaidd cyfarwydd. Fe ddaw o ffatri Cuernavaca, Mexico. Petrol 2.0 litr, 4 silindr i gychwyn (mae fersiynau trydan yn yr arfaeth) daw nifer o adnoddau newydd megis plwg 12v, USB ac ati gan adael i deithwyr weithio neu gyfathrebu’n drydanegol. Mae nawsaerydd are u cyfer ac addasu wna’r seddi a goleuadau mewnol y caban. Hwyluso egyn a disgyn meddid wna’r sgil ddrysau llithro, stepiau a chyfarpar cymorth. Mae gan y gyrrwr yntau arlwy gyfathrebu ‘telemataidd’ a mordwyo lloeren ger ei fron.